ଖୋର୍ଦ୍ଧା: ଟାଙ୍ଗୀ ଅଞ୍ଚଳରେ ବନ୍ଦ ହେଉନାହିଁ ଖଣିମାଫିଆଙ୍କ ହରକତ । ପ୍ରଶାସନ ଡାଳେ ଡାଳେ ଯାଇ ବିଭିନ୍ନ ବେଆଇନ ପଥର ଖଣିରେ ଯେତେ ଥର ରେଡ୍ କଲେ ମଧ୍ୟ ମାଫିଆମାନେ ଏହାକୁ ଖାତିର କରୁନଥିବା ଦେଖାଦେଇଛି । ଦିନ ସମୟରେ ମଧ୍ୟ ମାଫିଆମାନେ ବେଧଡକ ଖଣିଖନନ କରି ରାଜସ୍ୱ ଲୁଟ କରୁଛନ୍ତି ।
ସେହିଭଳି ମଙ୍ଗଳବାର ଟାଙ୍ଗୀ ତହସିଲଦାର ୧୬ ନଂଜାତୀୟ ରାଜପଥର ଟାଙ୍ଗୀ ଓ କୁହୁଡି ନିକଟରେ ଚଢାଉ କରି ୨ ମେଟାଲ ବୋଝେଇ ହାଇୱା ସହ ୧ ବାଲି ବୋଝେଇ ହାଇୱା ଜବତ କରିଛନ୍ତି । ଜବତ ମେଟାଲ ବୋଝେଇ ହାଇୱା ୨ ଟି କୁହୁଡି ନିକଟ ବ୍ରୁଷବନ୍ଧ ପାହାଡରୁ ମେଟାଲ ନେଇ ଖୋର୍ଦ୍ଧା ଯାଉଥିବା ବେଳେ ବାଲିବୋଝେଇ ହାଇୱାଟି କଟକରୁ ଟାଙ୍ଗୀକୁ ଆସୁଥିଲା ବୋଲି ସୂଚନା ମିଳିଛି ।
ତହସିଲଦାରଙ୍କ ଏହି ଚଢାଉ ଫଳରେ ପଥର ମାଫିଆମାନଙ୍କ ମଧ୍ୟ୍ୟରେ ଛନକା ପଶିଯାଇଛି । ସେହିପରି ଆଗାମୀ ଦିନରେ ରାତ୍ରିକାଳୀନ ଚଢାଉକୁ ଜୋରଦାର କରାଯିବ ବୋଲି ତହସିଲଦାର ସୂଚନା ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଈଟିଭି ଭାରତ