ଭୁବନେଶ୍ବର:ଆଜିଠୁ ଓଡିଶା ଯୁଗ୍ମ ପ୍ରବେଶିକା ପରୀକ୍ଷା (OJEE) କାଉନସେଲିଂ ପ୍ରକ୍ରିୟା ଆରମ୍ଭ ହେବ । ଜୁଲାଇ ୧୫ ତାରିଖ ପର୍ଯ୍ୟନ୍ତ ରେଜିଷ୍ଟ୍ରେସନ ଓ ଚଏସ୍ ଲକିଂ କରିପାରିବେ ଛାତ୍ର ଛାତ୍ରୀ । ଜୁଲାଇ ୧୯ ତାରିଖରେ ପ୍ରଥମ ପର୍ଯ୍ୟାୟର ଆଲଟମେଣ୍ଟ ପ୍ରକାଶ ପାଇବ । କାଉନସେଲିଂ ପ୍ରକ୍ରିୟାରେ ଟେକ୍ନିକାଲ ୟୁଜି ପାଠ୍ୟକ୍ରମ ପାଇଁ ନାମଲେଖା ହେବ ।
ରାଜ୍ୟର ସମସ୍ତ ସରକାରୀ ଓ ବେସରକାରୀ କଲେଜ ଓ ବିଶ୍ବ ବିଦ୍ୟାଳୟରେ ନାମଲେଖା ହେବ । ଏହି କାଉନସେଲିଂ ପ୍ରକ୍ରିୟା ଅଗଷ୍ଟ 14 ସୁଦ୍ଧା ଶେଷ ହେବ । ଜୁଲାଇ ୩୧ ତାରିଖରେ ଦ୍ବିତୀୟ ପର୍ଯ୍ୟାୟ ଆଲଟମେଣ୍ଟ ପ୍ରକାଶ ପାଇବ । ଚଳିତ ବର୍ଷ ରାଜ୍ୟରେ ମୋଟ 48,783 ଜଣ ଓଜେଇଇ ରାଙ୍କ ପାଇଛନ୍ତି । ଓଜେଇଇ ପକ୍ଷରୁ ଦିଆଯାଇଥିବା ତଥ୍ୟ ଅନୁସାରେ ଆଜି(ଗୁରୁବାର) ୧୧ ଟା ସମୟରେ ରେଜିଷ୍ଟ୍ରେସନ ସହ ଚଏସ ଫିଲିଂ କରିବେ ଛାତ୍ରାଛାତ୍ରୀ । ଯାହା ବି ଟେକ, ବି ପ୍ଲାନ, ବି କ୍ୟାଟ ଆଦି ବିଷୟରେ କରାଯିବ । ସେହିପରି ଜୁଲାଇ ୧୨ ତାରିଖରେ ଡିସପ୍ଲେ ସିଟ ଆଲଟମେଣ୍ଟ କରାଯିବ । ୧୫ ତାରିଖରେ ରେଜିଷ୍ଟ୍ରେସନ ସହ ଚଏସ ଲକିଂ ଶେଷ ହେବ ।
ସେହି ଅନୁଯାୟୀ ଜୁଲାଇ ୧୯ ତାରିଖରେ ପ୍ରଥମ ପର୍ଯ୍ୟାୟ ସିଟ୍ ଆଲଟମେଣ୍ଟ ପ୍ରକାଶ ପାଇବ । ୧୯ ତାରିଖରୁ ୨୩ ତାରିଖ ପର୍ଯ୍ୟନ୍ତ ଅନଲାଇନରେ ରିପୋର୍ଟିଂ କରିବେ ଛାତ୍ରଛାତ୍ରୀ । ସାର୍ଟିଫିକେଟ ପ୍ରମାଣପତ୍ର ଅପଲୋଡ଼, ଫି ଦାଖଲ ଆଦି କରାଯିବ । ସେହିପରି ଭାବରେ ଜୁଲାଇ ୩୧ ତାରିଖରେ ଦିତୀୟ ପର୍ଯ୍ୟାୟ ଆଲଟମେଣ୍ଟ ପ୍ରକାଶ ପାଇବ । ଅଗଷ୍ଟ ୧ ତାରିଖରୁ ୫ ତାରିଖ ପର୍ଯ୍ୟନ୍ତ ରେଜିଷ୍ଟ୍ରେସନ ସହ ସ୍ପେଶାଲ ଓଜେଇଇ ବି ଟେକ୍ ରାଙ୍କ ରଖିଥିବା ପିଲାମାନେ ରେଜିଷ୍ଟ୍ରେସନ କରିପାରିବେ । ଅଗଷ୍ଟ ୨ ପର୍ଯ୍ୟନ୍ତ ସିଟ୍ ପାଇଁ ବୁକିଂ କରିବେ ପରୀକ୍ଷାର୍ଥୀ । ସେହିପରି ଅଗଷ୍ଟ ୮ ତାରିଖରେ ତୃତୀୟ ପର୍ଯ୍ୟାୟ ଆଲଟମେଣ୍ଟ ପ୍ରକାଶ ପାଇବ । ଅଗଷ୍ଟ ୮ ତାରିଖରୁ ଅଗଷ୍ଟ ୧୦ ତାରିଖ ପର୍ଯ୍ୟନ୍ତ ଅନଲାଇନରେ ରିପୋର୍ଟିଂ କରିବେ । ତଥ୍ୟ ଅପଲୋଡ୍, ଫି' ଦାଖଲ, ସିଟ୍ ଧାର୍ଯ୍ୟ କରିବା ଆଦି ଅନଲାଇନ ମାଧ୍ୟମରେ କରାଯିବ । ତେବେ ଅଗଷ୍ଟ ୧୪ ତାରିଖରେ ଶେଷ ଆଲଟମେଣ୍ଟ କରାଯିବ ।