ଅନାଥ ଶିଶୁକୁ ମିଳିଲା ନୂଆ ପରିଚୟ, ତିନି ଭଉଣୀଙ୍କୁ ଉଦ୍ଧାର କରି ଦାୟିତ୍ବ ନେଲା ଶିଶୁ ସୁରକ୍ଷା ବିଭାଗ

ଅନାଥ ଶିଶୁଙ୍କୁ ମିଳିଲା ନୂଆ ପରିଚୟ । ଶେଷରେ ଆପଣାଇ ନେଲା ଶିଶୁ ସୁରକ୍ଷା ବିଭାଗ । ତିନି ଭଉଣୀଙ୍କର ଦାୟିତ୍ବ ନେଲା ଶିଶୁ ସୁରକ୍ଷା ବିଭାଗ । ଅଧିକ ପଢନ୍ତୁ

ଖୋର୍ଦ୍ଧା : ଅନାଥ ଶିଶୁଙ୍କୁ ମିଳିଲା ନୂଆ ପରିଚୟ । ଶେଷରେ ଆପଣାଇ ନେଲା ଶିଶୁ ସୁରକ୍ଷା ବିଭାଗ ( District child protection department) । ତିନି ଭଉଣୀଙ୍କର ଦାୟିତ୍ବ ନେଲା ଶିଶୁ ସୁରକ୍ଷା ବିଭାଗ । ଖୋର୍ଦ୍ଧା ଜିଲ୍ଳା ବେଗୁନିଆ ବ୍ଲକ ପୋଡାଡିହ ପଞ୍ଚାୟତ ନିଳକଣ୍ଠପୁର ଗ୍ରାମରେ ବାପା ମାଆଙ୍କ ମୃତ୍ଯୁବରଣ ପରେ ଅସହାୟ ଅବସ୍ଥାରେ ତିନି ଭାଇ ଭଉଣୀଙ୍କୁ ନେଇ ରହୁଥିଲେ ପୁଷ୍ପଲତା ନାୟକ ।

ବାପାମାଆ ଛେଉଣ୍ଡ ତିନି ଭାଇ ଭଉଣୀ ଅଭାବ ଅନଟନରେ ରହିଥିଲେ । ନା ଖାଇବାକୁ ଥିଲା ଦାନା ନା ମୁଣ୍ଡ ଗୁଞ୍ଜିବାକୁ ଘର । ଦାଦା ଖୁଡିଙ୍କ ସହ ଗ୍ରାମବାସୀଙ୍କ ସହଯୋଗରେ ନାବାଳିକା ପୁଷ୍ପଲତା ଓ ତାଙ୍କ ତିନି ଭାଇ ଭଉଣୀ ଦିନିଆରୀ ନୀଳକଣ୍ଠପୁର ଆଦିବାସୀ ସାହିରେ ରହୁଥିଲେ । ଏହିଖବର 'ଇଟିଭି ଭାରତ'ରେ ପ୍ରସାରିତ ହେବା ପରେ ତତ୍ପର ହୋଇ ଉଠିଥିଲା ଶିଶୁ ସୁରକ୍ଷା ବିଭାଗ । ଆଜି ଖୋର୍ଦ୍ଧା ଶିଶୁ ସୁରକ୍ଷା ୟୁନିଟର ସଦସ୍ଯ ପୁଷ୍ପଲତାଙ୍କ ଘରେ ପହଞ୍ଚି ଅସହାୟ ଅବସ୍ଥାରେ ଥିବା ତିନି ଭଉଣୀଙ୍କୁ ନିଜ ସାଙ୍ଗରେ ନେଇଥିବା ବେଳେ ଛୋଟ ପୁଅକୁ ଦାଦା ଖୁଡିଙ୍କ ଅନୁରୋଧ କ୍ରମେ ତାଙ୍କ ପାଖରେ ଛାଡି ଦେଇଥିଲେ ।

କିପରି ତିନି ଭଉଣୀ ଭଲ ପାଠ ପଢିବେ ତାହା ସହ ରହିବା ଖାଇବା କରିବେ ସେନେଇ ଶିଶୁ ସୁରକ୍ଷା ୟୁନିଟର ସଦସ୍ଯ ତାଙ୍କୁ ନିଜ ସାଙ୍ଗ ନେଇ ଖୋର୍ଦ୍ଧାରେ ଥିବା ଚାଇଲ୍ଡ ଲାଇନକୁ ନେଉଥିବା କହିଛନ୍ତି । ସୂଚନାଯୋଗ୍ୟ, ପୋଡାଡିହ ପଞ୍ଚାୟତ ନୀଳକଣ୍ଠପୁରର ପୁଷ୍ପଲତା ନାୟକ ବାପାମାଆଙ୍କ ମୃତ୍ୟୁ ପରେ ପରିବାରର ବୋଝ ମୁଣ୍ଡାଇଥିଲେ ।

ସୂଚନା ଅନୁଯାୟୀ ୨୦୧୬ ମସିହାରେ ହଠାତ୍ ପୁଷ୍ପଲତାଙ୍କ ଘରେ ନିଆଁ ଲାଗି ସବୁକିଛି ଉଜୁଡି ଯାଇଥିଲା । ଏହି ଅଗ୍ନିକାଣ୍ଡରେ ବାପାମାଆ ଆରପାରିକୁ ଚାଲି ଯାଇଥିଲେ । ଆଉ ନିଆଁର ଆଁରେ ଘରଦ୍ବାର ମଧ୍ୟ ପୋଡି ପାଉଁଶ ହୋଇଯାଇଥିଲା । ଏବେ ଯାହା କିଛି ରହିଛି ତାକୁ ସାଉଁଟି ଏମାନଙ୍କ ଜୀବନ ବିତୁଛି । ପରିବାର ଘରଦ୍ୱାର ନଥିବା ବେଳେ ପୁଷ୍ପଲତା ଅଧାରୁ ପାଠ ଛାଡିଦେଇଥିଲେ ।

ପୁଷ୍ପଲତାଙ୍କ ସାନ ଭଉଣୀ ଝିଲି ନାୟକ ଆର୍ଥିକ ଅଭାବରୁ ଗତବର୍ଷ ଠାରୁ ପାଠରେ ଡୋରି ବାନ୍ଧିଥିଲେ । ହେଲେ ତାଙ୍କର ଏବେବି ପାଠ ପଢ଼ିବା ପାଇଁ ଇଚ୍ଛା ଅଛି । ସେହିଭଳି ଅନ୍ୟ ଦୁଇ ଭାଇ ଭଉଣୀ ଗାଁ ପ୍ରାଥମିକ ବିଦ୍ୟାଳୟରେ ପାଠ ପଢୁଛନ୍ତି । ସରକାରୀ ସୁବିଧା କହିଲେ ଚାରି ଭାଇ ଭଉଣୀଙ୍କୁ ମିଳୁଛି ୧୫ କିଲୋ ଚାଉଳ । ଏପର୍ଯ୍ୟନ୍ତ ଭାଇର ନାମ ରାସନକାର୍ଡରେ ଅନ୍ତର୍ଭୁକ୍ତ ହୋଇନଥିବା ବେଳେ କାର୍ଡରେ ନାମ ସଂଯୋଗ ଓ ମୁଣ୍ଡ ଗୁଞ୍ଜିବା ପାଇଁ ଘରଟିଏ ପାଇଁ ପ୍ରଶାସନକୁ ନିବେଦନ କରିଛନ୍ତି । ଏହି ସମୟରେ ଶିଶୁ ସୁରକ୍ଷା ବିଭାଗ ତିନି ଭଉଣୀଙ୍କର ଦାୟିତ୍ବ ନେଇଛି ।

ଇଟିଭି ଭାରତ, ଖୋର୍ଦ୍ଧା