କଟକ: ଶେଷ ହେଲା ଆନ୍ତଃଜିଲ୍ଲା 19 ବର୍ଷରୁ କମ କ୍ରିକେଟ ପ୍ରତିଯୋଗିତା । ଫାଇନାଲ ରେ ରେଷ୍ଟ ଅଫ ଓଡିଶାକୁ 4 ୱିକେଟରେ ହରାଇ ଭୁବନେଶ୍ୱର ବି ଚମ୍ପିଆନ ହୋଇଛି । ସାୟିଦ ଟି ଅହମ୍ମଦଙ୍କ ଚିତାକର୍ଷକ ବୋଲିଂ ଯୋଗୁଁ ଫାଇନାଲ ମ୍ୟାଚରେ ଟ୍ରଫି ହାତେଇଛି ଭୁବନେଶ୍ୱର ବି । ବାରବାଟୀ ଷ୍ଟାଡିଅମରେ ଖେଳାଯାଇଥିବା ଏହି ଫାଇନାଲ ମୁକାବିଲାରେ ଭୁବନେଶ୍ୱର ବି ଟସ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା । ବ୍ୟାଟିଂ ଆମନ୍ତ୍ରଣ ପାଇ ବିପକ୍ଷ ଦଳ 48 ଓଭରରେ ସମସ୍ତ ୱିକେଟ ହରାଇ 135 ରନ ସଂଗ୍ରହ କରିଛି ।
ତେବେ ଦଳ ପକ୍ଷରୁ ଗୌରବ କୁମ୍ଭାର ସର୍ବାଧିକ 46 ରନ ଜରିଆରେ ଦଳ ଏହି ସ୍କୋରରେ ପହଞ୍ଚିଥିଲା । ଜବାବ ଧାର୍ଯ୍ୟ ଲକ୍ଷ୍ୟକୁ ପିଛା କରି ହାତରେ 4 ୱିକେଟ ରଖି ବିଜୟ ଲକ୍ଷ୍ୟ ହାସଲ କରି ନେଇଥିଲା ଭୁବନେଶ୍ବର ବି ଟିମ । ଦଳ ପକ୍ଷରୁ କରନ ମହାପାତ୍ର ସର୍ବାଧିକ 44, ଏମ ଜି ଗୋପାଳ 37 ରନ ଜରିଆରେ ଦଳ ଏହି ବିଜୟ ଲକ୍ଷ୍ୟ ହାସଲ କରିଥିଲା । ଭୁବନେଶ୍ୱର ଦଳ ପକ୍ଷରୁ ସାୟିଦଙ୍କ ଦମଦାର ବୋଲିଂ ଯୋଗୁଁ ତାଙ୍କୁ ମ୍ୟାନ ଅଫ ଦି ମ୍ୟାଚ ଭାବେ ବିବେଚିତ କରାଯାଇଥିଲା । ଏଥିସହ ଏହି ଫାଇନାଲ ମୁକବିଲାରେ ଓସିଏ ସମ୍ପାଦକ ମୁଖ୍ୟ ଅତିଥି ଭାବରେ ଯୋଗ ଦେଇ କୃତି ଖେଳାଳି ମାନଙ୍କୁ ଟ୍ରଫି ପ୍ରଦାନ କରିଥିଲେ ।