ଭୁବନେଶ୍ବର:ରାଜଧାନୀରେ ଆତଙ୍କ ମଚାଇଲେ ଲୁଟେରା । କି ଦିନ କି ରାତି ମଉକା ଦେଖିଲେ ଚଉକା ମାରୁଛନ୍ତି ଲୁଟେରା । ଟାର୍ଗେଟରେ ବରିଷ୍ଠ ନାଗରିକ । ସ୍ପଷ୍ଟ ଦିବାଲୋକରେ ଅବସର ପ୍ରାପ୍ତ ଡାକ୍ତର ଦମ୍ପତିଙ୍କ ଘରେ କଳାକନା ବୁଲାଇଲେ ଦୁର୍ବୃତ୍ତ । ଦମ୍ପତି ମର୍ଣ୍ଣିଂ ଓ୍ବାକ୍ରେ ଯାଇଥିବା ବେଳେ ସୁନା ଗହଣା ଓ 15ହଜାର ନଗଦ ଟଙ୍କା ନେଇ ଛୁ ମାରିଛନ୍ତି ଲୁଟେରା । ଏଭଳି ଘଟଣା ଘଟିଛି ନିଳାଦ୍ରୀ ବିହାରରେ । ଏନେଇ ଚନ୍ଦ୍ରଶେଖରପୁର ଥାନାରେ ଅଭିଯୋଗ ପରେ ପୋଲିସ ପହଞ୍ଚି ଆରମ୍ଭ କରିଛି ତନାଘନା । ଗତକାଲି ସକାଳ 9ଟା ସମୟରେ ଦମ୍ପତିଙ୍କ ଘରେ ପସି ଲୁଟ କରିଥିଲେ ଲୁଟେରା ।
ମିଳିଥିବା ସୁଚନା ଅନୁଯାୟୀ, ଅବସରପ୍ରାପ୍ତ ଡାକ୍ତର ଦମ୍ପତି ନିଳାଦ୍ରୀ ବିହାରରେ ରୁହନ୍ତି । ଗତକାଲି ସକାଳ ପ୍ରାୟ 9ଟା ସମୟରେ ଉଭୟ ଫିଜିଓଥେରାପି ପାଇଁ ଯାଇଥିଲେ । ପତ୍ନୀଙ୍କୁ ଫିଜିଓଥେରାପି ସେଣ୍ଟରରେ ଛାଡ଼ି ଘରେ ଆସି ପହଞ୍ଚି ମର୍ଣ୍ଣିଂ ଓ୍ବାକ୍ ପାଇଁ ବାହାରିଯାଇଥିଲେ ତାଙ୍କ ସ୍ବାମୀ । ଏହି ସମୟରେ ସୁଯୋଗର ହାତ ଛଡ଼ା ନକରି ଘରେ ପଶି ଲୁଟ କରିଥିଲେ ଲୁଟେରା । ଦିନ11ଟା ସମୟରେ ଘରକୁ ଆସି ଦେଖନ୍ତି ତ ଗ୍ରିଲ ତଡ଼ା ହୋଇଛି । ଏବଂ କିଛି ଦୁର୍ବୃତ୍ତ ଘରେ ପଶି ଲୁଟ୍ ଅପରେସନ ଚଳାଇଛନ୍ତି । ଘରେ ପତ୍ନୀ ଥିବା ଭାବି ଅବସରପ୍ରାପ୍ତ ଡାକ୍ତର ଡାକ ପକାଇଥିଲେ । ଏହି ସମୟରେ କିଛି ପୁଅ ପିଲା ପାଟି ଶୁଭିଲା, ଏହାପରେ ସେମାନେ ଘରର ମେନ ଡୋର ଦେଇ ଦୌଡି ପଳାଇଥିଲେ ।
ଅବସରପ୍ରାପ୍ତ ଡାକ୍ତର ଘର ଭିତରକୁ ଯାଇ ଦେଖିଲା ବେଳକୁ ସୁନା ଗହଣା ଓ ଟଙ୍କା ଲୁଟ ହୋଇଥିବା ଜାଣିବାକୁ ପାଇଥିଲେ । ଅବସରପ୍ରାପ୍ତ ଡାକ୍ତରାଣୀ ପୁରୋରମା ପ୍ରଧାନଙ୍କ କହିବା ମୁତାବକ, ଘରେ ତାଙ୍କର 10ରୁ 12ଟି ପର୍ସ ରହିଛି ସବୁ ଥିରେ କିଛି କିଛି ଟଙ୍କା ଥାଏ । ତେବେ ସବୁ ପର୍ସ ଖେଳାଇ ପାଖାପାଖି 15ହଜାର ନଗଦ ଟଙ୍କା ନେଇଛନ୍ତି । ସେହିପରି ଘରର ଆଲମାରୀ ତାଡି ତିନୋଟି ସୁନାହାର, 6 ହଳ ସୁନା କାନଫୁଲ ଓ ହାତ ଚୁଡି ସମେତ ମୋଟ 4ଭରି ଗହଣା ଲୁଟି ନେଇଛନ୍ତି । ସ୍ପଷ୍ଟ ଦିବାଲୋକରେ ଏପରି ଲୁଟପାଟ ହେବ ତାହା ଜମାବି ବିଶ୍ବାସ କରିହେଉନି ବୋଲି କହିଛନ୍ତି ।
ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଭୁବନେଶ୍ୱର ଡିସିପି ସମେତ ସାଇଣ୍ଟିଫିକ୍ ଟିମ୍ ଘଟଣାର ତଦନ୍ତ କରୁଛନ୍ତି । ପୋଲିସର ସୁଚନା ମୁତାବକ, କିଛି ପେସାଦାର ଲୁଟେରା ଲୁଟ କରିଥାଇ ପାରନ୍ତି ବୋଲି ସନ୍ଦେହ କରାଯାଉଛି। ଏମାନେ ଏପରି ମୋକା ଦେଖି ବୃଦ୍ଧ ଦମ୍ପତିଙ୍କୁ ଲକ୍ଷ କରି ଏକୁଟିଆ ନଥିବା ସମୟରେ ଲୁଟପାଟ କରିଛନ୍ତି। ରାଜଧାନୀରେ ଗୋଟିଏ ପରେ ଗୋଟିଏ ଲୁଟପାଟ ଘଟଣା ପୋଲିସର ଚିନ୍ତା ବଢ଼ାଇଛି। ତେବେ ଅନୁରୂପ ଭାବେ କ୍ୟାପିଟାଲ ଥାନା 6ନମ୍ବର ଅଞ୍ଚଳରେ ଥିବା ସରକାରୀ କ୍ବାଟରରୁ ଚୋରି ଘଟଣାରେ ପୋଲିସ 3ଜଣିଆ ଗ୍ୟାଙ୍ଗକୁ ଗିରଫ କରିଛି । ସେମାନଙ୍କଠୁ ଚୋରି ସାମଗ୍ରୀ ସମେତ ତିନୋଟି ବାଇକ ଓ ନଗଦ ଟଙ୍କା ସହ ଚୋରି ପାଇଁ ବ୍ୟବହୃତ ସରଞ୍ଜାମ ଜବତ କରିଛି ପୋଲିସ । ଗିରଫ ଅଭିଯୁକ୍ତ ହେଲେ ପପୁ, ପିଙ୍କୁ ଓ ଦିଲୁ । ସେମାନଙ୍କୁ କୋର୍ଟ ଚାଲାଣ କରାଯାଇଥିବା ପୋଲିସ କହିଛି ।
ଇଟିଭି ଭାରତ, ଭୁବନେଶ୍ବର
