ନିଶାସକ୍ତ ଅବସ୍ଥାରେ ASIଙ୍କ ଉନ୍ମତ୍ତକାଣ୍ଡ: ଓ୍ବାର୍ଡ ସଭ୍ୟଙ୍କ ମୁଣ୍ଡ ଫଠାଇ ନିଲମ୍ବିତ

ଖୋର୍ଦ୍ଧା ଜିଲ୍ଲା ଜଙ୍କିଆ ଥାନାରେ ASIଙ୍କ ଦାଦାଗିରି । ଥାନାକୁ ଆସିଥିବା ଜଣେ ବ୍ୟକ୍ତିଙ୍କୁ ଟେକା ମାରି ମୁଣ୍ଡ ଫଟାଇ ଥିବା ନେଇ ଅଭିଯୋଗ ହୋଇଛି । ଏନେଇ ଘଟଣାରେ ଅଭିଯୁକ୍ତ ASIଙ୍କୁ ନିଲମ୍ବିତ କରାଯାଇଛି । ଅଧିକ ପଢ଼ନ୍ତୁ

ଖୋର୍ଦ୍ଧା:ଥାନାରେ ASIଙ୍କ ଦାଦାଗିରି । ନିଶାସକ୍ତ ଅବସ୍ଥାରେ ଥାନାରେ ଦେଖାଇଲେ ଦବଙ୍ଗଗିରି । ଥାନାକୁ ଆସିଥିବା ଜଣେ ବ୍ୟକ୍ତିଙ୍କୁ ଟେକା ମାରି ମୁଣ୍ଡ ଫଟାଇ ଦେଇଥିବା ନେଇ ଥାନାରେ ଅଭିଯୋଗ ହୋଇଛି । ଏଭଳି ଘଟଣା ସାମ୍ନାକୁ ଆସିଛି ଖୋର୍ଦ୍ଧା ଜିଲ୍ଲା ଜଙ୍କିଆ ଥାନାରୁ । ଏହି ଘଟଣାରେ ଅଭିଯୁକ୍ତ ASIଙ୍କୁ ନିଲମ୍ବିତ କରାଯାଇଛି ।

ସୂଚନା ମୁତାବକ, ଜଙ୍କିଆ ଥାନାରେ କାର୍ଯ୍ୟରତ ASI ନିରଞ୍ଜନ ମହାନ୍ତି ଅତ୍ୟଧିକ ମଦ୍ୟପାନ କରି ଜଙ୍କିଆ ପଞ୍ଚାୟତର ୱାର୍ଡ ସଭ୍ୟଙ୍କୁ ମାଡ଼ ମାରି ମୁଣ୍ଡ ପଠାଇ ଦେଇଥିଲେ । ଏହି ସମ୍ପର୍କରେ ଆହତଙ୍କ ପତ୍ନୀ ବନିତା ହରିଚନ୍ଦନ ଥାନାରେ ଲିଖିତ ଅଭିଯୋଗ କରିଥିଲେ । ତେବେ ଜଙ୍କିଆ ବାଲିଗାଡିଆ ଗ୍ରାମର ୱାର୍ଡ ସଭ୍ୟ ନବକିଶୋର ହରିଚନ୍ଦନ ନିଜର ଜଣେ ସମ୍ପର୍କୀୟ ସହିତ କୌଣସି ଏକ କାର୍ଯ୍ୟରେ ଥାନାକୁ ଯାଇଥିଲେ । ସେହି ସମୟରେ ଥାନା ASI ନିରଞ୍ଜନ ମହାନ୍ତିଙ୍କ ସହିତ ଯୁକ୍ତିତର୍କ ହୋଇଥିଲା । ଏନେଇ ASI ନିରଞ୍ଜନ ମହାନ୍ତି ଏଥିରେ ଉତକ୍ଷିପ୍ତ ହୋଇ ଏକ ଟେକା ନବକିଶୋରଙ୍କ ମୁଣ୍ଡକୁ ଫୋପାଡ଼ି ଦେବାରୁ ତାଙ୍କ ମୁଣ୍ଡ ଫାଟି ଯାଇଥିଲା । ତେବେ ଏନେଇ ନବକିଶୋର ଖୋର୍ଦ୍ଧା ମେଡ଼ିକାଲରେ ଚିକିତ୍ସିତ ହୋଇଥିବା ବେଳେ, ବର୍ତ୍ତମାନ ସୁସ୍ଥ ଥିବା ଜଣାପଡ଼ିଛି ।

ଏନେଇ ସ୍ଥାନୀୟ ଜଙ୍କିଆ ବାଲିଗାଡ଼ିଆ ଲୋକେ ଥାନା ସମ୍ମୁଖରେ ତାଲା ପକାଇ କିଛି ସମୟ ପାଇଁ ହୋ ହାଲ୍ଲା କରିଥିଲେ । ଏଥି ସହ ASIଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଥିଲେ । ସେପଟେ ତୁରନ୍ତ ଅଭିଯୁକ୍ତ ASIଙ୍କୁ ନିଲମ୍ବନ କରାଯାଇଥିବା ବେଳେ ଅଭିଯୋଗକୁ ଭିତ୍ତି କରି ଜଙ୍କିଆ ଥାନାରେ ଏକ ମାମଲା ରୁଜୁ କରାଯାଇଥିବା ଖୋର୍ଦ୍ଧା ଏସଡିପିଓ ସୂଚନା ଦେଇଛନ୍ତି । ତେବେ ସେପଟେ ଥାନାରେ କାର୍ଯ୍ୟରତ ASIଙ୍କ ଦାଦାଗିରିକୁ ସ୍ଥାନୀୟ ଲୋକେ ନାପସନ୍ଦ କରିଛନ୍ତି ।

ପ୍ରକାଶ ଥାଉକି, ସେହିପରି କିଛି ମାସ ପୂର୍ବେ ଭଦ୍ରକ ଜିଲ୍ଲା ସାବରଙ୍ଗ ଥାନା ପରିସରରେ ଜଣେ କନେଷ୍ଟବଳ ନିଶାସକ୍ତ ଅବସ୍ଥାରେ ଏକ ମଦ ଦୋକାନ ସମ୍ମୁଖରେ ଉତ୍ପାତ କରୁଥିଲେ । ଯାହାର ଫଟୋ ଏବଂ ଭିଡିଓ ଜଣେ ଯୁବକ ସଂଗ୍ରହ କରୁଥିବା ବେଳେ କନେଷ୍ଟବଳ ଜଣକ ଅଶ୍ଳୀଳ ଭାଷାରେ ଗାଳି ଗୁଲଜ କରିଥିଲେ । ଜଣେ ଯୁବକଙ୍କ ଘରକୁ ନିଶାସକ୍ତ ଅବସ୍ଥାରେ ଆସି ଗାଳି ଗୁଲଜ କରିବା ସହ ତାଙ୍କୁ ଜୀବନରୁ ମାରି ଦେବାକୁ ଧମକ ଦେଇଥିବା ଅଭିଯୋଗ ହୋଇଥିଲା । ସମ୍ପୃକ୍ତ ଯୁବକ ଜଣଙ୍କ ଭୟଭୀତ ହୋଇ ସାବରଙ୍ଗ ଥାନାରେ ଏକ ମାମଲା ରୁଜୁ କରିଥିଲେ ।

ଇଟିଭି ଭାରତ, ଖୋର୍ଦ୍ଧା