ଭୁବନେଶ୍ବର: କୃଷି ଭବନରେ ଗୋମହିଷାଦିଙ୍କ ଠାରେ ଦେଖା ଦେଇଥିବା ଚର୍ମବିଣ୍ଡି ରୋଗର ସ୍ଥିତି ସଂପର୍କରେ ସମୀକ୍ଷା । ଚର୍ମବିଣ୍ଡି ପାଇଁ ଜିଲ୍ଲାସ୍ତରରେ ଖୋଲିବ କଣ୍ଟ୍ରୋଲ ରୁମ୍, ପ୍ରସ୍ତୁତ ହେବ ଆକ୍ସନ ପ୍ଲାନ । ଏନେଇ ସୂଚନା ଦେଇଛନ୍ତି ମତ୍ସ୍ୟ ଓ ପ୍ରାଣୀସଂପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ।
ମନ୍ତ୍ରୀ ସୂଚନା ଦେଇ କହିଛନ୍ତି ଯେ,''ରାଜ୍ୟରେ ଗୋମହିଷାଦିଙ୍କଠାରେ ଦେଖା ଦେଇଥିବା ଚର୍ମବିଣ୍ଡି ରୋଗ ନିୟନ୍ତ୍ରଣାଧୀନ ରହିଛି । ଏହା ଯେପରି ବ୍ୟାପି ନପାରେ ସେଥିପ୍ରତି ସମସ୍ତ ପ୍ରକାର ପ୍ରତିଷେଧକମୂଳକ ପଦକ୍ଷେପ ଓ ଚିକିତ୍ସା ବ୍ୟବସ୍ଥା ଗ୍ରହଣ କରାଯାଇଛି । ଗୋମହିଷାଦିଙ୍କ ଟୀକାକରଣକୁ ଯୁଦ୍ଧକାଳୀନ ଭିତ୍ତିରେ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଚର୍ମବିଣ୍ଡି ଯେପରି ବ୍ୟାପି ନପାରେ ସେଥିପାଇଁ ଆବଶ୍ୟକୀୟ ବ୍ୟବସ୍ଥା ଗ୍ରହଣ କରିବାକୁ ମଧ୍ୟ ନିର୍ଦ୍ଦେଶ ରହିଛି । ପ୍ରତି ଜିଲ୍ଲା ସଦର ମହକୁମାରେ କଣ୍ଟ୍ରୋଲ ରୁମ୍ ଖୋଲାଯିବା ସହ ଚର୍ମବିଣ୍ଡି ରୋଗ ସଂପର୍କିତ ସମସ୍ତ ତଥ୍ୟ ସଂଗ୍ରହ କରି ବିଭାଗକୁ ନିୟମିତ ପ୍ରେରଣ କରିବା ପାଇଁ ମନ୍ତ୍ରୀ କହିଛନ୍ତି'' ।
ପ୍ରତ୍ୟେକ ଜିଲ୍ଲାରେ ସ୍ଥାନୀୟ ସ୍ଥିତିକୁ ନିରୀକ୍ଷଣ କରି ଆବଶ୍ୟକ ପ୍ରତିଷେଧକ ଓ ଚିକିତ୍ସା ବ୍ୟବସ୍ଥା ଗ୍ରହଣ କରିବା ପାଇଁ ମନ୍ତ୍ରୀ ମୁଖ୍ୟ ଜିଲ୍ଲା ପ୍ରାଣୀଚିକିତ୍ସା ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଚର୍ମବିଣ୍ଡି ରୋଗ ଓ ଏହାର ନିରାକରଣ ସଂପର୍କରେ ବ୍ୟାପକ ଜନସଚେତନତା ସୃଷ୍ଟି ଦିଗରେ ଗଣମାଧ୍ୟମ ଓ ସାମାଜିକ ଗଣମାଧ୍ୟମର ବହୁଳ ବ୍ୟବହାର ସହିତ ସ୍ଥାନୀୟ ପଞ୍ଚାୟତିରାଜ ପ୍ରତିନିଧିଙ୍କୁ ସାମିଲ କରିବା ପାଇଁ ମନ୍ତ୍ରୀ କହିଛନ୍ତି । ଚର୍ମବିଣ୍ଡିରେ ପୀଡ଼ିତ ଗାଈଗୋରୁଙ୍କୁ ତୁରନ୍ତ ଚିକିତ୍ସା ସୁବିଧା ଯୋଗାଇଦେବା ପାଇଁ ‘ଆନିମଲ ହେଲ୍ପ ଲାଇନ୍’କୁ ନିର୍ଦ୍ଦେଶ ଦେବା ପାଇଁ ମଧ୍ୟ କୁହାଯାଇଛି ।