ପୁଣି ଜଣେ ବ୍ରାଉନସୁଗାର ବେପାରୀକୁ ଗିରଫ କଲା ଖୋର୍ଦ୍ଧା ପୋଲିସ

ଖୋର୍ଦ୍ଧା ଆଦର୍ଶ ଥାନା ପୋଲିସ ଜଣେ ନିଶା ବେପାରୀ ପ୍ରକାଶ ନାୟକକୁ ସୋମବାର ଗିରଫ କରିବା ସହ ତା ଠାରୁ ୧୬ ଗ୍ରାମ ବ୍ରାଉନସୁଗାର, ଗୋଟିଏ ମୋବାଇଲ ଫୋନ ଓ ନଗଦ ୩୦ ହଜାର 200 ଟଙ୍କା ଜବତ କରିଛନ୍ତି ।

ଖୋର୍ଦ୍ଧା: ଖୋର୍ଦ୍ଧା ଆଦର୍ଶ ଥାନା ପୋଲିସ ଜଣେ ନିଶା ବେପାରୀ ପ୍ରକାଶ ନାୟକକୁ ସୋମବାର ଗିରଫ କରିଛନ୍ତି । ପ୍ରକାଶ ଠାରୁ ପୋଲିସ ୧୬ ଗ୍ରାମ ବ୍ରାଉନସୁଗାର ଜବତ କରିବା ସହ ତା ନିକଟରୁ ଗୋଟିଏ ମୋବାଇଲ ଫୋନ ଓ ନଗଦ ୩୦ ହଜାର 200 ଟଙ୍କା ଜବତ କରିଥିବା ନେଇ ଖୋର୍ଦ୍ଧା ଏସଡିପିଓ ସୁଶୀଲ କୁମାର ମିଶ୍ର ସୂଚନା ଦେଇଛନ୍ତି ।

ସୂଚନା ଅନୁଯାୟୀ, ‘ଖୋର୍ଦ୍ଧା କ୍ଲିନ’ ଅପରେସନ ଜରିଆରେ ଜିଲ୍ଲା ପୋଲିସ ଖୋର୍ଦ୍ଧାକୁ ସମ୍ପୂର୍ଣ୍ଣ ଅପରାଧ ନିରୋଧୀ ସହର କରିବା ପାଇଁ ଅଭିଯାନ ଚଳାଇଛି । ତେବେ ଖୋର୍ଦ୍ଧା ପୋଲିସ ନିଶା ବେପାରୀ ପ୍ରକାଶ ନାୟକକୁ ସୋମବାର ଗିରଫ କରିବା ସହ କୋର୍ଟ ଚାଲାଣ କରିଛି ।

ତେବେ ପ୍ରକାଶ ନାମରେ ବାଲେଶ୍ବର ଜିଲ୍ଲାର ସହଦେବଖୁଣ୍ଟା ଥାନା ଏବଂ ଖୋର୍ଦ୍ଧା ଜିଲ୍ଲାର ବିଭିନ୍ନ ଥାନାରେ ଏକାଧିକ ମାମଲା ଥିବା ଜଣାପଡିଛି । ଏଥିସହ ଏହି ବେପାରରେ ପ୍ରକାଶ ଖୋର୍ଦ୍ଧା ଅଞ୍ଚଳର ଯୁବକମାନଙ୍କୁ ନିୟୋଜିତ କରିଥିବା ପୋଲିସ ଜାଣିବାକୁ ପାଇଛି । ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୧ଲକ୍ଷ ୬୦ହଜାର ଟଙ୍କା ହେବ ବୋଲି ପୋଲିସ ସୂଚନା ଦେଇଛି ।

ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ