ସରିଲା ରୁଦ୍ଧ ଦ୍ୱାର ବୈଠକ, ପଦ୍ମପୁର ଫଳାଫଳ ପୂର୍ବରୁ ସମୀକ୍ଷା କଲେ ମୁଖ୍ୟମନ୍ତ୍ରୀ

ପଦ୍ମପୁର ଉପନିର୍ବାଚନ ଫଳାଫଳ ପୂର୍ବରୁ ରୁଦ୍ଧ ଦ୍ବାର ବୈଠକ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଅଧିକ ପଢନ୍ତୁ

ଭୁବନେଶ୍ବର: ନବୀନ ନିବାସରେ ଶେଷ ହେଲା ଗୁରୁତ୍ବପୂର୍ଣ୍ଣ ବୈଠକ । ପଦ୍ମପୁର ଉପନିର୍ବାଚନ ଫଳାଫଳ ପୂର୍ବରୁ ମାନସ ମନ୍ଥନ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ରୁଦ୍ଧ ଦ୍ବାର ବୈଠକରେ 50ରୁ ଊର୍ଦ୍ଧ୍ବ ନେତାଙ୍କୁ ଡ଼କରା ହୋଇଥିଲା । ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ବରଗଡ ପର୍ଯ୍ୟବେକ୍ଷକ ସୁଧୀର ସାମଲ, ମନ୍ତ୍ରୀ ରୋହିତ ପୂଜାରୀ, ବରିଷ୍ଠ ସାଧାରଣ ସମ୍ପାଦକ ପ୍ରଦୀପ ମାଝି, ବିଧାୟକ ବ୍ରଜ ପ୍ରଧାନଙ୍କ ଭଳି ଅନେକ ବଡ ବଡ ନେତା ସାମିଲ ହୋଇଥିଲେ । ବୈଠକ ପରେ ବିଜୁ ଜନତା ଦଳ ଉପନିର୍ବାଚନରେ ବିପୁଳ ଭୋଟରେ ବିଜୟୀ ହେବ ବୋଲି ବିଜେଡି ନେତା ସୁଧୀର ସାମଲ କହିଛନ୍ତି ।

ସୁପ୍ରିମୋଙ୍କ ସହ ଆଲୋଚନା ପରେ ବରଗଡ ବିଜେଡି ପର୍ଯ୍ୟବେକ୍ଷକ ନେତା କହିଛନ୍ତି, ''ଦଳ ପଦ୍ମପୁରରେ ବିପୁଳ ଭୋଟରେ ବିଜୟୀ ହେବ । ତିନୋଟି ଯାକ ବ୍ଲକ ଓ ଏନଏସିରେ ଦଳ ଲିଡ୍ କରିବ । ଲୋକଙ୍କର ସମସ୍ୟା କ'ଣ ଅଛି ସେ ସମ୍ପର୍କରେ ରିପୋର୍ଟ ଦେବେ । ଲୋକଙ୍କର କ'ଣ ସମସ୍ୟା ଅଛି, ସରକାରୀ ଯୋଜନା ତଳ ସ୍ତରରେ କେମିତି ପହଞ୍ଚୁଛି, ଲୋକଙ୍କ ଆବଶ୍ୟକତା କ'ଣ ରହୁଛି ଓ କିପରି ଏହି ସମସ୍ୟାର ସମାଧାନ କରାଯିବ ସେନେଇ 15 ତାରିଖ ସୁଦ୍ଧା ବିସ୍ତୃତ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଛି । ବିଜୟ ପରେ ଦାୟିତ୍ୱରେ ଥିବା ସବୁ ନେତା ପଦ୍ମପୁର ଯାଇ ଲୋକଙ୍କୁ ଧନ୍ୟବାଦ ଦେବେ ।'' ଏହାସହିତ ସେମାନଙ୍କ ସମସ୍ୟା ସମାଧାନ ଦିଗରେ ଆଲୋଚନା କରିବେ ବୋଲି ବିଜେଡି ନେତା କହିଛନ୍ତି ।

ଇଟିଭି ଭାରତ, ଭୁବନେଶ୍ବର