ଖୋର୍ଦ୍ଧାରୁ ପୁଣି ୨ ଲକ୍ଷରୁ ଉର୍ଦ୍ଧ୍ବ ମୂଲ୍ୟର ବ୍ରାଉନସୁଗାର ଜବତ, ୨ ଗିରଫ

ଖୋର୍ଦ୍ଧା ଜିଲ୍ଲାରେ ନିଶା କାରବାର ବୃଦ୍ଧି ପାଇବାରେ ଲାଗିଛି । ପ୍ରତିଦିନ ବ୍ରାଉନସୁଗାର ସହିତ ଲକ୍ଷାଧିକ ଟଙ୍କା ଜବତ କରାଯାଉଛି । ଜିଲ୍ଲାରେ ନିଶା କାରବାରର ଚେର ଲମ୍ବିବାରେ ଲାଗିଛି । ଅଧିକ ପଢନ୍ତୁ..........

ଖୋର୍ଦ୍ଧା: ପୁଣି ବ୍ରାଉନସୁଗାର ଜବତ । ଖୋର୍ଦ୍ଧା ଆଦର୍ଶ ଥାନା ପୋଲିସ ଅଭିଯୁକ୍ତଙ୍କ ଠାରୁ ବ୍ରାଉନସୁଗାର ସହ ନଗଦ ଟଙ୍କା, କାର ଓ ମୋବାଇଲ ଫୋନ ଜବତ କରାଯାଇଛି ।

ଖୋର୍ଦ୍ଧା ଆଦର୍ଶ ଥାନା ପୋଲିସ ମୋନାର୍ଚ୍ଚ ପ୍ୟାଲେସ ନିକଟ ଶାଗୁଆନ ବଗିଚା ନିକଟରୁ ବ୍ରାଉନସୁଗାର ବିକ୍ରି କରିବା ଅଭିଯୋଗରେ ଦୁଇ ଜଣଙ୍କୁ ଗିରଫ କରିଛି । ସେମାନଙ୍କ ନିକଟରୁ ପୋଲିସ ୨୦.୦୭ଗ୍ରାମ ବ୍ରାଉନସୁଗାର ଜବତ କରିଛି । ଏହା ସହ ମୋବାଇଲ ଫୋନ ,କାର ଏବଂ ନଗଦ ୯୩ ହଜାର ୮୭୦ ଟଙ୍କା ଜବତ କରାଯାଇଛି । ଗିରଫ ଦୁଇ ଅଭିଯୁକ୍ତ ହେଲେ ଅନୁଗୋଳ ଜିଲ୍ଲାର ଅପିନ ଦାସ ଏବଂ କେନ୍ଦୁଝର ଜିଲ୍ଲାର ବସନ୍ତ ଜେନା । ଜବତ ବ୍ରାଉନସୁଗାରର ମୂଲ୍ୟ 2 ଲକ୍ଷ ସାତ ହଜାର ଟଙ୍କାରୁ ଅଧିକ ହେବ ବୋଲି ଜଣାପଡିଛି ।

ସେହିଭଳି ଅବକାରୀ ବିଭାଗ ପକ୍ଷରୁ ଆଜି ସକାଳେ ଚଢାଉ କରି ବ୍ରାଉନସୁଗାର ଜବତ କରାଯାଇଛି। ଚଢାଉରେ 16 ଗ୍ରାମ ବ୍ରାଉନସୁଗାର ସହ ଜଣେ ଅଭିଯୁକ୍ତକୁ ଗିରଫ କରିଛି । ବ୍ରାଉନସୁଗାରର ଆନୁମାନିକ ମୂଲ୍ୟ 1 ଲକ୍ଷ 60 ହଜାର ଟଙ୍କା ହେବ । ତେବେ ଖୋର୍ଦ୍ଧାରେ ଦିନକୁ ଦିନ ନିଶା କାରବାର ବୃଦ୍ଧି ପାଇବାରେ ଲାଗିଛି । ଜିଲ୍ଲାରେ ନିଶାମୁକ୍ତ କରିବାପାଇଁ ଅବକାରୀ ବିଭାଗ ଓ ଖୋର୍ଦ୍ଧା ପୋଲିସ ପକ୍ଷରୁ ବାରମ୍ବାର ଚଢାଉ କରାଯାଉଛି । ଖୋର୍ଦ୍ଧା ଜିଲ୍ଲାରେ ନିଶାକାରବାର ବୃଦ୍ଧି ପାଉଛି କିନ୍ତୁ ହ୍ରାସ ପାଇପାରୁନାହିଁ ।

ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ