Jharsuguda Bypoll: ଦିନ 1ଟା ସୁଦ୍ଧା 41.26% ମତଦାନ

ଝାରସୁଗୁଡା ଉପନିର୍ବାଚନ ପାଇଁ ଶାନ୍ତି ଶୃଙ୍ଖଳାର ସହିତ ଭୋଟ ଗ୍ରହଣ ଜାରି ରହିଛି । ଦିନ 1ଟା ସୁଦ୍ଧା 41.26 ପ୍ରତିଶତ ମତଦାନ ହୋଇଥିବା ନେଇ ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ । ଅଧିକ ପଢନ୍ତୁ

ଭୁବନେଶ୍ବର:ଭୋଟ ଦେଉଛି ଝାରସୁଗୁଡା । ଶାନ୍ତି ଶୃଙ୍ଖଳାର ସହିତ ଝାରସୁଗୁଡା ଉପନିର୍ବାଚନର ଭୋଟିଂ ପ୍ରକ୍ରିୟା ଜାରି ରହିଛି । ସକାଳ 7 ରୁ ଆରମ୍ଭ ହୋଇଛି ମତଦାନ ପ୍ରକ୍ରିୟା । ଇଭିଏମରେ ଥିବା ତ୍ରୁଟିର ସମାଧାନ କରାଯାଇଛି । ଦିନ 1ଟା ସୁଦ୍ଧା 41.26 ପ୍ରତିଶତ ମତଦାନ ହୋଇଛି । ଏନେଇ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ।

ସିଇଓଙ୍କ ସୂଚନା ଅନୁସାରେ, ଝାରସୁଗୁଡା ଉପନିର୍ବାଚନର ଭୋଟିଂ ସକାଳ 7ରୁ ଆରମ୍ଭ ହୋଇଛି । ଭୋଟିଂ ପୂର୍ବରୁ ମକ ପୋଲ କରାଯାଇଥିଲା । ମକ ପୋଲ ସମୟରେ 16ଟି ବୁଥରେ ଇଭିଏମରେ ତ୍ରୁଟି ଥିବା ନଜରକୁ ଆସିଥିଲା । ତ୍ରୁଟି ସମାଧାନ କରାଯାଇ ଭୋଟିଂ ଜାରି ରହିଛି । ସକାଳ 7ଟା ରୁ 9ଟା ଭିତରେ କୌଣସି ତ୍ରୁଟି ହୋଇନାହିଁ । ହେଲେ ପୂର୍ବାହ୍ନ 9ଟା ରୁ 11 ଭିତରେ 2ଟି ବୁଥରେ ସମସ୍ୟା ଦେଖିବାକୁ ମିଳିଥିଲା । 62 ନଂ ଓ 128 ନଂ ବୁଥରେ ଇଭିଏମର ତ୍ରୁଟି ହୋଇଥିଲା । ଏହାକୁ ମଧ୍ୟ ସମାଧାନ କରାଯାଇଛି । ଦିନ 1ଟା ସୁଦ୍ଧା 41.26 ପ୍ରତିଶତ ମତଦାନ ରେକର୍ଡ ହୋଇଛି । ପୂର୍ବାହ୍ନ 11 ସୁଦ୍ଧା 24,398 ଜଣ ପୁରୁଷ ଓ 20,785 ଜଣ ମହିଳା ଭୋଟର ନିଜର ମତ ଦାନ ସାବ୍ୟସ୍ତ କରିଥିଲେ । ଲୋକଙ୍କ ମଧ୍ୟରେ ଭୋଟିଂକୁ ନେଇ ଉତ୍ସାହ ଭରି ରହିଛି ।

ସେ ଆହୁରି ମଧ୍ୟ କହିଛନ୍ତି ଯେ, ''ପୂର୍ବାହ୍ନ 11ଟା ସୁଦ୍ଧା 42 ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । ଏହା ଆଉ 2ରୁ 3 ଡିଗ୍ରୀ ବଢ଼ିବ ବୋଲି ଆକଳନ କରାଯାଇଛି । ମଧ୍ୟାହ୍ନ 3 ବେଳକୁ ଏହା ପିକକୁ ଯିବ । ଏହାକୁ ଦୃଷ୍ଟିରେ ରଖି ବ୍ୟାପକ ବ୍ୟବସ୍ଥା କରାଯାଇଛି । ତାତିରୁ ରକ୍ଷା ପାଇବା ପାଇଁ ସମସ୍ତ ବୁଥରେ ପାନୀୟ ଜଳ ସହ ଜଳ ସିଞ୍ଚନ କରାଯାଉଛି । ପିଇବା ପାଇଁ ରସନା ପାଣି ଦିଆଯାଇଛି । ଯେଉଁଠି ଗହଳି ଅଛି ସେଠାରେ ଲୋକଙ୍କ ଅନୁମତି ନେଇ ସ୍ପ୍ରିଂକଲ କରାଯାଇଛି । 26 ପିଙ୍କ ବୁଥ କରାଯାଇଛି । ଯାହା ମୋଟ ବୁଥର 10 ପ୍ରତିଶତ । ସେଠାରେ ସମସ୍ତ ପୋଲିଂ ଅଧିକାରୀ ମହିଳା ନିୟୋଜିତ ଅଛନ୍ତି । ଭିନ୍ନକ୍ଷମ ଭୋଟରଙ୍କ ଲାଗି ମଧ୍ୟ ବ୍ୟାପକ ବ୍ୟବସ୍ଥା କରାଯାଇଛି । ସେମାନଙ୍କୁ ଭୋଟିଂ ପାଇଁ ନେବା ଆଣିବା କରିବାକୁ 118ଟି ସକ୍ଷମ ବାହାନର ବ୍ୟବସ୍ଥା କରାଯାଇଛି । ସମସ୍ତ 253 ବୁଥରେ ୱେବକାଷ୍ଟିଂ ହେଉଛି ।''

ଇଟିଭି ଭାରତ, ଭୁବନେଶ୍ବର