ଭୁବନେଶ୍ବର:ମହାମହିମ ରାଷ୍ଟ୍ରପତିଙ୍କ ପ୍ରତି ଅଶାଳୀନ ମନ୍ତବ୍ୟ ପ୍ରତିବାଦରେ ପଶ୍ଚିମବଙ୍ଗ ମନ୍ତ୍ରୀ ଅଖିଳ ଗିରିଙ୍କ ଅପମାନଜନକ ମନ୍ତବ୍ୟକୁ ନେଇ ସାରା ଓଡିଶାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି(Akhil Giris objectionable remarks against President) । ଉଭୟ କଂଗ୍ରେସ ଓ ବିଜେଡି ଏହି ଘଟଣାକୁ ଦୃଢ ନିନ୍ଦା କରିବା ସହ ସମ୍ପୃକ୍ତ ଟିଏମସି ନେତା ତଥା ମନ୍ତ୍ରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରିଛନ୍ତି । ରାଷ୍ଟ୍ରପତି ହେଉଛନ୍ତି ଭାରତର ଗର୍ବ ଓ ଗୌରବ । ତାଙ୍କୁ ଅପମାନ କରିଥିବା ମନ୍ତ୍ରୀଙ୍କୁ ମନ୍ତ୍ରୀ ମଣ୍ଡଳୀରୁ ବିଦା କରିବାକୁ ଦାବି ହୋଇଛି ।
କଂଗ୍ରେସ ବିଧାୟକ ସୁର ରାଉତରାୟ କହିଛନ୍ତି ଯେ, ''ଆମେ ସମସ୍ତେ ମର୍ମାହତ । ପଶ୍ଚିମବଙ୍ଗର ଜଣେ ମନ୍ତ୍ରୀ ରାଷ୍ଟ୍ରପତିଙ୍କୁ ସମାଲୋଚନା କରିଛନ୍ତି, ତାହା ଗ୍ରହଣୀୟ ନୁହେଁ । ମହିଳା ଶକ୍ତିର ଜ୍ୱଳନ୍ତ ଉଦାହରଣ ସେ । ଜଣେ ଶିକ୍ଷିତ ମହିଳା ଯିଏ ବିଧାୟକ, ମନ୍ତ୍ରୀ ପରେ ରାଜ୍ୟପାଳ ହୋଇଥିଲେ । ଦ୍ରୌପଦୀ ମୁର୍ମୁ ଯେଉଁ ରାଜ୍ୟକୁ ଯାଉଛନ୍ତି, ଲୋକେ ତାଙ୍କୁ ଆଦରରେ ଗ୍ରହଣ କରୁଛନ୍ତି । ରାଷ୍ଟ୍ରପତିଙ୍କ ପ୍ରତି ଯେଉଁ କଟୁ ଶବ୍ଦ କୁହାଯାଇଛି, ତାହା ନିନ୍ଦନୀୟ । ଅଖିଳ ଗିରିଙ୍କୁ ତୁରନ୍ତ ମନ୍ତ୍ରୀ ମଣ୍ଡଳୀରୁ ବିଦା କରିବା ସହ ଗିରଫ କରିବାକୁ ସୁର ଦାବି କରିଛନ୍ତି । ଭାରତ ବର୍ଷର ଗର୍ବ ଯଦି ଏମିତି ସମାଲୋଚନା କରାଯାଏ ତାହାକୁ ଆମେ ଗ୍ରହଣ କରିବୁ ନାହିଁ । ଯଦି ସେ କେବେ ଓଡ଼ିଶା ଆସନ୍ତି, ତେବେ ତାଙ୍କ ମୁହଁରେ ଗୋବର ବୋଳା ହେବ । ଏ ମାଟିରେ ତାଙ୍କୁ ଓହ୍ଲେଇ ଦେବୁନାହିଁ ।''
ଅନ୍ୟ ଜଣେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ଯେ, ''ରାଷ୍ଟ୍ରପତି ହେଉଛନ୍ତି ଭାରତର ଗର୍ବ ଓ ଗୌରବ । ଦେଶର ପ୍ରଥମ ନାଗରିକ । ଟିଏମସି ମନ୍ତ୍ରୀଙ୍କ ଏହି ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରୁ ବରଖାସ୍ତ କରିବା ସହ ଗିରଫ କରାଯାଉ । ଏହାସହ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ କ୍ଷମା ପ୍ରାର୍ଥନା କରନ୍ତୁ । ଏହା ଓଡ଼ିଆ ସ୍ୱାଭିମାନର କଥା । ଦେଶ, ମହିଳା ଓ ଆଦିବାସୀଙ୍କ ଅସ୍ମିତାର କଥା ।''