'ଦୁର୍ବଳ ହୋଇଗଲେଣି ନବୀନ, ଅଯଥାରେ 5T ସଚିବକୁ କରୁଛନ୍ତି ଡିଫେଣ୍ଡ' ଭୁବନେଶ୍ବର:ଦୁର୍ବଳ ହୋଇଗଲେଣି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଜିଲ୍ଲା ଗସ୍ତକୁ ନେଇ ଗୃହରେ ମୁଖ୍ୟମନ୍ତ୍ରୀ ରଖିଥିବା ଜବାବରୁ ଏହା ଅନୁଭବ ହେଉଛି । ମୁଖ୍ୟମନ୍ତ୍ରୀ ଯାହା କହିବେ ତାହା ବେଦର ଗାର ନୁହେଁ । ଏମିତି କଡା ଭାଷାରେ ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିଛନ୍ତି ତାଙ୍କର ପୂର୍ବତନ ସହଯୋଗୀ ପ୍ରଦୀପ ପାଣିଗ୍ରାହୀ । ବିଧାନସଭା ମୌସୁମୀ ଅଧିବେଶନର 2ୟ ଦିନରେ 5ଟି ସଚିବଙ୍କ ଜିଲ୍ଲା ଗସ୍ତକୁ ନେଇ ବିରୋଧୀଙ୍କ ପ୍ରଶ୍ନର ଉତ୍ତର ରଖି ମୁଖ୍ୟମନ୍ତ୍ରୀ ନବୀନ ଉତ୍ତର ରଖିବା ପରେ ଏପରି ପ୍ରତିକ୍ରିୟା ରଖିଛନ୍ତି ପ୍ରଦୀପ ।
ଏ ନେଇ ପ୍ରଦୀପ କହିଛନ୍ତି, "ସବୁବେଳେ, ସବୁ ଆଡେ ପ୍ରଚାର ହେଉଛି 5ଟି ସଚିବ ଗସ୍ତ କରୁଛନ୍ତି । ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରତିକ୍ରିୟା ରଖିଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ବା CMO ଜିଲ୍ଲା ଗସ୍ତ କରୁଛି ବୋଲି ସେ କହିଛନ୍ତି । ତାଙ୍କ ବ୍ୟକ୍ତିଗତ ସଚିବ ଗସ୍ତ କରୁଛନ୍ତି ବୋଲି ସେ କହିନାହାନ୍ତି । ଅଭିଯୋଗ ଶୁଣାଣି କରିବା କଥା ମୁଖ୍ୟମନ୍ତ୍ରୀ କହିଛନ୍ତି । କିନ୍ତୁ ସେଠାରେ 5ଟି ଟି - ସାର୍ଟ ପିନ୍ଧି ଲୋକ ବୁଲୁଛନ୍ତି । କେଉଁଠି ସିଏମଓ ଟି-ସାର୍ଟ ପିନ୍ଧା ଲୋକ ଦେଖିବାକୁ ମିଳନ୍ତି ନାହିଁ । ମୁଖ୍ୟମନ୍ତ୍ରୀ ଗତକାଲି ଯେଉଁ ଉତ୍ତର ରଖିଛନ୍ତି, ସେ ନିଜେ ନିଜକୁ ଦୁର୍ବଳ କରିଦେଲେଣି ବୋଲି ଅନୁଭବ ହେଉଛି । ସେ ଫିଟ ଅଛନ୍ତି ।"
ଏହା ବି ପଢନ୍ତୁ- ବିଧାନସଭାରେ ମୁଖ୍ୟମନ୍ତ୍ରୀଙ୍କ ବିବୃତ୍ତି, ରାଜନୈତିକ ଉଦ୍ଦେଶ୍ୟ ରଖି ବିରୋଧ କରୁଛନ୍ତି ବିରୋଧୀ
ସେ ଆହୁରି ମଧ୍ୟ କହିଛନ୍ତି, "କୋଭିଡ ପରେ ଯେଉଁ ଅଭିଯୋଗ ଶୁଣାଣି କଥା କହୁଛନ୍ତି, ଆଗରୁ ସେ କଥା ସ୍ପଷ୍ଟ କଲେନି । ବୁଲିବା ଯେତେବେଳେ ଆରମ୍ଭ ହେଲା ସେତେବେଳେ ମୁଖ୍ୟମନ୍ତ୍ରୀ କାର୍ଯ୍ୟାଳୟରୁ ବିଜ୍ଞପ୍ତି ପ୍ରକାଶ କରିଥାନ୍ତେ । କହିଥାନ୍ତେ ମୁଁ ମୋ 5ଟି ସଚିବକୁ ଅଭିଯୋଗ ଶୁଣାଣି ପାଇଁ ପଠାଇଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କେବଳ ଜଣେ ଅଧିକାରୀଙ୍କୁ ନେଇ ଗଠନ ହୋଇଛି କି ବୋଲି ବିରୋଧୀ ଦଳ ନେତା ଉଠାଉଥିବା ପ୍ରସଙ୍ଗ ତାହାକୁ ମୁଁ ସମର୍ଥନ କରୁଛି । ଠିକ ପ୍ରସଙ୍ଗ ସେ ଉଠାଇଛନ୍ତି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ପ୍ରମୁଖ ଶାସନ ସଚିବ କିଏ ? କେବଳ କଣ ଜଣେ ସଚିବଙ୍କୁ ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କି ? ଭିନିଲ କ୍ରିଷ୍ଣା, ରୁପା ରୋଷଣ ସାହୁ, ଡିଏସ୍ କୁଟେ ଅଛନ୍ତି । ସେମାନେ କଣ ଯୋଗ୍ୟ ନୁହଁନ୍ତି କି ? ସେମାନଙ୍କୁ କାହିଁକି ପଠାଯାଉନାହିଁ ?
ଏହା ବି ପଢନ୍ତୁ- Assembly Monsoon Session: ମୁଖ୍ୟମନ୍ତ୍ରୀଙ୍କ ପାଲଟା ପ୍ରଶ୍ନ, ଲୋକଙ୍କ ପାଖକୁ ଯାଇ ସମସ୍ୟା ବୁଝିଲେ ଅସୁବିଧା କେଉଁଠି ?
କେବଳ ଏହି ଜଣେ ଯୋଗ୍ୟ ବ୍ୟକ୍ତି ଅଛନ୍ତି । ମୁଖ୍ୟମନ୍ତ୍ରୀଙ୍କ ଗତକାଲି ଉତ୍ତର ସନ୍ଦେହ ଘେରରେ ଅଛି । ମୁଖ୍ୟମନ୍ତ୍ରୀ ଅଯଥାରେ ତାଙ୍କ ବ୍ୟକ୍ତିଗତ ସଚିବକୁ ଡିଫେଣ୍ଡ କରୁଛନ୍ତି । ମୁଖ୍ୟମନ୍ତ୍ରୀ ଏହା ଉଚିତ ବୋଲି ଭାବୁଛନ୍ତି । ଓଡିଆ ଲୋକ ଭକୁଆ ନୁହଁନ୍ତି । ଅଜଣା ବି ନୁହଁନ୍ତି । ଆଜିର ଦିନରେ ସମସ୍ତେ ସଚେତନ ହେଲେଣି । ମୁଖ୍ୟମନ୍ତ୍ରୀଙ୍କୁ ସେମାନେ ବହୁମତ ଦେଇଛନ୍ତି । ଏହାର ଅର୍ଥ କଦାପି ନୁହେଁ ଯେ, ମୁଖ୍ୟମନ୍ତ୍ରୀ ଯାହା କହିବେ ତାହା ବେଦର ଗାର । ରୁକ ବେଦ ନା ଯଦୁର ବେଦ ହୋଇଛି ସେ ଯାହା କହିବେ ବେଦର ଗାର ହୋଇଯିବ । କେବଳ ଗୋଟିଏ ସଚିବ ନାଁ ଉଠୁଛି । ଆଉ କାହା ନାଁ ଆସୁନାହିଁ ବୋଲି କହିଛନ୍ତି ପ୍ରଦୀପ ।
ଇଟିଭି ଭାରତ, ଭୁବନେଶ୍ବର
