ଖୋର୍ଦ୍ଧା: କାଳିଜାଇ ଦର୍ଶନ ସାରି ଫେରୁଥିବାବେଳେ ଡଙ୍ଗାବୁଡି ଘଟଣାରେ ଆଜି (ସୋମବାର) ବାଲୁଗାଁ ପୋଲିସ ୪ ଜଣ ଡଙ୍ଗା ମାଲିକଙ୍କୁ ଗିରଫ କରିଛି । ସେମାନେ ହେଲେ ଅଶୋକ ଜାଲି, ସୁଦର୍ଶନ ଜାଲି, ନବଘନ ଜାଲି ଏବଂ ବିଶେଖ ଜାଲି । ତେବେ ଏହି ଘଟଣାକୁ ଜିଲ୍ଲାପାଳ ଗୁରୁତର ସହ ନେଇ ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବେ ବୋଲି କହିଛନ୍ତି ।
ସୂଚନାଯୋଗ୍ୟ, ରବିବାର ସ୍ଥାନୀୟ ଅଞ୍ଚଳର ୨୦ରୁ ଊର୍ଦ୍ଧ୍ବ ଯାତ୍ରୀ ଏକ ଘରୋଇ ମାଛଧରା ଡଙ୍ଗାରେ କାଳିଜାଇ ପୀଠରୁ ମାନସିକ ଭୋଜି ସାରି ଫେରୁଥିବା ବେଳେ ଡଙ୍ଗାଟି ଭାରସାମ୍ୟ ହରାଇ ଚିଲିକାରେ ବୁଡି ଯାଇଥିଲା । ଡଙ୍ଗାଟି ବୁଡିଯିବା ଦେଖି ପଛରେ ଆସୁଥିବା ଅନ୍ୟ ଡଙ୍ଗା ଚାଳକ ସେମାନଙ୍କୁ ଉଦ୍ଧାର କରିଥିଲେ । ଉଦ୍ଧାର ପରେ ୫ଜଣ ଗୁରୁତରଙ୍କୁ ବାଲୁଗାଁ ଏବଂ ଦୁଇ ଜଣଙ୍କୁ ବ୍ରହ୍ମପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ