ଭୁବନେଶ୍ବର: ବହୁପ୍ରତୀକ୍ଷାର ଅନ୍ତ ହୋଇଛି । ଆଜିଠାରୁ ଆରମ୍ଭ ହୋଇଯାଇଛି ପଛୁଆ ବର୍ଗ ସର୍ଭେ । ସର୍ଭେର ସମସ୍ତ ପ୍ରକ୍ରିୟା ଆସନ୍ତା 27 ତାରିଖ ପର୍ଯ୍ୟନ୍ତ ଚାଲିବ । ସର୍ଭେରେ ସାମିଲ ହେବା ଲାଗି ଓବିସି ବର୍ଗର ସମସ୍ତଙ୍କୁ ଅନୁରୋଧ କରିଛନ୍ତି ରାଜ୍ୟ ସରକାର । ସର୍ଭେ ପାଇଁ ବିଭିନ୍ନ ଗାଇଡ଼ଲାଇନ ଜାରି ହୋଇଛି । ରାଜ୍ୟରେ 50 ପ୍ରତିଶତରୁ ଅଧିକ ଓବିସି ରହିଥିବାବେଳେ ସାଧାରଣ ନିର୍ବାଚନ ପୂର୍ବରୁ ଗଣନା ବିଜେଡି ନେତୃତ୍ୱାଧୀନ ଓଡିଶା ସରକାରଙ୍କ ପାଇଁ ମାଷ୍ଟରଷ୍ଟ୍ରୋକ ହେବ ବୋଲି କୁହାଯାଉଛି ।
ଅନୁସୂଚିତ ଜାତି ଓ ଜନଜାତି ମନ୍ତ୍ରୀ ଜଗନ୍ନାଥ ସାରକା କହିଛନ୍ତି ଯେ, ପଛୁଆ ବର୍ଗଙ୍କ ସାମାଜିକ ଶିକ୍ଷାଗତ ସ୍ଥିତି ଜାଣିବାକୁ ଏହି ସର୍ଭେ ହୋଇଛି । ଆଜିଠାରୁ ଆରମ୍ଭ ହୋଇଥିବା ସର୍ଭେ ଆସନ୍ତା 27 ତାରିଖ ଯାଏଁ ଚାଲିବ । ସମସ୍ତ ଓବିସି ଭାଇ ଓ ଭଉଣୀମାନେ ସାମିଲ ହେବା ଲାଗି ସରକାରଙ୍କ ପକ୍ଷରୁ ଅନୁରୋଧ କରାଯାଇଛି । ଅଙ୍ଗନବାଡ଼ି କେନ୍ଦ୍ର ଓ ଅନ୍ୟ ସର୍ଭେ ସେଣ୍ଟରରେ ତଥ୍ୟ ଦାଖଲ କରିବାକୁ ମନ୍ତ୍ରୀ ଅନୁରୋଧ କରିଛନ୍ତି । କିଏ କ’ଣ ଅଭିଯୋଗ କଲେ ସେଥିରେ କିଛି ନାହିଁ ବୋଲି ମନ୍ତ୍ରୀ କହିଛନ୍ତି ।
2021 ମେ ମାସରେ ପଛୁଆ ବର୍ଗ ସର୍ଭେ ପାଇଁ ଘୋଷଣା ହୋଇଥିଲା । କୋଭିଡ଼ ସଂକ୍ରମଣ ଲାଗି ସେତେବେଳେ ଗଣନା ସ୍ଥଗିତ ରଖାଯାଇଥିଲା । ସର୍ଭେ ଲାଗି ବିଭିନ୍ନ ଗାଇଡ଼ ଲାଇନ ଜାରି କରାଯାଇଛି । ସର୍ଭେ ମାଧ୍ୟମରେ ରାଜ୍ୟର 30ଟି ଜିଲ୍ଲାର 314 ବ୍ଲକ ଓ 114 ପୌରାଞ୍ଚଳରେ ପଛୁଆ ବର୍ଗଙ୍କ ସାମାଜିକ ଓ ଅର୍ଥନୈତିକ ସ୍ଥିତିର ସମୀକ୍ଷା ହେବ । ଜିଲ୍ଲାପାଳ ଓ ମହାନଗର କମିଶନର ସର୍ଭେ କାର୍ଯ୍ୟ ତଦାରଖ କରିବେ । 6 ଜଣ ଅତିରିକ୍ତ ସଚିବ ପାହ୍ୟାର ଅଫିସରଙ୍କୁ 30 ଜିଲ୍ଲାର ଜୋନାଲ ଅଫିସର ଦାୟିତ୍ୱ ଦିଆଯାଇଛି ।