ଖୋର୍ଦ୍ଧା: ଫାଇନାନ୍ସ କର୍ମଚାରୀଙ୍କ ଠାରୁ ଲୁଟ ଘଟଣାରେ ଟାଙ୍ଗୀ ଥାନା ପୋଲିସ ଆଜି ୪ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନଙ୍କ ଠାରୁ ନଗଦ ୪୨ ହଜାର ୫୦୦ ଟଙ୍କା, 1 ନକଲି ବନ୍ଧୁକ ଓ 1 ବୁଲେଟକୁ ଜବତ କରିଛି ପୋଲିସ ।
ଫାଇନାନ୍ସ କର୍ମଚାରୀଙ୍କ ଠାରୁ ଲୁଟ୍ ଘଟଣା, ୪ ଜଣଙ୍କୁ ବାନ୍ଧିଲା ଟାଙ୍ଗୀ ପୋଲିସ
ସୂଚନାନୁଯାୟୀ, ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥ କଇଥପଲା ଠାରେ ଥିବା ଫାଲକନ ଫିଡ୍ସ ନିକଟରୁ ୨ ବର୍ଷ ମଧ୍ୟରେ ବିଭିନ୍ନ ଫାଇନାନ୍ସ କର୍ମଚାରୀଙ୍କ ଠାରୁ ଲୁଟ ହେଉଥିବା ଅଭିଯୋଗ ହୋଇଆସୁଥିଲା । ତେବେ ଅଭିଯୁକ୍ତମାନେ ଗତ ୩ ତାରିଖରେ ୧ ଲକ୍ଷ ୩୦ ହଜାର ଟଙ୍କା ଟାଙ୍ଗୀ ଶାଖା IIFL ଫାଇନାନ୍ସ କର୍ମଚାରୀଙ୍କ ଠାରୁ ନକଲି ବନ୍ଧୁକ ଦେଖାଇ ଲୁଟ କରିଥିଲେ । ଏହା ପୂର୍ବରୁ ଗତବର୍ଷ ନଭେମ୍ବର ମାସରେ ୬୮ ହଜାର ୩୦୦ ଟଙ୍କା ନକଲି ବନ୍ଧୁକ ଦେଖାଇ ଟାଙ୍ଗୀ ଶାଖା BFL ଫାଇନାନ୍ସ କର୍ମଚାରୀଙ୍କ ଠାରୁ ଲୁଟ କରିଥିବା ବେଳେ ସେପ୍ଟେମ୍ବର ମାସରେ ୯୪ ହଜାର ୧୪୪ ଟଙ୍କା ନାଚୁଣୀ ଶାଖା ପିପୁଲ୍ସ ଫୋରମ ଫାଇନାନ୍ସ କର୍ମଚାରୀଙ୍କ ଠାରୁ ଲୁଟ୍ କରିଥିଲେ ।