ଭୁବନେଶ୍ବର: ରାଜ୍ୟରେ ଥମୁନି ବେଆଇନ ଗୋରୁ ଚାଲାଣ । ବାହାର ରାଜ୍ୟକୁ ଗୋ ଚାଲାଣ କରି ମାଲାମାଲ ହେଉଛନ୍ତି ଗୋ ମାଫିଆ । ପୁରୀ ଜିଲ୍ଲା ସାକ୍ଷୀଗୋପାଳରୁ ଟ୍ରକ ଯୋଗେ ଭଦ୍ରକକୁ ହେଉଥିଲା ଗୋ ଚାଲାଣ । ୨୦ ରୁ ଉର୍ଦ୍ଧ୍ବ ଗୋରୁ ଦୁଇଟି ଟ୍ରକ ଯୋଗେ ଚାଲାଣ ହେଉଥିବା ବେଳେ କୁଆଖାଇ ଓଭରବ୍ରିଜ ଉପରେ ଗୋ ଚାଲାଣ ଗାଡ଼ି ଜବତ କରିଛନ୍ତି ସ୍ଥାନୀୟ ବାସିନ୍ଦା । ଏହି ଘଟଣାକୁ ନେଇ ସ୍ଥାନୀୟ ଲୋକେ ଉତ୍ୟକ୍ତ ହୋଇ ଟ୍ରକ ଡ୍ରାଇଭରଙ୍କୁୁ ମାଡ଼ ମାରିଥିଲେ । ଏନେଇ ଗୁରୁତର ଆହତ ହୋଇ ୩ ଜଣ ଟ୍ରକ ଡ୍ରାଇଭର କ୍ୟାପିଟାଲ ହସ୍ପିଟାଲରେ ଚିକିତ୍ସିତ ହେଉଥିବା ଜଣାପଡ଼ିଛି ।
ସୂଚନା ଅନୁଯାୟୀ, ଗତକାଲି ଦୁଇଟି ଟ୍ରକରେ ୨୦ରୁ ଉର୍ଦ୍ଧ୍ବ ଗୋରୁ ସାକ୍ଷୀଗୋପାଳରୁ ଭଦ୍ରକକୁ ଚାଲାଣ ହେଉଥିଲେ । ଏନେଇ ସନ୍ଦେହ କରି କୁଆଖାଇ ଓଭରବ୍ରିଜ ଉପରେ ଗୋ ଚାଲାଣ ଟ୍ରକକୁ ସ୍ଥାନୀୟ ଲୋକେ ଜବତ କରିଥିଲେ । ଗୋଟିଏ ଟ୍ରକ ଓଡ଼ିଶାର ହୋଇଥିବା ବେଳେ ଆଉ ଗୋଟିଏ ଉତ୍ତର ପ୍ରଦେଶର ଲେଖା ହୋଇଥିବା ଦେଖିବାକୁ ମିଳିଥିଲା । ଏହି ଘଟଣାରେ ୩ ଜଣ ଡ୍ରାଇଭରଙ୍କୁ ଲୋକମାନେ ମିଶି ମାଡ଼ ମାରିଥିଲେ। ମାଡରୁ ବର୍ତ୍ତିବାକୁ ଯାଇ ଜଣେ ଟ୍ରକ ଡ୍ରାଇଭର ବ୍ରିଜରୁ ଡେଇଁ ଆତ୍ମହତ୍ୟା ଉଦ୍ୟମ କରିଥିବା ବେଳେ ଅନ୍ୟ ଦୁଇ ଡ୍ରାଇଭରଙ୍କୁ ନିସ୍ତୁକ ମାଡ଼ ମାରିଥିଲେ ସ୍ଥାନୀୟ ଲୋକେ। ଏହି ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ୩ ଜଣ ଡ୍ରାଇଭଙ୍କୁ ଉଦ୍ଧାର କରି ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରିଛନ୍ତି । ଗୁରୁତର ଆହତ ଡ୍ରାରାଇଭରଙ୍କ ମଧ୍ୟରୁ ଜଣଙ୍କ ପରିଚୟ ମିଳି ନଥିବା ବେଳେ ଅନ୍ୟ ଦୁଇ ଜଣ କଟକ ଜିଲ୍ଲାର ଶେଖ ହବିବୁଲ୍ଲା ଓ ସୟଦ ଅନିଷ ବୋଲି ଜଣାପଡିଛି ।