ଭୁବନେଶ୍ବର: ଡିଜିଟାଲ ତାନ୍ତ୍ରିକ ସାଜି ମହାଠକେଇ । EOW ନିକଟରେ ହୋଇଛି କୋଟିଏ ଟଙ୍କାର ଠକେଇ ଅଭିଯୋଗ । ମୋଟିଭିସେନାଲ ସ୍ପିକରଙ୍କ ନାଁରେ ଏଭଳି ସାଙ୍ଘାତିକ ଅଭିଯୋଗ ଆସିଥିବା ଜଣାପଡିଛି । ଲୋକଙ୍କ ସମସ୍ୟା ସମାଧାନ ଆଳରେ ଭୁଆଁ ବୁଲାଇଛନ୍ତି ଠକ । ଡିଜିଟାଲ ତାନ୍ତ୍ରିକ ସାଜି ଠକିନେଇଛନ୍ତି କୋଟିଏରୁ ଊର୍ଦ୍ଧ୍ବ ଟଙ୍କା । ୟୁଟ୍ୟୁବର ଡକ୍ଟର ନୀତିନ ମୋହନ ଲାଲଙ୍କ ନାମରେ ସାଙ୍ଘାତିକ ଅଭିଯୋଗ ହୋଇଛି । ମହିଳାଙ୍କ ଭାବନାକୁ ଅସ୍ତ୍ର କରି ବିଭିନ୍ନ ପ୍ରକାର ସମସ୍ୟାର ସମାଧାନର ବାଟ ଦେଖାଇବା ଆଳରେ ଠକେଇ କରିଛନ୍ତି ଏହି ଠକ।
ରୋଜଗାର କରୁଥିବା ମହିଳା ବା ଗୃହିଣୀ ଓ ମହିଳା ଉଦ୍ୟୋଗପତିମାନଙ୍କଠାରୁ ଟଙ୍କା, ଯଶ ଓ ପାରିବାରିକ ସମସ୍ୟାର ସମାଧାନ ପାଇଁ ବିଭିନ୍ନ ବାଟ ଦେଖାଇ ଠକେଇ କରିଥିବା ନେଇ EOWରେ ଅଭିଯୋଗ ହୋଇଛି । ନିଜକୁ 'ଡିଜିଟାଲ ତାନ୍ତ୍ରି'କ ବା 'ଆଞ୍ଜେଲ ରିକଲ' ତଥା 'ଆତ୍ମା ଡକି' ବୋଲି କହି ସମସ୍ୟାର ସମାଧାନ ନେଇ ପ୍ରଲୋଭନ ଦେଖାଇଥିଲା । ଏନେଇ କ୍ରାଇମବ୍ରାଞ୍ଚ EOW ବା ଅର୍ଥନୈତିକ ଅପରାଧ ଶାଖାରେ ଭାରତର ଏକାଧିକ ରାଜ୍ୟର ଅଭିଯୋଗକାରୀ ଆସି ଅଭିଯୋଗ କରିଛନ୍ତି ।
ଅଭିଯୋଗ ଅନୁସାରେ, ଠକ ନିଜର ଏକ କମ୍ପାନୀ ଖୋଲି ପ୍ରଥମେ ୟୁଟୁବରେ ପ୍ରମୋସନ କରୁଥିଲା । ଏକାଧିକ ମୋଟିଭିସେନାଲ ମେସେଜ ଓ ଭିଡିଓ ଜରିଆରେ କରାଯାଉଥିଲା ପ୍ରମୋସନ । ଏପରିକି ପାରିବାରିକ ,କର୍ମକ୍ଷେତ୍ର ଓ ବ୍ୟବସାୟିକ ଆଦି କ୍ଷେତ୍ରରେ ଅଭିବୃଦ୍ଧି ଓ ସମସ୍ୟାର ସମାଧାନ ଦେବା ପାଇଁ ବିଭିନ୍ନ ବାଟ ଦେଖାଇ ଠକ ଜଣଙ୍କ କୋର୍ସ ଅଫର୍ କରାଇ ଏପରି ଠକେଇ କରିଛି । ଏକାଧିକ ମହିଳା ଏହି ଠକେଇର ଶିକାର ହୋଇଛନ୍ତି । ସୂଚନା ଅନୁସାରେ, ନିଜର ଏକ ହିଲିଙ୍ଗ ପ୍ରଣାଳୀ ବା କୋର୍ସ ଅଫର୍ କରି ଜଣକ ପିଛା ୫୦ ହଜାରରୁ ୫ଲକ୍ଷ ପର୍ଯ୍ୟନ୍ତ ଠକେଇ କରି ଛୁ ମାରିଛି ଠକ।