ଭୁବନେଶ୍ବର: ନବ ଦାସ ହତ୍ୟାକାଣ୍ଡ ଓ ଗୋବିନ୍ଦ ସାହୁ ପ୍ରସଙ୍ଗରେ ଆଲୋଚନା କରିବାକୁ ଡରୁଛନ୍ତି ରାଜ୍ୟ ସରକାର। ସରକାରୀ ଦଳ ହୋହଲ୍ଲା କରି ଗୃହକୁ ଅଚଳ କରିବା ଦୁର୍ଭାଗ୍ୟଜନକ। ଗଣତନ୍ତ୍ର ପାଇଁ ଏହା ବିପଦ। ବିରୋଧୀଙ୍କୁ ଗୃହରେ କୁହାଇଦେଲେ ନାହିଁ। ସର୍ବଦଳୀୟ ବୈଠକରେ ନିଷ୍ପତ୍ତି ହୋଇଥିଲା ଶୂନ୍ୟକାଳରେ ବିରୋଧୀ ଦଳନେତାଙ୍କ ପରେ କଂଗ୍ରେସ ବିଧାୟକ ଦଳ ନେତାଙ୍କୁ କହିବାକୁ ସୁଯୋଗ ଦିଆଯିବ । କିନ୍ତୁ ତାହା ଉଲ୍ଲଙ୍ଘନ ହୋଇଛି । ଆଜି ବିଧାନସଭା ଅଚଳ ହେବା ପରେ ଏଭଳି ରାଜ୍ୟ ସରକାରଙ୍କ ବିରୋଧରେ ବର୍ଷିଛନ୍ତି କଂଗ୍ରେସ ବିଧାୟକ ଦଳନେତା ନରସିଂହ ମିଶ୍ର ।
ନରସିଂହ ମିଶ୍ର ଅଭିଯୋଗ କରିଛନ୍ତି, ସରକାରୀ ଦଳ ଓ ସରକାର ଗଣତନ୍ତ୍ର ଉପରେ ବିଶ୍ବାସ କରନ୍ତି ନାହିଁ । ବିଧାନସଭାରେ ପ୍ରଶ୍ନ କଲେ ସିଧା ସଳଖ ଉତ୍ତର ନଦେଇ ଅଥବା ବୁଲାଇ ବଙ୍କାଇ ଉତ୍ତର ଦେଉଛନ୍ତି । ଗତକାଲି ମୁଁ ପ୍ରଶ୍ନ କରିଥିଲି ଯେ ହାଇକୋର୍ଟ ନ୍ୟାୟିକ ନିର୍ଦ୍ଦେଶନାମାରେ ହେଉ କି ପ୍ରଶାସନିକ ନିର୍ଦ୍ଦେଶନାମାରେ ନିର୍ଦ୍ଦେଶ ଦେଇପାରିବେ କି ନବ ଦାସ ହତ୍ୟାକାଣ୍ଡ ମାମଲାର ତଦନ୍ତ ତଦାରଖ ଅବସରପ୍ରାପ୍ତ ବିଚାରପତି କରିପାରିବେ । ଏହା ଆଇନସଂଗତ କି? ଏହାର ଉତ୍ତର ରାଜ୍ୟ ସରକାର ସିଧା ସଳଖ ହଁ କିମ୍ବା ନା’ ରେ ଦେଇପାରିଥାନ୍ତେ । କିନ୍ତୁ ଉତ୍ତର ଦେବାର ସତସାହାସ ସରକାରଙ୍କର ନାହିଁ । ବୁଲାଇ ବଙ୍କାଇ ଉତ୍ତର ଦେଲେ ।
ଏହାବି ପଢନ୍ତୁ- NAC Elections: ଏପ୍ରିଲ 3 ରେ ଅତାବିରା ଓ ହିନ୍ଦୋଳ ଏନଏସି ନିର୍ବାଚନ
ନରସିଂହ କହିଛନ୍ତି ରାଜ୍ୟସରକାର ଉତ୍ତର ପ୍ରଦେଶ ଖେରୀର ଉଦାହରଣ ଦେଇ ପରମ୍ପରା ନାଁରେ ଖସିବାକୁ ଚେଷ୍ଟା କରୁଛନ୍ତି। ନବ ଦାସ ହତ୍ୟା ଘଟଣାରେ ସରକାର ଯେଉଁ ଉତ୍ତର ରଖିଛନ୍ତି ଏଥିରୁ ସ୍ପଷ୍ଟ ଜଣାପଡୁଛି କାର୍ଯ୍ୟ ଠିକ ଭାବେ ଚାଲୁ ନାହିଁ। ଗୃହ ରାଷ୍ଟ୍ର ମନ୍ତ୍ରୀ ଉତ୍ତର ରଖିଲା ବେଳେ କହିଲେ ତଦନ୍ତ କରି ସଂସ୍ଥା ପ୍ରତ୍ୟକ୍ଷଦର୍ଶୀକୁ ଜେରା କରିଛି । ଯଦି ପ୍ରତ୍ୟେକ୍ଷଦର୍ଶୀଙ୍କୁ ଜେରା ହୋଇଛି, କିଏ ସେହି ପ୍ରତ୍ୟେକ୍ଷଦର୍ଶୀ । ସେ କଣ ଦେଖିଛନ୍ତି? ଏବଂ ଷଡଯନ୍ତ୍ର ଦିଗକୁ ତଦନ୍ତ କରାଯାଉଛି। ଯଦି ଷଡଯନ୍ତ୍ର ଦିଗକୁ ତଦନ୍ତ କରୁଛନ୍ତି। କେଉଁମାନେ ସନ୍ଦେହ ଘେରକୁ ଆସିଛନ୍ତି? ତାଙ୍କ ନାଁ କହିବାକୁ ଡରୁଛନ୍ତି କାହିଁକି? ବିରୋଧୀ ଦେଳ ପକ୍ଷରୁ ଯେଉଁ କିଛି ଲୋକଙ୍କ ନା କୁହାଯାଉଛି ସେମାନେ ନୁହେଁ ତ? । ସେହି ସନ୍ଦେହ ଅଧିକ ଘନୀଭୂତ ହେଉଛି।