ଭୁବନେଶ୍ବର: ଆଦିବାସୀ ଜମି ପ୍ରସଙ୍ଗରେ ହୁଲୁସ୍ତୁଲ ବିଧାନସଭା । ଆଜି ବି ଚାଲି ପାରିଲାନି ପ୍ରଶ୍ନକାଳ । ଆଦିବାସୀ ଜମି କିଣାବିକା ସଂକ୍ରାନ୍ତ ପ୍ରସ୍ତାବ ସମ୍ପୂର୍ଣ୍ଣ ପ୍ରତ୍ୟାହାର ଦାବିରେ କମ୍ପିଲା ଗୃହ । ପ୍ରଶ୍ନକାଳ ଆରମ୍ଭ ହେବା କ୍ଷଣି ପ୍ରବଳ ହୋ ହଲ୍ଲା କଲେ ବିରୋଧୀ । କଂଗ୍ରେସ ଓ ବିଜେପି ସଦସ୍ୟ ଗୃହମଧ୍ୟକୁ ଆସି ବିକ୍ଷୋଭ ପ୍ରଦର୍ଶନ କଲେ । ଗୃହକାର୍ଯ୍ୟ ଚଳାଇ ଦେଲେ ନାହିଁ ଉଭୟ ବିରୋଧୀ ଦଳ । ବିରୋଧୀଙ୍କ ଜୋରଦାର ହଙ୍ଗାମା ଭିତରେ ଗୃହ ଚଳାଇବା ମୁସ୍କିଲ ହୋଇଯାଇଥିଲା । ପ୍ରବଳ ହଟ୍ଟଗୋଳ ଯୋଗୁଁ ଶେଷରେ ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବୀ ଘୋଷଣା କଲେ ବାଚସ୍ପତି ପ୍ରମିଳା ମଲ୍ଲିକ ।
ଏଠାରେ ଉଲ୍ଲେଖଯୋଗ୍ୟ ଯେ, କିଛି ଦିନ ତଳେ କ୍ୟାବିନେଟରେ ନିଷ୍ପତ୍ତି ହୋଇଥିଲା ଯେ, ଆଦିବାସୀଙ୍କ ଜମି ଅଣଆଦିବାସୀ କିଣିପାରିବେ । କିନ୍ତୁ ପରବର୍ତ୍ତୀ ସମୟରେ ଏହି ନିଷ୍ପତ୍ତିକୁ ସ୍ଥଗିତ ରଖିଥିଲେ ସରକାର । ଯାହାକୁ ନେଇ ବିରୋଧୀ ବିଧାନସଭାରେ ହଙ୍ଗାମା କରୁଛନ୍ତି । ଆଦିବାସୀଙ୍କ ଜମି ହଡପ କରିବାକୁ ଏହା ସରକାରଙ୍କ ଚକ୍ରାନ୍ତ ବୋଲି ଅଭିଯୋଗ କରୁଛନ୍ତି । ତେଣୁ ରାଜ୍ୟ ସରକାର ଏହି ଆଦିବାସୀ ଜମି କିଣାବିକା ପ୍ରସଙ୍ଗରେ ଯେଉଁ ସ୍ଥିଗତାଦେଶ ଜାରି କରିଛନ୍ତି, ତାହାକୁ ସମ୍ପୂର୍ଣ୍ଣ ପ୍ରତ୍ୟାହାର କରିନେବାକୁ ଦାବି କରୁଛନ୍ତି ଉଭୟ ବିରୋଧୀ ଦଳ ।
କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ଯେ, ରାଜ୍ୟ ସରକାର ଡରୁଛନ୍ତି । ପ୍ରଶ୍ନକାଳ ଚାଲିଥିଲେ ସରକାରଙ୍କ ଅସଲ କଥା ପଦାକୁ ଆସିଥାନ୍ତା । ତେଣୁ ଅପରାହ୍ନ ୪ଟା ପର୍ଯ୍ୟନ୍ତ ଗୃହ ମୁଲତବୀ ଘୋଷଣା କରାଯାଇଛି । ସ୍ବାଧୀନତା ପରଠାରୁ ବିଜେଡି ଓ ବିଜେପି ଦକ୍ଷିଣ ଓଡ଼ିଶା ପାଇଁ କୌଣସି ବିକାଶ କରିନାହାନ୍ତି । ଯେତେସବୁ ଯୋଜନା ହୋଇଛି, ତାହା କଂଗ୍ରେସ ଅମଳରେ । ପ୍ରଚଳିତ ସରକାର କେବଳ ବାହାଃସ୍ପଟ ମାରୁଛନ୍ତି ।