ଭୁବନେଶ୍ବର: ରାଜ୍ୟରେ ୧୯ଟି ଶିଳ୍ପ ପ୍ରକଳ୍ପର ଉଦଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୧୭ଟି ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ ହୋଇଥିବାବେଳେ ୨ଟି ପ୍ରକଳ୍ପର ଉଦଘାଟନ ହୋଇଛି । ଏଥିପାଇଁ ପ୍ରାୟ ୧୬୫୦ କୋଟି ଟଙ୍କାର ପୁଞ୍ଜିନିବେଶ ହେବାକୁ ଥିବାବେଳେ ୪୫୦୦ ନିଯୁକ୍ତି ସୁଯୋଗ ସୃଷ୍ଟି ହେବ । ଉଦଘାଟିତ ଓ ଭିତ୍ତିପ୍ରସ୍ତର ସ୍ଥାପନ ହୋଇଥିବା ଶିଳ୍ପ ମଧ୍ୟରେ ପ୍ଲାଷ୍ଟିକ, ସମୁଦ୍ର ଖାଦ୍ୟ ପ୍ରକ୍ରିୟାକରଣ, ଖାଦ୍ୟ ଉତ୍ପାଦନ, ଆଇଟି ଶିଳ୍ପ ରହିଛି । ଶିଳ୍ପଗୁଡିକ ପ୍ରତିଷ୍ଠା ହେଲେ ରାଜ୍ୟରେ ବ୍ୟାପକ ନିଯୁକ୍ତି ସୃଷ୍ଟି ହେବ ବୋଲି ମୁଖ୍ୟମନ୍ତ୍ରୀ ଆଶା ରଖିଛନ୍ତି ।
ମେକ ଇନ ଓଡ଼ିଶା ୨୦୨୨ରେ ରାଜ୍ୟରେ ନିବେଶ ପାଇଁ ପ୍ରସ୍ତାବ ଆସିଥିଲା । ଏହାକୁ ରାଜ୍ୟ ସରକାର ଅନୁମୋଦନ କରିଥିଲେ । ଓଡ଼ିଶାରେ ନିବେଶ ପାଇଁ ବ୍ୟାପକ ସୁବିଧା ସୁଯୋଗ ବିଷୟରେ କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ କହିଛନ୍ତି ଯେ, ନିବେଶ କ୍ଷେତ୍ରରେ ଆଉ ଏକ ମାଇଲଷ୍ଟୋନ । ଓଡ଼ିଶା ଏବେ ବିଭିନ୍ନ କ୍ଷେତ୍ରରେ ଆତ୍ମନିର୍ଭର ହୋଇଛି । ରାଜ୍ୟରେ ନିବେଶ ପାଇଁ ସରକାରଙ୍କ ପକ୍ଷରୁ ଅନୁକୂଳ ବାତାବରଣ ସୃଷ୍ଟି କରାଯାଉଛି । ଧାତୁ ଏବଂ ମିନେରାଲ୍ସ ଠାରୁ ଆରମ୍ଭ କରି ରାସାୟନିକ ଏବଂ ପେଟ୍ରୋକେମିକାଲ୍ସ ଏବଂ ଖାଦ୍ୟ ପ୍ରକ୍ରିୟାକରଣ ପର୍ଯ୍ୟନ୍ତ କ୍ଷେତ୍ରଗୁଡିକ ପାଇଁ ଓଡିଶା ଦେଶର ଏକ ପ୍ରମୁଖ ଉତ୍ପାଦନ ହବ୍ ଭାବରେ ଉଭା ହୋଇଛି ।
ଏକ ଉତ୍ସ-ନିର୍ଭରଶୀଳ, ଖଣିଜ ଭିତ୍ତିକ ଶିଳ୍ପ ବିକାଶରୁ ବିଭିନ୍ନ କ୍ଷେତ୍ର ମଧ୍ୟରେ ଅଧିକ ଦ୍ରୁତ, ବ୍ୟାପକ-ଆଧାରିତ ଏବଂ ଅନ୍ତର୍ଭୁକ୍ତ ଅର୍ଥନୈତିକ ଅଭିବୃଦ୍ଧିକୁ ସ୍ଥାନାନ୍ତରିତ ହେଉଛି ରାଜ୍ୟ । ଏକ ସମ୍ଭାବ୍ୟ ପୁଞ୍ଜି ବିନିଯୋଗ ଲକ୍ଷ୍ୟ ସ୍ଥଳ ଭାବରେ ଓଡି଼ଶାକୁ ପ୍ରତିଷ୍ଠିତ କରିବାକୁ ଚାହୁଁଥିବା ନିବେଶକଙ୍କୁ ଆବଶ୍ୟକ ସହାୟତା ପ୍ରଦାନ କରିବାକୁ ଏବଂ ଏହାର ଲୋକଙ୍କ ଅଭିବୃଦ୍ଧି ପାଇଁ ସର୍ବୋତ୍ତମ ସୁଯୋଗ ପ୍ରଦାନ କରିବାକୁ ସେ ନିଶ୍ଚିତ କରିଛନ୍ତି । ଶିଳ୍ପ ମନ୍ତ୍ରୀ ପ୍ରତାପ କେଶରୀ ଦେବ କହିଛନ୍ତି ଯେ, ଓଡି଼ଶା ଉତ୍ପାଦନ ହବ୍ ହେବ । ଶିଳ୍ପର ଅଭିବୃଦ୍ଧି ସହିତ ସ୍ଥାନୀୟ ଯୁବକ ଓ ଯୁବତୀଙ୍କୁ କର୍ମ ନିଯୁକ୍ତି ମିଳିପାରିବ ।
ମୁଖ୍ୟମନ୍ତ୍ରୀଙ୍କ ଏହି ଉଦ୍ୟମକୁ ମନ୍ତ୍ରୀ ପ୍ରଶଂସା କରିଛନ୍ତି । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଉନ୍ନୟନ କମିଶନର ଅନୁ ଗର୍ଗ, ପର୍ଯ୍ୟଟନ ବିଭାଗର ଅତିରିକ୍ତ ଶାସନ ସଚିବ ସୁରେନ୍ଦ୍ର କୁମାର ଓ ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ । ଦୁଇଟି ପ୍ଲାଷ୍ଟିକ କମ୍ପାନୀ ମୁଖ୍ୟମନ୍ତ୍ରୀଙ୍କ ଦ୍ଵାରା ଉଦଘାଟିତ ହୋଇଛି । କଟକ ଜିଲ୍ଲାର ନବନିର୍ମିତ ସୁପ୍ରିମ ଇଣ୍ଡଷ୍ଟ୍ରି କମ୍ପାନୀ ଓ ଆଶୀର୍ବାଦ ପାଇପ ପ୍ରାଇଭେଟ ଲିମିଟେଡ଼କୁ ଉଦଘାଟନ କରିଛନ୍ତି ମୂଖ୍ୟମନ୍ତ୍ରୀ । ଏହି କମ୍ପାନୀରେ ପାଇପ ଓ ଫିଟିଂ ସରଞ୍ଜାମ ପ୍ରସ୍ତୁତ କରାଯିବ । ଏଥିରେ ପ୍ରାୟ ୪୭୦ ଜଣଙ୍କ ଲାଗି ନିଯୁକ୍ତି ସୁଯୋଗ ସୃଷ୍ଟି ହେବ । ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ୬ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ହୋଇଛି । ସେଗୁଡିକ ହେଲା ସାଓ ବ୍ରେୱେରିଜ ଏବଂ ଡିଷ୍ଟିଲେରୀ ପ୍ରାଇଭେଟ ଲିମିଟେଡ, ଇଣ୍ଡିଆନ ପୋଟାଶ ଲିମିଟେଡ, ଗ୍ଲୋବସ ସ୍ପିରିଟ୍ସ ଲିମିଟେଡ, ଓରିକଲିନ୍ ପ୍ରାଇଭେଟ ଲିମିଟେଡ, ଅମୃତ ଧାରା ନ୍ୟୁଟ୍ରିଫୁଡ୍ସ LLP ଏବଂ DN ସି ସେଲସ ପ୍ରାଇଭେଟ ଲିମିଟେଡ । ଯାହା ମିଳିତ ଭାବେ ୧୪୫୯ ରୋଜଗାରର ସୁଯୋଗ ପ୍ରଦାନ କରିବ ।