ଭୁବନେଶ୍ବର: ଲାଞ୍ଚ ନେବା ପଡିଲା ମହଙ୍ଗା । ଭିଜିଲାନ୍ସ ଜାଲରେ ଫସିଲେ ଲାଞ୍ଚୁଆ ପୋଲିସ ବାବୁ । ଲାଞ୍ଚ ନେଉଥିବା ବେଳେ ରେଡ ହ୍ୟାଣ୍ଡେଡ ଧରିଲା ଭିଜିଲାନ୍ସ । ସୂଚନା ମୁତାବିକ ଲାଞ୍ଚ ନେଉଥିବା ପୋଲିସ ବାବୁ ଜଣଙ୍କ ହେଲେ ଭୁବନେଶ୍ୱରର ଖଣ୍ଡଗିରି ଥାନାରେ ସବ-ଇନସ୍ପେକ୍ଟର ସୁଶାନ୍ତ ସ୍ବାଇଁ । ତେବେ ସୁଶାନ୍ତ ସ୍ବାଇଁ ଖଣ୍ଡଗିରି ଅଞ୍ଚଳର ନାକା ଗେଟ ପାଖରେ ଜୈନିକ ବ୍ୟକ୍ତିଙ୍କ କେସର ରଫାଦଫା ପାଇଁ ଟଙ୍କା ନେଉଥିଲେ । କେଶ ରଫାଦଫା ପାଇଁ ବ୍ୟକ୍ତିଙ୍କ ଓକିଲଙ୍କଠାରୁ ସୁଶାନ୍ତ ୫୦ ହଜାର ଟଙ୍କା ଲାଞ୍ଚ ନେଉଥିଲେ ।
ସମ୍ପୃକ୍ତ ପୋଲିସ ଅଧିକାରୀଙ୍କ ନାମ ସୁଶାନ୍ତ ସ୍ୱାଇଁ ହୋଇଥିବା ବେଳେ ଲାଞ୍ଚ ନେଉଥିବା ସମୟରେ ଭିଜିଲାନ୍ସ ହାତରେ ଧରାପଡିଥିବା ସୂଚନା ଦେଇଛନ୍ତି ଭିଜିଲାନ୍ସ ଏଡିଜି ଯଶବନ୍ତ ଜେଠୱା । ଏଡିଜି ଜେଠୱା କହିଛନ୍ତି, "ସୁଶାନ୍ତ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀ ଖବର ପାଇ ତାଙ୍କୁ ରେଡ ହ୍ୟାଣ୍ଡେଡେଡ ଧରିଥିଲେ । ପରେ ତାଙ୍କ ନାଁରେ କେଶ ନମ୍ବର ୨୨/୨୧ ରେ ମାମଲାର ରଫାଦଫା ପାଇଁ ଟଙ୍କା ନେଉଥିବା ଆଧାରରେ ଖଣ୍ଡଗିରି ଥାନାରେ ମାମଲା ରୁଜୁ ହୋଇଛି । ସେହିପରି ଭିଜିଲାନ୍ସ ପୋଲିସ ଧାରା ୧୦୧୮ ଆଧାରରେ ମାମଲା ରୁଜୁ କରିଛି । ଭିଜିଲାନ୍ସ ତାଙ୍କୁ ଗିରଫ କରିଥିବା ବେଳେ ଭୁବନେଶ୍ୱରରେ ଥିବା ତାଙ୍କ ଘର ସମେତ ଅନ୍ୟାନ୍ୟ ସ୍ଥାନରେ ଚଢ଼ାଉ କରିଛି ପୋଲିସ । ଆଉ କେଉଁକେଉଁ ସ୍ଥାନରୁ ଖାକିର ସାହାରା ନେଇ ସୁଶାନ୍ତ ଟଙ୍କା ଉଠାଉଥିଲେ ସେନେଇ ଭିଜିଲାନ୍ସ ଅଧିକା ଖୋଳତାଡ଼ କରୁଛି ।