ଖୋର୍ଦ୍ଧା: ଇଟିଭି ଭାରତର ମହାପ୍ରଭାବ । ଖୋର୍ଦ୍ଧା ପୋଡାଡିହି ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘୋଟାଲା ପଦାରେ ପଡିବା ଏବଂ ଆରଟିଆଇ କର୍ମୀ ତଥା ସମାଜସେବୀ ବିଭୂତି ଦାସ ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ପରେ କାର୍ଯ୍ୟାନୁଷ୍ଠାନ ନେଇଛି ଜିଲ୍ଲା ପ୍ରଶାସନ । ଘଟଣାରେ ସମ୍ପୃକ୍ତ ଥିବା 3 ଜଣ ପିଇଓଙ୍କୁ ବହିଷ୍କାର ନିର୍ଦ୍ଦେଶ ଦେବା ସହ ବ୍ଲକର ବିଡ଼ିଓ ଏବଂ ଏବିଡ଼ିଓଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସୁପାରିସ ହୋଇଛି ।
ସୂଚନାନୁସାରେ, ଗତ 21 ନଭେମ୍ବର 2019ରେ ବେଗୁନିଆ ବ୍ଲକ୍ ପୋଡାଡିହି ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘୋଟାଲା ନେଇ ଇଟିଭି ଭାରତରେ ଖବର ପ୍ରସାରଣ ହୋଇଥିଲା । ଏଥିସହିତ ଆରଟିଆଇ କର୍ମୀ ତଥା ସମାଜସେବୀ ବିଭୂତି ଦାସ ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ । ଉକ୍ତ ଘଟଣା ପଦାରେ ପଡିବା ପରେ ଜିଲ୍ଲା ପ୍ରଶାସନ ପଦକ୍ଷେପ ନେଇଥିଲା । ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ଘଟଣାର ତଦନ୍ତ କରି ଶୁକ୍ରବାର ଜିଲ୍ଲାପାଳଙ୍କୁ ରିପୋର୍ଟ ଦେବା ପରେ ଜିଲ୍ଲାପାଳ ତୁରନ୍ତ ପଞ୍ଚାୟତରେ ଆର୍ଥିକ ବର୍ଷ 2016-17ରେ ଥିବା ତିନି ପିଇଓ ନାରାୟଣ ଜେନା, ଜୟଦେବ ସୁବୁଦ୍ଧି ଏବଂ କେଦାର ବେହେରାଙ୍କୁ ବହିଷ୍କାର ନିର୍ଦ୍ଦେଶ ଦେଇଛନ୍ତି । ଏଥିସହ ବ୍ଲକର ବିଡ଼ିଓ ଏବଂ ଏବିଡ଼ିଓଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସୁପାରିସ କରାଯାଇଥିବା ଜିଲ୍ଲା ପ୍ରକଳ୍ପ ନିର୍ଦ୍ଦେଶକ କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
