ଖୋର୍ଦ୍ଧା:ଶୀତ ଦିନେ ପକ୍ଷୀଙ୍କ ପାଇଁ ଭୂସ୍ବର୍ଗ ପାଲଟିଥାଏ ଚିଲିକା । ଯେଉଁଥିପାଇଁ ଶୀତର ଆଗମନରେ ଭଳିକି ଭଳି ରଙ୍ଗ ବେରଙ୍ଗର ବିଦେଶୀ ପକ୍ଷୀ ଏଠାକୁ ଆସିଥାନ୍ତି । ସୁଦୂର ସାଇବେରିଆ, ମଙ୍ଗୋଲିଆ, ଅଷ୍ଟ୍ରେଲିଆ, ଇଟାଲୀ, ଇରାନ, ରୁଷିଆ ଆଦି ରାଷ୍ଟ୍ରରୁ ହଜାର ହଜାର ମାଇଲ ଅତିକ୍ରମ କରି ଖାଦ୍ୟ ଅନ୍ୱେଷଣରେ ଛୁଟି ଆସିଥାନ୍ତି ବିଭିନ୍ନ ପ୍ରଜାତିର ପକ୍ଷୀ । ଶୀତ ଆରମ୍ଭ ହୋଇଯାଇଥିବାବେଳେ ଏସିଆ ମହାଦେଶର ସର୍ବବୃହତ ଲବଣ ହ୍ରଦ ଚିଲିକା ତଟବର୍ତ୍ତୀ ମଙ୍ଗଳାଯୋଡିକୁ ବିଦେଶାଗତ ଅତିଥି ପକ୍ଷୀଙ୍କ ସମାଗମ ଦେଖିବାକୁ ମିଳିଲାଣି।
ନୀଳାମ୍ବୁ ଚିଲିକା ଏବେ ପାଲଟି ଯାଇଛି ବିଦେଶାଗତ ପକ୍ଷୀଙ୍କ ତୀର୍ଥସ୍ଥଳ । ପ୍ରାକୃତିକ ସୌନ୍ଦର୍ଯ୍ୟର ଗନ୍ତାଘର ଚିଲିକାକୁ ଚଳିତ ବର୍ଷ ଅକ୍ଟୋବର ପହିଲାରୁ ବିଦେଶାଗତ ପକ୍ଷୀଙ୍କ ସୁଅ ଛୁଟିବା ଆରମ୍ଭ ହୋଇଛି । ମଙ୍ଗଳାଯୋଡିରେରେ ଶୀତ ଦିନେ ପ୍ରାୟ 160ରୁ ଊର୍ଦ୍ଧ୍ବ ପ୍ରଜାତିର ଲକ୍ଷ ଲକ୍ଷ ପକ୍ଷୀଙ୍କ ସମାଗମ ହେଉଥିବାବେଳେ ବର୍ତ୍ତମାନ ସୁଦ୍ଧା ମଙ୍ଗଳାଯୋଡିକୁ 85 ପ୍ରଜାତିର 1 ଲକ୍ଷ 13ହଜାର ପକ୍ଷୀଙ୍କ ଆଗମନ ହୋଇଥିବା ଆକଳନ କରାଯାଉଛି । ତେବେ ମଙ୍ଗଳାଯୋଡିର ଏହି ଅପରୂପ ସୌନ୍ଦର୍ଯ୍ୟକୁ ଦେଖି ବେଶ ଉପଭୋଗ କରୁଥିବା କହିଛନ୍ତି ପର୍ଯ୍ୟଟକ ।
ପକ୍ଷୀଙ୍କ ଆଗମନ ହେତୁ ଶିକାରୀଙ୍କ ପ୍ରତି କଡା ପଦକ୍ଷେପ ଗ୍ରହଣ ନିମନ୍ତେ ଟାଙ୍ଗି ବନ୍ୟପ୍ରାଣୀ ବିଭାଗ ପକ୍ଷରୁ ତତ୍ପରତା ପ୍ରକାଶ ପାଇଛି । ପକ୍ଷୀଙ୍କ ସୁରକ୍ଷା ନିମନ୍ତେ ବନ୍ୟପ୍ରାଣୀ ପକ୍ଷରୁ 11ଟି କ୍ୟାମ୍ପ ଗଠନ କରାଯାଇଛି । ପ୍ରତି କ୍ୟାମ୍ପରେ ଜଣେ ବନରକ୍ଷୀ ଏବଂ 3ରୁ 4ଜଣ ସୁରକ୍ଷା କର୍ମଚାରୀ ନିୟୋଜିତ ହୋଇଛନ୍ତି । ସେହିପରି ବାଲୁଗାଁ ରେଞ୍ଜ ଅଧୀନ ନଳବଣରେ 4ଟି, ସାତପଡ଼ାରେ 2ଟି ,ରମ୍ଭାରେ 2ଟି ଏବଂ ଚିଲିକା ରେଞ୍ଜରେ ପକ୍ଷୀଙ୍କ ଗତିବିଧିକୁ ଅନୁଧ୍ୟାନ କରିବା ସହ ଶିକାରୀଙ୍କ ଉପରେ କଡ଼ା ନଜର ରଖାଯାଉଛି ।
ଏହା ବି ପଢନ୍ତୁ...ପକ୍ଷୀଙ୍କ ଭୂସ୍ବର୍ଗ ମଙ୍ଗଳାଯୋଡି, ସୌନ୍ଦର୍ଯ୍ୟ ବଢାଉଛି ବିଦେଶୀ ଅତିଥିଙ୍କ ଆଗମନ