ବିଜୟଙ୍କ ଅଭିଜ୍ଞତା ଓ ଅନୁଭୂତି କଂଗ୍ରେସ ପାଇଁ ସହାୟକ ହେବ: କଂଗ୍ରେସ ନେତା

ଦିଲ୍ଲୀରୁ ଫେରିବା ପରେ କଂଗ୍ରେସ ଭବନରେ ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକଙ୍କୁ ସ୍ବାଗତ କରିଛନ୍ତି ପିସିସି ସଭାପତିଙ୍କ ସମେତ ଅନ୍ୟ ବରିଷ୍ଠ କଂଗ୍ରେସ ନେତା । ସରକାରରେ ତାଙ୍କର ରହିଥିବା ଅଭିଜ୍ଞତା ଓ ଅନୁଭୂତି ଦଳ ପାଇଁ ସହାୟକ ହେବ ବୋଲି ପ୍ରତିକ୍ରିୟା ରଖିଛନ୍ତି କଂଗ୍ରେସ ନେତା । ଅଧିକ ପଢ଼ନ୍ତୁ

ଭୁବନେଶ୍ବର: କଂଗ୍ରେସରେ ଯୋଗଦେବା ପରେ ସୋମବାର ଓଡ଼ିଶା ଫେରିଛନ୍ତି ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ । ନିକଟରେ ଦିଲ୍ଲୀ ଯାଇ ସେ AICC ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍‌ଗେ, ସାଧାରଣ ସମ୍ପାଦକ କେସି ବେଣୁ ଗୋପାଳ, ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର ଓ ପିସିସି ସଭାପତି ଶରତ ପଟ୍ଟନାୟକଙ୍କ ଉପସ୍ଥିତିରେ କଂଗ୍ରେସର ହାତ ଧରିଛନ୍ତି । ତେବେ ବିଜୟଙ୍କ ଯୋଗଦାନ କଂଗ୍ରେସକୁ ଆହୁରି ସଶକ୍ତ କରିବ ଏବଂ ତାଙ୍କର ଅଭିଜ୍ଞତା ଏବଂ ଅନୁଭୂତି ରାଜ୍ୟ କଂଗ୍ରେସ ପାଇଁ ସହାୟକ ହେବ ବୋଲି ପ୍ରତିକ୍ରିୟା ରଖିଛନ୍ତି କଂଗ୍ରେସ ନେତୃବୃନ୍ଦ ।

ଦିଲ୍ଲୀରୁ ଫେରିବା ପରେ ଭୁବନେଶ୍ବର ବିମାନ ବନ୍ଦର ଠାରେ ବିଜୟ ପଟ୍ଟନାୟକଙ୍କୁ ରାଜ୍ୟ କଂଗ୍ରେସ ପକ୍ଷରୁ ଭବ୍ୟ ସ୍ବାଗତ କରାଯାଇଥିଲା । ଛାତ୍ର କଂଗ୍ରେସ ତରଫରୁ ଏକ ବିଶାଳ ଶୋଭାଯାତ୍ରା କରି ବିଜୟଙ୍କୁ ରାଜ୍ୟ କଂଗ୍ରେସ ଭବନ ପର୍ଯ୍ୟନ୍ତ ଅଣାଯାଇଥିଲା । କଂଗ୍ରେସ ଭବନରେ ପିସିସି ସଭାପତି ଶରତ ପଟ୍ଟନାୟକଙ୍କ ସମେତ ପୂର୍ବତନ ପିସିସି ମୁଖିଆ ଜୟଦେବ ଜେନା, ନିରଞ୍ଜନ ପଟ୍ଟନାୟକ, ପ୍ରସାଦ ହରିଚନ୍ଦନ, ବରିଷ୍ଠ କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ଓ ବରିଷ୍ଠ କଂଗ୍ରେସ ନେତା ପଞ୍ଚାନନ କାନୁନଗୋ ପ୍ରମୁଖ ଉପସ୍ଥିତ ରହି ବିଜୟ ପଟ୍ଟନାୟକଙ୍କୁ ସ୍ବାଗତ କରିଥିଲେ ।

ତେବେ ବିଜୟଙ୍କ କଂଗ୍ରେସରେ ଯୋଗଦାନରେ ଦଳର ନେତୃବୃନ୍ଦ ବେଶ ଉତ୍ସାହିତ ଅଛନ୍ତି । ତେବେ ବିଜୟ ପଟ୍ଟନାୟକ ପୂର୍ବରୁ ଜାନକୀ ବଲ୍ଲଭ ପଟ୍ଟନାୟକଙ୍କ ସରକାର ପରେ ବିଜୁ ପଟ୍ଟନାୟକ ଓ ନବୀନ ପଟ୍ଟନାୟକଙ୍କ ସରକାରରେ ଜଣେ ଦକ୍ଷ ପ୍ରଶାସକ ଭାବେ କାର୍ଯ୍ୟ କରିଥିଲେ । ସରକାରରେ ତାଙ୍କର ଦୀର୍ଘଦିନର ଅଭିଜ୍ଞତା ଓ ଅନୁଭୂତି କଂଗ୍ରେସ ପାଇଁ ବେଶ ସହାୟକ ହେବ ବୋଲି କହିଛନ୍ତି କଂଗ୍ରେସ ନେତୃବୃନ୍ଦ । ସେ ରାଜ୍ୟ ସରକାରଙ୍କ ସହ ଥିବାବେଳେ ଯେଉଁ କାର୍ଯ୍ୟ କରିଥିଲେ, ଏବେ ତାକୁ ରାଜନୀତିରେ ଲଗେଇବେ । ତାଙ୍କ ଦକ୍ଷତା କଂଗ୍ରେସ ସଂଗଠନକୁ ସୁଦୃଢ଼ କରିବ ବୋଲି ପୂର୍ବତନ ପିସିସି ସଭାପତିମାନେ ମତ ରଖିଛନ୍ତି । ଏନେଇ କଂଗ୍ରେସ ଭବନରେ ବରିଷ୍ଠ ନେତାମାନଙ୍କ ସହ ଅଧିକ ଆଲୋଚନା କରିଛନ୍ତି ଆମ ପ୍ରତିନିଧି ସଞ୍ଜୀବ ରାୟ ।

ଇଟିଭି ଭାରତ, ଭୁବନେଶ୍ବର