ଜଗତସିଂହପୁର : ସମ୍ଭାବ୍ୟ ବାତ୍ୟା 'ଜୱାଦ'କୁ ନେଇ ପାରାଦୀପ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ପାରାଦୀପ ପୌର ପରିଷଦ ପକ୍ଷରୁ ବିଭିନ୍ନ ବସ୍ତି ଅଞ୍ଚଳର ଲୋକମାନଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ ପରାମର୍ଶ ଦିଆଯାଉଛି। ପାରାଦ୍ୱୀପ ନୋଳିଆ ସାହିରୁ ଏକାଧିକ ଲୋକେ ଡଙ୍ଗ ନେଇ ମାଛ ଧରିବା ପାଇଁ ସମୁଦ୍ରକୁ ଯାଇଥିବା ବେଳେ ଶୁକ୍ରବାର ସନ୍ଧ୍ୟା ସୁଦ୍ଧା ସେମାନଙ୍କୁ କୁଳକୁ ଫେରି ଆସିବାକୁ କୁହାଯାଇଛି। ସେହିପରି ବାତ୍ୟା ଦୁର୍ବଳ ନ ହେବା ପର୍ଯନ୍ତ ମତ୍ସ୍ୟଜୀବୀମାନେ ସମୁଦ୍ରକୁ ନ ଯିବାକୁ ପରାମର୍ଶ ଦିଆଯାଇଛି। ପୌର ପ୍ରଶାସନ ପକ୍ଷରୁ ଶୁକ୍ରବାର ସନ୍ଧ୍ୟାରୁ କାଚାଘରେ ରହୁଥିବା ବସ୍ତି ବାସିନ୍ଦା ଙ୍କୁ ସ୍ଥାନାନ୍ତରିତ କରାଯାଉଛି। ବାତ୍ୟା ଜୱାଦ, ପୁରୀ ରେ ସ୍ଥଳ ଭାଗ ଛୁଇଁବା ପରେ ଉପକୂଳ ଦେଇ ଗତି କରିବ।ଏହାର ପ୍ରଭାବରେ ପାରାଦ୍ୱୀପ ରେ ଅତିପ୍ରବଳ ବର୍ଷା ସାଙ୍ଗକୁ ପବନ ଓ ସମୁଦ୍ର ଅଶାନ୍ତ ରହିବ।ଏହାକୁ ଦୃଷ୍ଟିରେ ରଖି ପାରାଦ୍ୱୀପ ସମୁଦ୍ର କୂଳ କୁ ଯିବାକୁ ସାଧାରଣ ଲୋକଙ୍କୁ ବାରଣ କରାଯାଇଛି।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର,ଇଟିଭି ଭାରତ