୮ରୁ ଓଡ଼ିଆ ବିଶ୍ବବିଦ୍ୟାଳୟରେ ନାମଲେଖା ପ୍ରକ୍ରିୟା ଆରମ୍ଭ

ଜୁଲାଇ ୮ରୁ ଓଡ଼ିଆ ବିଶ୍ବବିଦ୍ୟାଳୟରେ ନାମଲେଖା ପ୍ରକ୍ରିୟା ଆରମ୍ଭ । ଅଗଷ୍ଟ ୧୩ରେ ପ୍ରବେଶିକା ପରୀକ୍ଷା । ଅଧିକ ପଢନ୍ତୁ

ଭୁବନେଶ୍ବର: ୨୦୨୩-୨୪ ଶିକ୍ଷାବର୍ଷରେ ସତ୍ୟବାଦୀ ଓଡ଼ିଆ ବିଶ୍ବବିଦ୍ୟାଳୟରେ ନାମଲେଖା ପାଇଁ ସ୍ବତନ୍ତ୍ର ପ୍ରବେଶିକା ପରୀକ୍ଷା ଅଗଷ୍ଟ ୧୩ରେ ଅନୁଷ୍ଠିତ ହେବ । ଏହି ପ୍ରବେଶିକା ପରୀକ୍ଷା SSB ଦ୍ବାରା ପରିଚାଳିତ ହେବ । ଏଥିପାଇଁ ଆସନ୍ତା ୮ ତାରିଖରୁ ଆବେଦନ ପ୍ରକ୍ରିୟା ଆରମ୍ଭ ହେବ । ତେବେ ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ, ଆସନ୍ତା ୮ ତାରିଖ ଅପରାହ୍ନ ୨ଟାରୁ ସାମ୍ସ ୱେବସାଇଟରେ କମନ ଆପ୍ଲିକେସନ ଫର୍ମ ଉପଲବ୍ଧ ହେବ । ଆବେଦନର ଶେଷ ତାରିଖ ଜୁଲାଇ ୧୫ ତାରିଖ ରାତି ୧୧ଟା ୪୫କୁ ଧାର୍ଯ୍ୟ କରାଯାଇଛି । ପ୍ରବେଶିକା ପରୀକ୍ଷା ଲାଗି ହଲ୍ ଟିକଟ୍ ଅଗଷ୍ଟ ୭ ଅପରାହ୍ନ ୨ଟାରୁ ୱେବସାଇଟରେ ଉପଲବ୍ଧ ହେବ ।

ପ୍ରବେଶିକା ପରୀକ୍ଷା ଅଗଷ୍ଟ ୧୩ ତାରିଖରେ ଅନୁଷ୍ଠିତ ହେବ । ଅଗଷ୍ଟ ୧୮ ତାରିଖରେ ପ୍ରବେଶିକା ପରୀକ୍ଷାର ନମ୍ବର ଏସଏସବି ପକ୍ଷରୁ ଓକାକକୁ ପ୍ରଦାନ କରାଯିବ । ଅଗଷ୍ଟ ୨୩ ତାରିଖ ଅପରାହ୍ନ ୨ଟାରେ ମେଧା ତାଲିକା ପ୍ରକାଶ ପାଇବ । ସେହିପରି ଅଗଷ୍ଟ ୨୬ ତାରିଖରେ ପ୍ରୋଭିଜନାଲ ଆଲଟମେଣ୍ଟ ସିଟ୍ ସମ୍ପର୍କରେ ତାଲିକା ପ୍ରକାଶ ପାଇବ । ମନୋନୀତ ହୋଇଥିବା ଛାତ୍ରଛାତ୍ରୀ ୨୮ ତାରିଖ ସକାଳ ୯ଟାରେ ନାମଲେଖା ଲାଗି ରିପୋର୍ଟିଂ କରିବେ ।

ସୂଚନା ଅନୁଯାୟୀ, ଏହି ଇଣ୍ଟିଗ୍ରେଟେଡ ପାଠ୍ୟକ୍ରମରେ ୩ଟି ବିଷୟକୁ ସାମିଲ କରାଯାଇଛି । ସେଥିରେ ଓଡ଼ିଆ ଲାଙ୍ଗୁଏଜ ଆଣ୍ଡ ଲିଟରେଚର, ଲିଙ୍ଗୁଇଷ୍ଟିକ ଆଣ୍ଡ ନ୍ୟାଚୁରାଲ ଲାଙ୍ଗୁଏଜ ପ୍ରୋସେସିଂ ଏବଂ ରିଜିଓନାଲ, ଟ୍ରାଇବାଲ ଲାଙ୍ଗୁଏଜ ଆଣ୍ଡ ହେରିଟେଜ ଷ୍ଟଡିଜ ବିଷୟ ରହିଛି । ତେବେ ଏହି ପ୍ରବେଶିକା ପରୀକ୍ଷା ରାଜ୍ୟର ୪ଟି ସହରରେ ପରିଚାଳିତ ହେବ । ସେହି ସହରଗୁଡିକ ହେଲା ଭୁବନେଶ୍ବର, ବ୍ରହ୍ମପୁର, ବାଲେଶ୍ବର ଏବଂ ସମ୍ବଲପୁର । ତେବେ ଏହି ସହରରେ ପ୍ରବେଶିକା ପରୀକ୍ଷା ଲାଗି ପରୀକ୍ଷା କେନ୍ଦ୍ରର ବ୍ୟବସ୍ଥା କରାଯିବ ବୋଲି ଉଚ୍ଚଶିକ୍ଷା ବିଭାଗ ପକ୍ଷରୁ ସୂଚନା ଦିଆଯାଇଛି । ତେବେ ଅଧିକ ବିବରଣୀ ପାଇଁ ଇ-ଆଡମିଶନ ହେଲ୍ପଲାଇନ (ଟୋଲ ଫ୍ରି') ନମ୍ବର 155335 / 1800-345-6770ରେ ଯୋଗାଯୋଗ କରିବା ପାଇଁ ମଧ୍ୟ ପରାମର୍ଶ ଦିଆଯାଇଛି ।

ଇଟିଭି ଭାରତ, ଭୁବନେଶ୍ବର