ସୂର୍ଯ୍ୟଙ୍କ ଠୁ ବଳିଗଲା ଆବର୍ଜନା ତାତି, କଲବଲ ଖୋର୍ଦ୍ଧାବାସୀ

ଅଳିଆ ଗଦାରେ ନିଆଁ ଲାଗିବା କାରଣରୁ ପ୍ରବଳ ଧୂଆଁ ଓ ଗରମରେ ଛଟପଟ ଖୋର୍ଦ୍ଧା ଟାଉନ । ଅସହ୍ୟ ଗରମ ସାଙ୍ଗକୁ ଆବର୍ଜନା ତାତି ଆହୁରି ଅସ୍ତବ୍ୟସ୍ତ କରିଛି ଖୋର୍ଦ୍ଧା ସହରବାସୀଙ୍କୁ ।

ଖୋର୍ଦ୍ଧା: ଆକାଶରୁ ହେଉଛି ଅଗ୍ନିବର୍ଷା । ପ୍ରଚଣ୍ଡ ତାତିରେ ଆଉଟୁ ପାଉଟୁ ସାରା ରାଜ୍ୟ । ଖରା ସହ ଅସହ୍ୟ ଗୁଳିଗୁଳିକୁ ନେଇ ଲୋକେ ତ୍ରାହି ତ୍ରାହି ଡାକୁଥିବାବେଳେ ଆଉ ଏବେ ଏହାରି ଭିତରେ ଦାଉ ସାଜିଛି ଡ଼ମ୍ପିଙ୍ଗୟାର୍ଡ଼ । ଅଳିଆ ଗଦାରେ ନିଆଁ ଲାଗିବା କାରଣରୁ ପ୍ରବଳ ଧୂଆଁ ଓ ଗରମରେ ଖୋର୍ଦ୍ଧା ସହରର ସାଧାରଣ ଜନଜୀବନ ଅସ୍ତବ୍ୟସ୍ତ ।

ପ୍ରବଳ ଖରା ସାଙ୍ଗକୁ ହୁତୁ ହୁତୁ ହୋଇ ଜଳୁଛି ଡ଼ମ୍ପିଙ୍ଗୟାର୍ଡ଼ । ଯେଉଁଥିପାଇଁ ତାତି ଆହୁରି ଦୁଇ ଗୁଣ ହୋଇଥିବା ଅଭିଯୋଗ ହୋଇଛି । ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରୁ ମାତ୍ର 500 ମିଟର ଏବଂ ଏସପିଙ୍କ କାର୍ଯ୍ୟାଳୟ ପାଖରେ ଥିବା ଅଳିଆ ଆବର୍ଜନାକୁ ନେଇ ଲୋକେ ହନ୍ତସନ୍ତ ହେଉଛନ୍ତି ।

ଗୋଟିଏ ପଟେ ସୂର୍ଯ୍ୟଙ୍କ ପ୍ରଖର କିରଣ ଓ ଅନ୍ୟପଟେ ମନୁଷ୍ୟକୃତ ପ୍ରଦୂଷଣ ଓ ତାତି । ଆଉ ଏହାରି ଭିତରେ ଛଟପଟ ଖୋର୍ଦ୍ଧା ସହରବାସୀ ।

ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ