ଭୁବନେଶ୍ବର:ଦୁବାଇରେ ଆୟୋଜିତ ହୋଇଥିବା ଓଡ଼ିଆ ଚଳଚ୍ଚିତ୍ର ସମ୍ମାନ ପୁରସ୍କାର ପାଇ ଭୁବନେଶ୍ବର ଫେରିଛନ୍ତି ଓଲିଉଡ କଳାକାର । ପ୍ରଥମ ଥର ପାଇଁ ସେଠାରେ ଆୟୋଜିତ ହୋଇଥିବା ଏହି ଆୱାର୍ଡ ଶୋ'ରେ ବରିଷ୍ଠ ଅଭିନେତା ପ୍ରଶାନ୍ତ ନନ୍ଦଙ୍କୁ ଜୀବନବ୍ୟାପୀ ସାଧନା ସମ୍ମାନ ପ୍ରଦାନ କରାଯାଇଛି । ଏଥିସହ ଓଲିଉଡ ଲୋକପ୍ରିୟ ଅଭିନେତା ସବ୍ୟସାଚୀ ମିଶ୍ରଙ୍କୁ ଶ୍ରେଷ୍ଠ ଅଭିନେତା ପୁରସ୍କାର ପ୍ରଦାନ କରାଯାଇଥିବା ବେଳେ ଅଭିନେତ୍ରୀ ଶିବାନୀ ଶ୍ରେଷ୍ଠ ଅଭିନେତ୍ରୀ ପୁରସ୍କାର ନିଜ ନାଁରେ କରିଛନ୍ତି ।
ଆର୍ ଆର୍ ଇଭେଣ୍ଟ, ସିନେ ପ୍ରଡକ୍ସନ ଆସୋସିଏସନ୍ ଓ ୟୁଏଇ ଓଡ଼ିଆ ସମାଜ ପକ୍ଷରୁ ଆୟୋଜିତ ହୋଇଥିଲା ପ୍ରଥମ ମେଗା ଓଡିଆ ଫାଇବ୍ ଷ୍ଟାର ଫିଲ୍ମ ଆୱାର୍ଡସ୍ । ଯେଉଁଥିରେ ଅନେକ ଅଭିନେତା, ଅଭିନେତ୍ରୀ, ସଂଗୀତ ନିର୍ଦ୍ଦେଶକ, ଫିଲ୍ମ ନିର୍ଦ୍ଦେଶକ ଓ ପ୍ରଡ୍ୟୁସରମାନଙ୍କ ସହ ଅନେକ ଟେକ୍ନିସିଆନ ଯୋଗ ଦେଇଥିଲେ । ଚଳଚ୍ଚିତ୍ର 'ପୁଷ୍କରା' ପାଇଁ ସବ୍ୟସାଚୀ ମିଶ୍ରଙ୍କୁ ଶ୍ରେଷ୍ଠ ଅଭିନତା ସମ୍ମାନରେ ସମ୍ମାନିତ କରାଯାଇଛି । ଅଭିନେତ୍ରୀ ଶିବାନୀ ସଙ୍ଗୀତା ଫିଲ୍ମ 'ମାଲ୍ୟଗିରି'ରେ ନିଜ ଦମଦାର ଅଭିନୟ ପାଇଁ ଶ୍ରେଷ୍ଠ ଅଭିନେତ୍ରୀ ପୁରସ୍କାର ହାତେଇଛନ୍ତି ।
ଏହି ଫାଇଭ ଷ୍ଟାର ଫିଲ୍ମ ଆୱାର୍ଡ ୨୦୨୪ କାର୍ଯ୍ୟକ୍ରମ ଦୁବାଇର ସେକ୍ ରସିଦ ଅଡିଟୋରିୟମରେ ଏକ ରଙ୍ଗାରଙ୍ଗ କାର୍ଯ୍ୟକ୍ରମ ସହ ଅନୁଷ୍ଠିତ ହୋଇଥିଲା । ହଲିଉଡ ଓ ବଲିଉଡ ଷ୍ଟାରଙ୍କ ଗହଣରେ ଏହି ଆୱାର୍ଡ ଶୋ' ଏକ ଇତିହାସ ସୃଷ୍ଟି କରିଛି । ବର୍ତ୍ତମାନ ଦୁବାଇରୁ ନିଆରା ଅନୁଭୂତି ସହ ଭୁବନେଶ୍ବର ଫେରିବା ପରେ ସମସ୍ତ କଳାକାର ବେଶ ଉତ୍ସାହିତ ଥିବା ସହ ଖୁସି ବ୍ୟକ୍ତ କରିଛନ୍ତି । ଏଥିସହ ଏଭଳି କାର୍ଯ୍ୟକ୍ରମ ଦେଶ ଓ ଦେଶ ବାହାରେ ହେବା ଦ୍ୱାରା ଆମ କଳା ସଂସ୍କୃତି ଓ ଭାଷାର ପ୍ରଚାର ପ୍ରସାର ହୋଇପାରିବ ବୋଲି କଳାକାରମାନେ କହିଛନ୍ତି ।
ଦୁବାଇରେ ବସବାସ କରୁଥିବା ତଥା କାମ କରୁଥିବା ଓଡ଼ିଆମାନଙ୍କ ସହ ଓଡ଼ିଆ ସିନେପ୍ରେମୀମାନେ ଏହି ଚଳଚ୍ଚିତ୍ର ସମ୍ମାନ ପୁରସ୍କାର କାର୍ଯ୍ୟକ୍ରମରେ ଯୋଗ ଦେଇଥିଲେ । ଏହି ସମୟରେ ନିଜ ମାଟିର କଳାକାରଙ୍କୁ ଦେଖି ପ୍ରବାସୀ ଓଡ଼ିଆମାନେ ଯେତିକି ଖୁସି ହୋଇଥିଲେ କଳାକାରମାନେ ବି ବିଦେଶ ମାଟିରେ ଓଡ଼ିଶାର କଳା ସଂସ୍କୃତିକୁ ପ୍ରଦର୍ଶିତ କରି ସେତିକି ଖୁସି ହୋଇଥିଲେ ବୋଲି ପ୍ରତିକ୍ରିୟା ଦେଇଛନ୍ତି ।