ପିଆଜ ଦରବୃଦ୍ଧି ନେଇ ରାଜ୍ୟ ଓ କେନ୍ଦ୍ର ସରକାରଙ୍କ ଉପରେ ବର୍ଷିଲା କଂଗ୍ରେସ ଭୁବନେଶ୍ବର:ରାଜ୍ୟରେ ଆକାଶ ଛୁଆଁ ପିଆଜ ଦର । ବଜାରରେ ପିଆଜ ମୂଲ୍ୟ ଏକ କେଜି ପିଛା 60 ଟପିଲାଣି । ପିଆଜ ଦରଦାମ ବୃଦ୍ଧିକୁ ନେଇ ତେଜିଲାଣି ଅସନ୍ତୋଷ । ଏହାରି ମଧ୍ୟରେ ରାଜ୍ୟ ସରକାରଙ୍କୁ ଟାର୍ଗେଟ କରିଛି କିଷାନ କଂଗ୍ରେସ । ପିଆଜ ଦରବୃଦ୍ଧିକୁ ବିରୋଧ କରି ନଭେମ୍ବର 10 ତାରିଖରୁ ପ୍ରତ୍ୟେକ ଜିଲ୍ଲାରେ କିଷାନ ମହାପଞ୍ଚାୟତ ବସିବା ନେଇ କହିଛି ଦଳ ।
"ରାଜ୍ୟରେ ପିଆଜ ମିଶନରେ ଫେଲ ମାରିଛନ୍ତି ରାଜ୍ୟ ସରକାର । ଦରଦାମ ନିୟନ୍ତ୍ରଣ କରିବାରେ ଏ ସ୍ଥାଣୁ ସରକାର ବିଫଳ । ତେଣୁ ଉଭୟ କୃଷିମନ୍ତ୍ରୀ ଏବଂ ଖାଦ୍ୟ ଯୋଗାଣ ମନ୍ତ୍ରୀ ନିଜ ପଦରୁ ଇସ୍ତଫା ଦିଅନ୍ତୁ ।" ଏଭଳି ଢଙ୍ଗରେ ରାଜ୍ୟ ସରକାର ଓ ଖାଦ୍ୟ ଯୋଗାଣ ମନ୍ତ୍ରୀଙ୍କ ଉପରେ ବର୍ଷିଛି କିଷାନ କଂଗ୍ରେସ । ରାଜ୍ୟ କିଷାନ କଂଗ୍ରେସର ରାଜ୍ୟ କାର୍ଯ୍ୟକାରିଣୀ ବୈଠକରେ ରାଜ୍ୟରେ ହୁହୁ ହୋଇ ପିଆଜ ଦର ବୃଦ୍ଧି ପାଉଥିବା ବେଳେ ଏହାକୁ ବିରୋଧ କରିବା ସହ ରାଜ୍ୟ ଓ କେନ୍ଦ୍ର ସରକାରଙ୍କୁ କଡା ସମାଲୋଚନା କରାଯାଇଛି । ଏଥିସହ ପ୍ରତ୍ୟେକ ଜିଲ୍ଲାରେ ନଭେମ୍ବର 10ରୁ କିଷାନ ମହାପଞ୍ଚାୟତ ବସିବା ନେଇ ଦଳ ପକ୍ଷରୁ ଘୋଷଣା କରାଯାଇଛି ।
ଏହାମଧ୍ୟ ପଢନ୍ତୁ..Kalahandi Foundation Day: ବିକାଶର ସଂଜ୍ଞାକୁ ନେଇ ପ୍ରଶ୍ନ ଉଠାଇଲା କଂଗ୍ରେସ
ତେବେ କିଷାନ କଂଗ୍ରେସ ଅଧ୍ୟକ୍ଷ ଅମୀୟ ପଟ୍ଟନାୟକ କହିଛନ୍ତି, "ଆସନ୍ତା ନଭେମ୍ବର 10 ତାରିଖରୁ ପ୍ରତ୍ୟେକ ଜିଲ୍ଲାରେ କିଷାନ ମହାପଞ୍ଚାୟତ ଅନୁଷ୍ଠିତ ହେବ । ଚାଷୀଙ୍କ ଅସୁବିଧା ନେଇ କିଷାନ କଂଗ୍ରେସ ପ୍ରତ୍ୟେକ ଜୋନରେ ଆରଡିସି କାର୍ଯ୍ୟାଳୟରେ ବିକ୍ଷୋଭ ପଦର୍ଶନ କରିବାର କାର୍ଯ୍ୟକ୍ରମ ରହିଛି । ରାଜ୍ୟ ସରକାରଙ୍କ ଚାଷୀ ମାରଣ ନୀତି ପାଇଁ ଚାଷୀ ଆଜି ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । 23 ବର୍ଷର ସରକାର ବିକାଶ ପରିବର୍ତ୍ତେ ବିନାଶ କରୁଛନ୍ତି ।"
ସେ ଆହୁରି କହିଛନ୍ତି, "ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଏବଂ ପ୍ରଧାନମନ୍ତ୍ରୀ ସିଞ୍ଚାଇ ଯୋଜନା ବିଫଳ ହୋଇଥିବା ଯୋଗୁଁ ଚାଷୀ ଆତ୍ମହତ୍ୟା କରୁଛି । ଧାନର ସର୍ବନିମ୍ନ ସହାୟକ ମୂଲ୍ୟ କେନ୍ଦ୍ର ସରକାର ବୃଦ୍ଧି କଲେ ନାହିଁ । ରାଜ୍ୟ ସରକାର କାଳିଆ ଯୋଜନା ଆଣିଲେ ହେଲେ ପ୍ରକୃତ ଚାଷୀ ସହାୟତା ନପାଇ ଶାସକ ଦଳର ନେତା ଓ କର୍ମୀ ଏହାର ସୁବିଧା ସୁଯୋଗ ପାଉଛନ୍ତି । ଜଳସେଚନ କଥା କହିଲେ ନସରେ। ରାଜ୍ୟରେ ସରକାର ପର୍ଯ୍ୟାପ୍ତ ଜଳସେଚନ ସୁବିଧା ଦେଇପାରିଲେ ନାହିଁ । ଖାଉଟି ସାମଗ୍ରୀ ଦର ହୁହୁ ହୋଇ ବଢିଚାଲିଛି । ପିଆଜ ଉତ୍ପାଦନରେ ସରକାର ଫେଲ ମାରିଛନ୍ତି । ଶୀତଳ ଭଣ୍ଡାର ବ୍ୟବସ୍ତା ସ୍ଥାଣୁ ପାଲଟିଛି । ତେଣୁ ଆଗାମୀ ଦିନରେ କିଷାନ କଂଗ୍ରେସ ରାଜରାସ୍ତାକୁ ଓହ୍ଲାଇବ। ତୀବ୍ର ପ୍ରତିବାଦ କରିବ।"
ତେବେ ଏହି କିଷାନ କଂଗ୍ରେସ କାର୍ଯ୍ୟାକାରିଣୀ ବୈଠକରେ ବୈଠକରେ ଇସ୍ତାହାର କମିଟି ମୁଖ୍ୟ ପଞ୍ଚାନନ କାନୁନଗୋ ଏବଂ ରାଜ୍ୟ ପଦାଧିକାରୀ ଉପସ୍ଥିତ ଥିଲେ।
ଇଟିଭି ଭାରତ, ଭୁବନେଶ୍ବର
