ଭୁବନେଶ୍ବର: ଓଡିଶାର ସଂସ୍କୃତି ଓ ପରମ୍ପରାର ପର୍ବ ରଜ । ପିଠା ମିଠାରେ ମହକିବ ଗାଁ ଦାଣ୍ଡ । ରଜ ଅବସରରେ ସଜେଇ ହେବେ କୁଆରୀ ଝିଅ । ନୂଆ ବସ୍ତ୍ର ଅଳତା ଲଗାଇ ରଜ ଦୋଳିରେ ଝୁଲିବେ କୁଆରୀ । ଉତ୍ସବ ମୁଖର ହୋଇ ଉଠିବ ଗାଁ ଠୁ ସହର । ଚଳିତ ଥର ରାଜଧାନୀରେ ରଜ ପର୍ବକୁ ଧୁମଧାମରେ ପାଳିବାକୁ ଆରମ୍ଭ ହୋଇଛି ପ୍ରସ୍ତୁତି । ରଜ ପର୍ବ ପାଇଁ ସଜବାଜ ଜିନିଷ କିଣିବାକୁ ମାର୍କେଟ ବିଲ୍ଡିଂରେ ଗ୍ରାହକଙ୍କ ଖଚାଖଚ ଭିଡ । ଦୋକାନ ଗୁଡିକରୁ ମନ ପସନ୍ଦର ଜିନିଷ କିଣି ନେଉଛନ୍ତି ଯୁବତୀ । ହାତରେ ଆଉ ମାତ୍ର ଗୋଟିଏ ଦିନ ଥିବାରୁ ମାର୍କେଟ ବିଲ୍ଡିଂରେ ନାହିଁ ନଥିବା ଭିଡ ହେଉଛି । କେଉଁଠି ଭାଇ ତା ଭଉଣୀକୁ ଜିନିଷ କିଣାଇ ଦେଉଛି ତ ପୁଣି କେଉଁଠି ବାପା ତା ଝିଅକୁ ଡ୍ରେସ କିଣାଇ ଦେଉଛି । ଏହି କୃଷିଭିତ୍ତିକ ଓଡ଼ିଆ ପର୍ବକୁ ଚାତକ ପରି ଚାହିଁ ରହିଛନ୍ତି ପ୍ରତିଟି ଓଡିଆ । ପହିଲି ରଜରେ ସଜେଇ ହୋଇ ରଜ ମଉଜ କରିବେ କୁଆରୀ ଝିଅ ।
ସେପଟେ ଗତ କିଛି ଦିନ ହେଲା ରାଜ୍ୟ ପ୍ରବଳ ଖରା ଓ ଗରମ ଲୋକଙ୍କୁ କଲବଲ କରୁଛି । ରାଜଧାନୀ ଦିନ ବେଳା ତାପମାତ୍ରା ଅଧିକ ରହୁଥିବାରୁ ସନ୍ଧ୍ୟା ହେଲେ ରଜ ବଜାରରେ ଭିଡ ଜମୁଛି । ମାର୍କେଟ୍ ବିଲ୍ଡିଂ ଠାରୁ ଜନପଥ ଯାଏ, ସବୁଠି ଅସମ୍ଭାଳ ଭିଡ଼ । ମଲ ସାଙ୍ଗକୁ ଛୋଟ ଛୋଟ ଦୋକାନ ଗୁଡିକରୁ ଗ୍ରାହକ ମାନେ ଜିନିଷ କିଣି ନେଉଛନ୍ତି । କିନ୍ତୁ ଭିଡ ଭିତରେ ମାର୍କେଟ ବିଲ୍ଡିଂରେ ଅଳିଆର ପାହାଡ ଦେଖି ଗ୍ରାହକ ମାନେ ଅସନ୍ତୋଷ ବ୍ୟକ୍ତ କରିଛନ୍ତି ।