ଫନି ମାଡରେ ଛାରଖାର ଗଡ଼ହଳଦିଆ ରାଜବାଟୀ

ସାମୁଦ୍ରିକ ଝଡ ଫନିର ତାଣ୍ଡବରେ ଦୋହଲିଯାଇଛି ସାରା ଓଡିଶା। ବଦଳିଯାଇଛି ଖୋର୍ଦ୍ଧା ଜିଲ୍ଲାର ଚିତ୍ର । ଏଥିରୁ ବାଦ ପଡିନି ଖୋର୍ଦ୍ଧା ରାଜବାଟୀ। ବାତ୍ୟା ଫନିର ତାଣ୍ଡବରେ କ୍ଷତିଗ୍ରସ୍ତ ହୋଇଛି ରାଜବାଟୀ ଏବଂ ଇଷ୍ଟ ଦେବଙ୍କ ମନ୍ଦିର ।

ଖୋର୍ଦ୍ଧା : ପ୍ରକୃତି ରଚିଥିବା ବାତ୍ୟା ଫନିର କରାଳ ରୂପରେ ଛାରଖାର ହୋଇଯାଇଛି ଖୋର୍ଦ୍ଧା । କେଉଁଠି ବଡ଼ ବଡ଼ ଗଛ ମାଟି କାମୁଡି ପଡିରହିଛି ତ ଆଉ କେଉଁଠି ଚାଳ ଘରର ଛପର ଉଡିଯାଇଛି । ତେବେ ଫନିର ତାଣ୍ଡବରୁ ବାଦ ପଡିନି ଶହଶହ ବର୍ଷ ତଳର ରାଜବାଟୀ ।

ଆମେ କହୁଛୁ ଖୋର୍ଦ୍ଧା ଉପକଣ୍ଠ ଗଡ଼ହଳଦିଆର ରାଜବାଟୀ ବିଷୟରେ । 1838 ମସିହାରେ ଏହି ରାଜବାଟୀ ନିର୍ମାଣ ହୋଇଥିବାବେଳେ ଫନି ମାଡରେ ଏହା ନଷ୍ଟ ହୋଇଯାଇଛି ।

କ୍ଷତିଗ୍ରସ୍ତ ହୋଇଛି ରାଜବାଟୀ ସହ ରାଜାଙ୍କ ଇଷ୍ଟ ଦେବଙ୍କ ମନ୍ଦିର । ଫନିକୁ 17 ଦିନ ବିତିଯିବା ପରେ ମଧ୍ୟ ସୁଧୁରି ପାରୁନି ପରିସ୍ଥିତି । ରାଜବାଟୀ ଉପରେ ଏବେବି ପଡି ରହିଛି ଉପୁଡି ପଡିଥିବା ଗଛ ।

ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ