ଭୁବନେଶ୍ବର:ଅପରାଧ ଘଟାଇ ମୁକୁଳା ବୁଲୁଛନ୍ତି ଅପରାଧୀ । ଚିନ୍ତା ବଢାଇଛନ୍ତି ରାଜଧାନୀର ଗଲିବଏ ଅଭିଯୁକ୍ତ । କେତେବେଳେ ଗଳିରେ ଦାଦାଗିରି ତ ପୁଣି କେତେବେଳେ ରାସ୍ତାରେ ଆତଙ୍କ ସୃଷ୍ଟି କରୁଛନ୍ତି । ସୁରକ୍ଷାବ୍ୟବସ୍ଥା କଡ଼ାକଡ଼ି ସତ୍ବେ ପୋଲିସକୁ ଆଖିଠାର ମାରି କାଣ୍ଡ ଭିଆଉଛନ୍ତି । ଆର ତାର ଟେର ପାଉନି ପୋଲିସ । ଯାହାକୁ ନେଇ ଆରମ୍ଭ ହୋଇଛି ଅପରେସନ ଗଲିବଏ । କ୍ରାଇମ କରି ଫେରାର ଥିବା କ୍ରିମିନାଲଙ୍କ ଉପରେ ଅପରେସନ ଆରମ୍ଭ କରିଛି ପୋଲିସ ।
କିଛି ଗଲିବଏ କ୍ରିମିନାଲଙ୍କ ଉପରେ ପୋଲିସ ନଜର ପକାଇଛି । ଯାହାର ଆଧାରରେ ବିଭିନ୍ନ ଥାନା ଅଞ୍ଚଳରେ ଛୋଟବଡ ଆତଙ୍କରାଜ, ମରଣାନ୍ତକ ଆକ୍ରମଣ ଆଦି ଘଟଣାର ଅପରାଧୀଙ୍କୁ ଗୋଡାଇ ଗୋଡାଇ ଧରୁଛି ପୋଲିସ । ଏହି କ୍ରମରେ ଖାରବେଳ ନଗର ଥାନା ଗତ ମେ ମାସରେ ମ୍ୟାଡ ମୁଲ ବାରରେ ଯୁବକକୁ ଆକ୍ରମଣ ଓ ବେକ କାଟିବା ମାମଲାରେ ଫେରାର ଥିବା ଅଭିଯୁକ୍ତକୁ କମିଶନରେଟ ପୋଲିସ ଗିରଫ କରିଛି । ଅଭିଯୁକ୍ତ ଜଣକ ଏୟାରପୋର୍ଟ ଥାନା ଅନ୍ତର୍ଗତ କେଦାରପଲ୍ଲୀ ବସ୍ତିର ଶୁଭମ ନାୟକ ଓରଫ ପାପୁନି ନାୟକ ହୋଇଥିବା ଜଣାପଡ଼ିଛି ।