ଭୁବନେଶ୍ବର:ରାଜ୍ୟରେ ରହିଛନ୍ତି ମାଳ ମାଳ ଫେକ ସାର୍ଟିଫିକେଟଧାରୀ ଶିକ୍ଷକ । ଜାଲ ପ୍ରମାଣପତ୍ରଧାରୀ ୧୧୦ ନକଲି ଶିକ୍ଷକଙ୍କ ବିରୋଧରେ କେବେ ଗ୍ରହଣ କରାଯିବ କାର୍ଯ୍ୟାନୁଷ୍ଠାନ । ସମସ୍ତ ଶିକ୍ଷକଙ୍କ ରିପୋର୍ଟ ଜିଲ୍ଲା ଶିକ୍ଷା ଅଧିକାରୀ ମାନେ ପ୍ରଦାନ କରୁନାହାନ୍ତି । ଜାଲ ପ୍ରମାଣପତ୍ର ନେଇ ସ୍ପଷ୍ଟ ହେବା ପରେ ମଧ୍ୟ କାର୍ଯ୍ୟାନୁଷ୍ଠାନର ରିପୋର୍ଟ ପ୍ରାଥମିକ ଶିକ୍ଷା ନିର୍ଦ୍ଦେଶାଳୟକୁ ଦେଇନାହାନ୍ତି ୧୮ ଡିଇଓ । ସତ୍ୟପାଠ ଦାଖଲ ପାଇଁ ଆବଶ୍ୟକ ଥିବାରୁ ପୁଣିଥରେ ଏହି ୧୮ ଡିଇଓଙ୍କୁ ବିବରଣୀ ଦେବାକୁ କୁହାଯାଇଛି । ଅନୁଗୋଳ, ବାଲେଶ୍ବର, ଗଞ୍ଜାମ ଓ ଝାରସୁଗୁଡ଼ା ସମେତ କୋରାପୁଟ, ମୟୂରଭଞ୍ଜ, ରାୟଗଡ଼ା, ସୁନ୍ଦରଗଡ଼ ପରି ୧୮ ଜିଲ୍ଲା ଶିକ୍ଷା ଅଧିକାରୀଙ୍କୁ ଏନେଇ ପୁଣି ଚିଠି ଲେଖିଛି ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ।
ଏହା ମଧ୍ୟ ପଢନ୍ତୁ-ନକଲି ଶିକ୍ଷକ ପ୍ରସଙ୍ଗ: ଦୁଇ ଦିନ ଭିତରେ ରିପୋର୍ଟ ଦେବାକୁ DEO ଓ BEOଙ୍କୁ ନିର୍ଦ୍ଦେଶ
ଗତ ଏପ୍ରିଲ ସୁଦ୍ଧା ୨୬ ପ୍ରାଥମିକ ଶିକ୍ଷକ ନକଲି ପ୍ରମାଣପତ୍ରଧାରୀ ହୋଇଥିବା ସ୍ପଷ୍ଟ ହୋଇଛି । ହେଲେ ସେମାନଙ୍କ ବିରୋଧରେ ତଦନ୍ତ ଚାଲୁଥିବା କୁହାଯାଉଛି । ସେହିପରି ୮୪ ପ୍ରାଥମିକ ଶିକ୍ଷକ ନକଲି ପ୍ରମାଣପତ୍ରଧାରୀ ଜଣାପଡ଼ିବା ପରେ ସେମାନଙ୍କୁ ଚାକିରିରୁ ବହିଷ୍କାର କରାଯାଇଛି । ସମସ୍ତ ନକଲି ଶିକ୍ଷକଙ୍କ ବିରୋଧରେ ଏତଲା ଦିଆଯାଇଛି । ତେବେ କିଛି ଦିନ ହେଲା ନକଲି ଶିକ୍ଷକ ନେଇ ଅଭିଯୋଗ ହୋଇ ଆସୁଥିଲା । ଜାତି, ଜନ୍ମ ଓ ଶିକ୍ଷାଗତ ଯୋଗ୍ୟତା ଜାଲିଆତି ଖବର ନେଇ ଅଭିଯୋଗ ଆସୁଥିଲା । କିଛି ନକଲି ଶିକ୍ଷକ ଚାକିରିରୁ ବହିଷ୍କାର ମଧ୍ୟ ହୋଇଛନ୍ତି । ଏହା ସହ କିଛି ଶିକ୍ଷକ ମଧ୍ୟ ଗିରଫ ବି ହୋଇଛନ୍ତି । ଆଉ କିଛି ଶିକ୍ଷକଙ୍କ ବିରୋଧରେ ଅଭିଯୋଗ ମିଥ୍ୟା ପ୍ରମାଣିତ ହେବା ପରେ ପୁଣି ଚାକିରିରେ ଯୋଗଦାନ କରିଛନ୍ତି ।