ଯୁବକଙ୍କର ସନ୍ଦେହଜନକ ମୃତ୍ୟୁ, ତଦନ୍ତ ଦାବି କଲେ ପରିବାର ଲୋକେ

ଖୋର୍ଦ୍ଧା ଜିଲ୍ଲା ବୋଲଗଡ ବ୍ଲକ ଅନ୍ତର୍ଗତ ଅସରଳା ପଞ୍ଚାୟତ ପୁଆଣିଆ ଆମ୍ୱଗାଡିଆ ନିକଟ ଏକ ଚୂଆରୁ ଯୁବକଙ୍କ ମୃତଦେହ ଉଦ୍ଧାର । ପୋଲିସର ତଦନ୍ତ ଜାରି ।

ଖୋର୍ଦ୍ଧା: ବୋଲଗଡ ବ୍ଲକ ଅନ୍ତର୍ଗତ ଅସରଳା ପଞ୍ଚାୟତ ପୁଆଣିଆ ଗାଁରେ ଅଭାବନୀୟ ଘଟଣା । ପୁଆଣିଆ ଆମ୍ୱଗାଡିଆ ପାଖରେ ଥିବା ଏକ ଚୂଆରୁ ଜଣେ ଯୁବକଙ୍କର ମୃତଦେହ ଉଦ୍ଧାର ହୋଇଛି । ମୃତ ଯୁବକ ହେଲେ ସନ୍ତୋଷ କୁମାର ପ୍ରଧାନ ।

ସୂଚନାନୁଯାୟୀ, ସନ୍ତୋଷ ଦୁଇ ଦିନ ତଳୁ ନିଖୋଜ ରହିଥିବା ପରିବାର ପକ୍ଷରୁ ବୋଲଗଡ଼ ଥାନାରେ ଅଭିଯୋଗ ହୋଇଥିଲା । କିନ୍ତୁ ମଙ୍ଗଳବାର ତାଙ୍କର ମୃତଦେହ ଚୁଆରେ ଭାସୁଥିବାର ଦେଖିବାକୁ ମିଳିଥିଲା । ଖବରପାଇ ଘଟଣାସ୍ଥଳରେ ବୋଲଗଡ଼ ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।

ତେବେ ସନ୍ତୋଷ କିପରି ଭାବେ ଚୁଆରେ ପଡିଲେ ନା ତାଙ୍କ ମୃତ୍ୟୁ ପଛରେ ଅନ୍ୟ କିଛି କାରଣ ରହିଛି, ତାହାର ତଦନ୍ତ ଦାବି କରିଛନ୍ତି ପରିବାର ଲୋକେ।

ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ