ଭୁବନେଶ୍ବର:ଗୋପବନ୍ଧୁ ପ୍ରଶାସନିକ ଏକାଡେମୀ ପକ୍ଷରୁ ସିଭିଲ ସର୍ଭିସ ଦିବସ ଆୟୋଜିତ ହୋଇଯାଇଛି । ଏହି କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ କହିଛନ୍ତି, ସମାଜରେ ପରିବର୍ତ୍ତନ ଆଣିବା ପାଇଁ "ଟ୍ରାନ୍ସଫର୍ମେଟିଭ ଗଭର୍ଣ୍ଣାନ୍ସ"ର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଏହାସହିତ ସମାବେଶରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ଭିସି ଜରିଆରେ ପ୍ରଶାସନିକ ଅଧିକାରୀଙ୍କୁ ସମ୍ବୋଧିତ କରିଛନ୍ତି । ଲୋକସେବା ଭବନ କନଭେନ୍ସନ ସେଣ୍ଟରରେ ଆୟୋଜିତ ଏହି କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ବିଭାଗରେ କାର୍ଯ୍ୟରତ ଭାରତୀୟ ପ୍ରଶାସନିକ ସେବା ଅଧିକାରୀ, ପୋଲିସ ସେବା ଅଧିକାରୀ, ଓଡିଶା ପ୍ରଶାସନିକ ସେବା ଅଧିକାରୀ ଓ ଅନ୍ୟ ସମସ୍ତ ପ୍ରଶାସନିକ ସେବା ଅଧିକାରୀମାନେ ଯୋଗ ଦେଇଥିଲେ ।
ମୁଖ୍ୟମନ୍ତ୍ରୀ କହିଥିଲେ, "ସମ୍ବିଧାନ ଅନୁସାରେ ନାଗରିକ ହେଉଛନ୍ତି ଦେଶ ନିର୍ମାଣର ପ୍ରମୁଖ କ୍ଷେତ୍ର । ସେଥିପାଇଁ ସେମାନେ ଶାସନର କେନ୍ଦ୍ରବିନ୍ଦୁ ହେବା ଦରକାର । ଆମ ସରକାରଙ୍କ ଲକ୍ଷ୍ୟ ହେଉଛି ସ୍ୱଚ୍ଛ, ଉତ୍ତରଦାୟୀ ଏବଂ ଦାୟିତ୍ୱର ସହ ନାଗରିକମାନଙ୍କ କଲ୍ୟାଣକୁ ଗୁରୁତ୍ୱ ଦେବା । ବ୍ୟବସ୍ଥାରେ କେବଳ ଲକ୍ଷଣଗୁଡ଼ିକର ଚିହ୍ନଟ ପରିବର୍ତ୍ତେ ସମସ୍ୟାର ମୂଳ କାରଣଗୁଡିକ ଖୋଜି ବାହାର କରିବା ଦରକାର । ଆଉ ଏହାର ସମାଧାନ କରି ସମାଜରେ ମୌଳିକ ପରିବର୍ତ୍ତନ ଆଣିବା ପାଇଁ "ଟ୍ରାନ୍ସଫର୍ମେଟିଭ ଗଭର୍ଣ୍ଣେନ୍ସ" ଗୁରୁତ୍ବପୂର୍ଣ୍ଣ ।"
ମୁଖ୍ୟମନ୍ତ୍ରୀ ଆହୁରିମଧ୍ୟ କହିଥିଲେ ଯେ, ଓଡ଼ିଶାରେ ପ୍ରଶାସନିକ ସେବାରେ ଉଭୟ ଆଚରଣଗତ ଓ ଆଭିମୁଖ୍ୟରେ ଉନ୍ନତି ଘଟୁଛି । ନୂତନ ଜ୍ଞାନକୌଶଳ ପ୍ରଶାସନିକ ଅଧିକାରୀଙ୍କୁ ଅଧିକ ଉତ୍ତରଦାୟୀ ଏବଂ ଦକ୍ଷ କରାଇପାରିବ । ଏ ଦିଗରେ ୫ଟି ଉପକ୍ରମ ଏବଂ ମୋ ସରକାର ବିଷୟରେ ଲୋକଙ୍କ ଧାରଣାରେ ବାସ୍ତବ ପରିବର୍ତ୍ତନ ଆଣିବା ପାଇଁ ଉଦ୍ଧିଷ୍ଟ । ପୂର୍ବରୁ ସିଭିଲ ସର୍ଭିସ ପାରମ୍ପରିକ ଭାବରେ ଊର୍ଦ୍ଧ୍ୱରୁ-ନିମ୍ନ ଆଭିମୁଖ୍ୟ ଆଧାରରେ ଗଠିତ ହୋଇଥିଲା । କିନ୍ତୁ ଏହି ଆଭିମୁଖ୍ୟକୁ ଅଧିକ ନାଗରିକ କୈନ୍ଦ୍ରିକ ଶାସନ ଦୃଷ୍ଟିରୁ ସ୍ୱୀକୃତି ସହିତ କ୍ରମାଗତ ଭାବରେ ପରିବର୍ତ୍ତିତ ହେଉଛି । ବୈଷୟିକ ଜ୍ଞାନକୌଶଳର ଅଗ୍ରଗତି, ଜନସାଧାରଣଙ୍କ ଆଶା ଏବଂ ନାଗରିକମାନେ ଶାସନର ପ୍ରକୃତ ହିତାଧିକାରୀ ବୋଲି ସ୍ୱୀକୃତି ଭଳି କାରଣରୁ ଏହି ପରିବର୍ତ୍ତନ ଘଟୁଛି ।
ଅଧିକ ନାଗରିକ କେନ୍ଦ୍ରିକ ଏବଂ ସଫଳତା ଭିତ୍ତିକ ଆଭିମୁଖ୍ୟ ଉପରେ ଗୁରୁତ୍ୱ ଦେଉଛି ସରକାର । ବିଭିନ୍ନ ବିଭାଗ ଏବଂ ଅଂଶୀଦାରଙ୍କ ମଧ୍ୟରେ ଅଧିକ ସହଯୋଗକୁ ପ୍ରୋତ୍ସାହିତ କରୁଛି । ଏହାସହିତ ନିଷ୍ପତ୍ତି ନେବା ଏବଂ ସେବା ପ୍ରଦାନରେ ଉନ୍ନତି ଆଣିବା ପାଇଁ ଟେକ୍ନୋଲୋଜି ଏବଂ ଡାଟା ବିଶ୍ଲେଷଣ ଉପରେ ଗୁରୁତ୍ୱ ଦେଉଛନ୍ତି । ପ୍ରଶାସନିକ କର୍ମଚାରୀମାନେ ପରିବର୍ତ୍ତିତ ସମୟରେ ଅଧିକ ସକ୍ରିୟ, ସୃଜନଶୀଳ ହେବା ଏବଂ ପ୍ରଶାସନିକ ସେବାର ମାନସିକତା ଏବଂ ସଂସ୍କୃତିରେ ପରିବର୍ତ୍ତନ କରି "ପରିବର୍ତ୍ତନଶୀଳ ଶାସନ"ର ଉଦ୍ଦେଶ୍ୟକୁ ଫଳପ୍ରଦ କରିବାରେ ସହାୟକ ହୁଅନ୍ତୁ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ମୁଖ୍ୟ ବକ୍ତା ତଥା ଅବସରପ୍ରାପ୍ତ ବିଶିଷ୍ଟ ପ୍ରଶାସନିକ ଅଧିକାରୀ ଆଇଏଏସ ଅମରଜିତ ସିହ୍ନା 'ପରିବର୍ତ୍ତନକାରୀ ଶାସନ ପାଇଁ ପ୍ରଶାସନିକ ସେବା ପ୍ରସ୍ତୁତ କରିବା' ଶୀର୍ଷକରେ ପାଓ୍ୱାର ପଏଣ୍ଟ ଉପସ୍ଥାପନ ସହ ସାରଗର୍ଭକ ବକ୍ତବ୍ୟ ରଖିଛନ୍ତି । ସମ୍ପ୍ରତି ବିଗତ ବର୍ଷଗୁଡ଼ିକରେ ରାଜ୍ୟର ଅଭିବୃଦ୍ଧି ଏବଂ ଉପଲବ୍ଧି ବିଷୟରେ ସେ ତଥ୍ୟ ପ୍ରକାଶ କରିଛନ୍ତି । ଓଡିଶାର ୫ଟି ଉପକ୍ରମ ଆଧାରରେ ବିକାଶର ଧାରା, ପ୍ରଭାବଶାଳୀ ବିପର୍ଯ୍ୟୟ ପରିଚାଳନା, ମିଶନ ଶକ୍ତି, କ୍ରୀଡ଼ା କ୍ଷେତ୍ରର ସଫଳତା ଏବଂ ୨୦୨୨ର ଏମଏସଏମଇ ନୀତି ଇତ୍ୟାଦି ସହ ପ୍ରଶାସନିକ ସଂସ୍କାର ବିଷୟରେ ସେ ଉଲ୍ଲେଖ କରିଛନ୍ତି । ଦ୍ରୁତ ବିକାଶ ଏବଂ ଐତିହାସିକ ବିକାଶ ବିଭାଜନକୁ ଦୂର କରିବା ପାଇଁ ରାଜ୍ୟ ସରକାର ନିଜର ମାନବ ସମ୍ବଳ ବିନିଯୋଗ କରିବାକୁ ସେ ଅନୁରୋଧ କରିଛନ୍ତି ।
ଗୋପବନ୍ଧୁ ପ୍ରଶାସନିକ ଏକାଡେମୀର ମହାନିର୍ଦ୍ଦେଶକ ରାଜ କୁମାର ଶର୍ମା ଓଡ଼ିଶାରେ ସିଭିଲ ସର୍ଭିସ ଦିବସ-୨୦୨୩ ପାଳନ ଆଭିମୁଖ୍ୟ ସମ୍ପର୍କରେ ବକ୍ତବ୍ୟ ରଖିଥିଲେ । ସରକାରୀ କର୍ମଚାରୀଙ୍କ ନିଷ୍ଠା, କଠିନ ପରିଶ୍ରମ ଏବଂ ତ୍ୟାଗକୁ ସ୍ୱୀକୃତି ଦେବା ସହ ଏକ ସମାନ ଓ ସମୃଦ୍ଧ ସମାଜ ଗଠନ ଦିଗରେ କାର୍ଯ୍ୟ କରିବାର ପ୍ରତିବଦ୍ଧତାକୁ ଦୋହରାଇବା ପାଇଁ ସେ ସମସ୍ତଙ୍କୁ ସଚେତନ କରିଥିଲେ । ୫ଟି ଚାର୍ଟର ଏବଂ ଆକ୍ସନ ପ୍ଲାନ କାର୍ଯ୍ୟକାରୀ ହେବା ଦ୍ୱାରା ଓଡ଼ିଶାରେ ସୁଶାସନର ଗତି ଉପରେ ଏକ ଗଠନମୂଳକ ପ୍ରଭାବ ପଡ଼ିଛି ବୋଲି ସେ କହିଥିଲେ । ଏହାସହ ସମସ୍ତଙ୍କୁ ଯଥାସମ୍ଭବ ଶ୍ରେଷ୍ଠତା ପ୍ରଦର୍ଶନ କରିବାକୁ ଉଦ୍ୟମ କରିବା ପାଇଁ ସେ ଅନୁରୋଧ କରିଥିଲେ ।
ରାଜ୍ୟରେ ପ୍ରଥମ ଥର ପାଇଁ ଏଭଳି ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ଆୟୋଜନ କରାଯାଇଛି । ସେଥିପାଇଁ ମୁଖ୍ୟ ଶାସନ ସଚିବ ଗୋପବନ୍ଧୁ ପ୍ରଶାସନିକ ଏକାଡେମୀର ଡିଜି ରାଜ କୁମାର ଶର୍ମାଙ୍କୁ ପ୍ରଶଂସା କରିଛନ୍ତି । ଏହାକୁ ବାର୍ଷିକ କାର୍ଯ୍ୟକ୍ରମରେ ରଖିବାକୁ ସେ ଏକାଡେମୀକୁ ପରାମର୍ଶ ଦେଇଛନ୍ତି । ରାଜ୍ୟର ସମସ୍ତ ପ୍ରଶାସନିକ ସେବା ଅଧିକାରୀଙ୍କ କଠିନ ପରିଶ୍ରମ ଓ ପ୍ରୟାସକୁ ସ୍ୱୀକାର କରିବା ସହ ରାଜ୍ୟର ପ୍ରତ୍ୟେକ ନାଗରିକଙ୍କ ଜୀବନଧାରଣର ମାନ ବୃଦ୍ଧି ଉଦ୍ଦେଶ୍ୟରେ ୫ଟି ମଡେଲ ଅବଲମ୍ବନ କରିବା ଉପରେ ସେ ଗୁରୁତ୍ୱ ଦେଇଛନ୍ତି । ୧୯୯୯ ମହାବାତ୍ୟାରୁ ଓଡ଼ିଶାର ଯାତ୍ରା ବିଷୟରେ ସେ ବର୍ଣ୍ଣନା କରିଛନ୍ତି । ଯେଉଁଥିରେ ଦଶ ହଜାର ଲୋକଙ୍କ ମୃତ୍ୟୁ ଘଟିଥିଲା । ବିଗତ ବର୍ଷଗୁଡ଼ିକରେ ବଡ ଧରଣର ପ୍ରାକୃତିକ ବିପର୍ଯ୍ୟୟରେ ଶୂନ୍ୟ ମୃତ୍ୟୁ ଘଟିଛି ବୋଲି ସେ ପ୍ରକାଶ କରିଛନ୍ତି ।
ନାଗରିକ କୈନ୍ଦ୍ରିକ ଶାସନକୁ ସୁନିଶ୍ଚିତ କରିବା ପାଇଁ ମୁଖ୍ୟ ଶାସନ ସଚିବ ମୁଖ୍ୟମନ୍ତ୍ରୀଙ୍କ ବାର୍ତ୍ତାକୁ ଦୋହରାଇଛନ୍ତି । ପ୍ରକ୍ରିୟା ଏବଂ ପ୍ରକ୍ରିୟାକୁ ସରଳ କରିବା ପାଇଁ ଟେକ୍ନୋଲୋଜି ଏବଂ ଅଟୋମେସନ ବିକଶିତ କରିବାର ଆବଶ୍ୟକତା ରହିଛି । ଲୋକଙ୍କ ଆଶା, ଆକାଂକ୍ଷା, ଦାବି ଏବଂ ସରକାରଙ୍କ ସଫଳତାକୁ ଆଖି ଆଗରେ ସରକାର ଓ ଶାସନ ମଧ୍ୟରେ ସେତୁ ସଦୃଶ ଉତ୍ସର୍ଗୀକୃତ ଭାବେ କାର୍ଯ୍ୟ କରିବାକୁ ପରାମର୍ଶ ଦେଇଛନ୍ତି । ଅଭିଭାଷଣ ପରେ ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା ।
କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ପୋଲିସ ଡିଜି ସୁନିଲ କୁମାର ବଂଶଲ, ପ୍ରଧାନ ମୁଖ୍ୟ ବନ ସଂରକ୍ଷକ ତଥା ବନ ବାହିନୀ ମୁଖ୍ୟ ଦେବୀଦତ୍ତ ବିଶ୍ୱାଳ ପ୍ରମୁଖ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ । ଲୋକସେବା ଭବନ କନଭେନ୍ସନ ହଲରେ ରାଜ୍ୟର ପ୍ରଶାସନିକ ସେବାର ପ୍ରତିନିଧିତ୍ୱ କରୁଥିବା ସମସ୍ତ ଆଇଏଏସ, ଆଇଏଫଏସ, ଆଇପିଏସ ଏବଂ ଓଡିଶା ପ୍ରଶାନସିକ ସେବାର ପ୍ରାୟ ୫୦୦ରୁ ଊର୍ଦ୍ଧ୍ୱ ପ୍ରଶାସନିକ ଅଧିକାରୀମାନେ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ ।
ଇଟିଭି ଭାରତ, ଭୁବନେଶ୍ବର
