ଭୁବନେଶ୍ବର :ବିଧାନସଭାରେ ୨୦୨୩-୨୪ ଆର୍ଥିକ ବର୍ଷ ପାଇଁ ବଜେଟ ଅର୍ଥମନ୍ତ୍ରୀ ଉପସ୍ଥାପନା କରିଛନ୍ତି । ରାଜ୍ୟ ସରକାର ପରିବହନର ସମସ୍ତ ମାଧ୍ୟମ ଯଥା ସଡକ, ରେଳ, ଜଳ ଓ ବେସାମରିକ ବିମାନ ଚଳାଚଳକୁ ବାଣିଜ୍ୟ ଓ ପରିବହନ ବିଭାଗରେ ପରିସରଭୁକ୍ତ କରିଛନ୍ତି । ଭିତ୍ତିଭୂମିକୁ ପ୍ରୋତ୍ସାହନ ଦେବା ଏବଂ ବିକାଶର ଗତି ଜାରି ରଖିବା ପାଇଁ ସରକାର ସଡକ, ସେତୁ, ବିମାନବନ୍ଦର ଏବଂ ରେଳବାଇ ଅଧୀନରେ ୧୯ ହଜାର ୪୫୨କୋଟି ଟଙ୍କା ନିବେଶ ପାଇଁ ପ୍ରସ୍ତାବ ରହିଛି । ଯାହା ଗତବର୍ଷ ତୁଳନାରେ ୩୪ ପ୍ରତିଶତ ଅଧିକ ଅଟେ । ସଡକ ସୁରକ୍ଷା ପାଣ୍ଠି ପାଇଁ ଅନୁଦାନ ବୃଦ୍ଧି କରାଯାଇଥିବା ବେଳେ ବଜେଟରେ ୪୦କୋଟି ଟଙ୍କା ବ୍ୟୟବରାଦ କରାଯାଇଛି । ମୁଖ୍ୟମନ୍ତ୍ରୀ ସଡକ ସୁରକ୍ଷା ଯୋଜନା କାର୍ଯ୍ୟକାରୀ ହେବାକୁ ଯାଉଛି ଯେଉଁଥିରେ ବିଭିନ୍ନ ବୈଷୟିକ ଜ୍ଞାନକୌଶଳଯୁକ୍ତ ପଦକ୍ଷେପ ଅନ୍ତର୍ଭୁକ୍ତ । ସେହିପରି ୮ଟି ଜିଲ୍ଲାରେ ଟ୍ରକ ଟର୍ମିନାଲ ସ୍ଥାପନ ନିମନ୍ତେ ୮୦କୋଟି ଟଙ୍କାର ବଜେଟ ରଖାଯାଇଛି ।
୨୦୨୩-୨୪ ଆର୍ଥିକ ବର୍ଷରେ ରାଜ୍ୟରେ ବିଭିନ୍ନ ରେଳ ପ୍ରକଳ୍ପର ବିକାଶ ନିମନ୍ତେ ୩୨୦କୋଟି ଟଙ୍କା ବ୍ୟୟବରାଦ ହୋଇଛି । ସେହିପରି ବିମାନ ଯୋଜନାକୁ ଅଧିକ ଉନ୍ନତ କରିବା ପାଇଁ ଓ ବ୍ୟବସାୟ ପାଇଁ ଅଧିକ ନିଯୁକ୍ତି ସୃଷ୍ଟି କରିବା ତଥା ଏହି କ୍ଷେତ୍ରପ୍ରେ ଥିବା ସମ୍ଭାବନାର ଉନ୍ମୋଚନ ପାଇଁ ରାଜ୍ୟ ସରକାର ଓଡିଶା ବେସାମରିକ ବିମାନ ଚଳାଚଲ ନୀତି ୨୦୨୨ ପ୍ରଣୟନ କରିଛନ୍ତି । ଏଥିସହ UDAN ଯୋଜନା ମାଧ୍ୟମରେ ଓଡିଶାକୁ ସୁଲଭ ବିମାନ ସେବା ଯୋଗାଇ ଦିଆଯାଇଛି । ଉଡାଣ ଯୋଜନାରେ ଆର୍ଥନୈତିକ ଦୃଷ୍ଟିକୋଣରୁ VGF ପାଇଁ ସବସିଡି ବାବଦରେ ୪୫ କୋଟି ଟଙ୍କା ପ୍ରଦାନ କରାଯାଇଛି ।