ଭୁବନେଶ୍ବର: ଓଡିଶା ବିଧାନସଭାରେ ଯୁବ ବିଧାୟିକା ଦୀପାଳି ଦାସଙ୍କ ନୂଆ ଇନିଂସ ଆରମ୍ଭ ହୋଇଛି । ଝାରସୁଗୁଡା ବିଧାୟିକା ଭାବେ ଦୀପାଳି ଦାସ ଶପଥ ନେଇଛନ୍ତି । ଉପନିର୍ବାଚନ ଜିତିବା ପରେ ଆଜି (ସୋମବାର) ବିଧାନସଭାରେ ଶପଥ ନେଇଛନ୍ତି ନବ ନିର୍ବାଚିତ ବିଧାୟିକା ଦୀପାଳି ଦାସ । ଦୀପାଳିଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି ଉପ-ବାଚସ୍ପତି ରଜନୀକାନ୍ତ ସିଂ । ଉପ-ବାଚସ୍ପତିଙ୍କ ପ୍ରକୋଷ୍ଠରେ ଶପଥ ଗ୍ରହଣ ସମାରୋହ ହୋଇଛି ।
ଗତ ମେ 10 ତାରିଖରେ ହୋଇଥିବା ଝାରସୁଗୁଡା ଉପନିର୍ବାଚନରେ ପ୍ରତିନ୍ଦ୍ବନ୍ଦୀଙ୍କୁ ମାତ ଦେଇ ବିଜୟୀ ହୋଇଥିଲେ ଦୀପାଳି ଦାସ । ଶପଥ ଗ୍ରହଣ ସମାରୋହରେ ଦୀପାଳିଙ୍କ ମାଆ ଭାଇଙ୍କ ସମେତ ମନ୍ତ୍ରୀ ରିତା ସାହୁ, ରାଜସ୍ବ ମନ୍ତ୍ରୀ ପ୍ରମିଳା ସାହୁ ଓ ଅନେକ ବରିଷ୍ଠ ନେତା ଉପସ୍ଥିତ ଥିଲେ । ଉପନିର୍ବାଚନରେ 48 ହଜାରରୁ ଊର୍ଦ୍ଧ୍ବ ଭୋଟରେ ଜିତିଥିଲେ ଦୀପାଳି ।
ବିଧିବଦ୍ଧ ଭାବେ ଶପଥ ନେବା ପରେ ପ୍ରତିକ୍ରିୟା ରଖି ଦୀପାଳି କହିଛନ୍ତି, ''ସାମ୍ବିଧାନିକ ନୀତି ନିୟମ ଅନୁସାରେ ଆଜି ଶପଥ ନେଇଛି । ମୁଖ୍ୟମନ୍ତ୍ରୀଙ୍କ ମାର୍ଗଦର୍ଶନରେ ଲୋକଙ୍କ ସ୍ବପ୍ନ ପୂରଣ କରିବି । ସବୁବେଳେ ଝାରସୁଗୁଡାବାସୀଙ୍କ ସେବାରେ ରହିବି । ବାପାଙ୍କ ସ୍ବପ୍ନ ଥିଲା ନୂଆ ଝାରସୁଗୁଡା ନିର୍ମାଣ । ନିଷ୍ଠାର ସହ କାମ କରି ବାପାଙ୍କ ସ୍ବପ୍ନ ପୂରଣ କରିବି ।''
ଝାରସୁଗୁଡା ଉପନିର୍ବାଚନରେ ବିଜେଡି ପ୍ରାର୍ଥୀ ଦୀପାଳି ଦାସ ବମ୍ପର ବିଜୟ ହାସଲ କରିଥିଲେ । ବାପାଙ୍କୁ ଟପି 48 ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଥିଲେ ଦୀପାଳି । ସେ 1 ଲକ୍ଷ 7 ହଜାର 198 ଖଣ୍ଡ ଭୋଟ ପାଇଥିଲେ । ବିଜେପି ପ୍ରାର୍ଥୀ ଟଙ୍କଧର ତ୍ରିପାଠୀଙ୍କୁ 58 ହଜାର 477 ଭୋଟ ଓ କଂଗ୍ରେସ ପ୍ରାର୍ଥୀ ତରୁଣ ପାଣ୍ଡେଙ୍କୁ ମାତ୍ର 4 ହଜାର 496 ଶହ ଭୋଟ ପାଇଥିଲେ । ଭୋଟ ଗଣତିର ସମସ୍ତ ରାଉଣ୍ଡରେ ଆଗୁଆ ରହିଥିଲେ ଦୀପାଳି ସର୍ବଶେଷରେ ବିଜୟ ମୁକୁଟ ପିନ୍ଧିଥିଲେ । ଗତକାଲି (ରବିବାର) ସେ ଝାରସୁଗୁଡାରୁ ଭୁବନେଶ୍ବରରେ ପହଞ୍ଚିଥିଲେ । ଏହା ପରେ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀଙ୍କୁ ଭେଟିିଥିଲେ ।