ଜୟଙ୍କ ଇତିହାସ ଖୋଲିଲେ ସସ୍ମିତ, ବିଜେପିର କାର୍ଯ୍ୟାନୁଷ୍ଠାନ ପାଇଁ କଲେ ଦାବି

ପୂର୍ବରୁ ନେତାମାନେ ଶାସକ ଦଳ ଦ୍ବାରା ପରିଚାଳିତ ହେଉଥିଲେ । ମାତ୍ର ସେ ସେପରି ହୋଇପାରିବେ ନାହିଁ ବୋଲି ବିରୋଧୀ ଦଳ ନେତା କହିବା ପରେ ତାଙ୍କୁ ଟାର୍ଗେଟ କରିଛନ୍ତି ବିଜେଡି ସାଂସଦ । ଜୟଙ୍କ ଇତିହାସ ଖୋଲିବା ସହିତ ବିଜେପି କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ସେ ଦାବି କରିଛନ୍ତି । ଅଧିକ ପଢନ୍ତୁ

ଭୁବନେଶ୍ବର:ପୂର୍ବରୁ ନେତାମାନେ ଶାସକ ଦଳ ଦ୍ବାରା ପରିଚାଳିତ ହୋଇଥିଲେ । କିନ୍ତୁ ସେ ସେଭଳି ହୋଇପାରିବେ ନାହିଁ । ତେଣୁ ଶାସକ ଦଳ ତାଙ୍କ ପଛରେ ପଡିଛନ୍ତି । ବିରୋଧୀ ଦଳର ନେତା ଜୟନାରାୟଣ ମିଶ୍ର ଏପରି କହିବା ପରେ ତାଙ୍କୁ କଡା ଭାଷାରେ ସମାଲୋଚନା କରିଛନ୍ତି ବିଜେଡି ସାଂସଦ ସସ୍ମିତ ପାତ୍ର । ଏଭଳି ଅଭିଯୋଗ ପାଇଁ ଜୟଙ୍କ ବିରୋଧରେ ବିଜେପି କାର୍ଯ୍ୟାନୁଷ୍ଠାନ ଲାଗି ସେ ଦାବି କରିଛନ୍ତି ।

ଜୟଙ୍କ ମନ୍ତବ୍ୟର ପୋଷ୍ଟମର୍ଟମ କରିଛି ବିଜେଡି । ବିଜେଡିର ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର କହିଛନ୍ତି , "ଜୟନାରାୟଣଙ୍କ ମନ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟଜନକ । ପୂର୍ବତନ ବିରୋଧୀ ଦଳର ନେତା ତଥା ବିଜେପି ବିଧାୟକ ପ୍ରଦୀପ୍ତ ନାୟକଙ୍କ ବିରୋଧରେ ଜୟ ଗୁରୁତର ଅଭିଯୋଗ ଆଣିଛନ୍ତି । ଯିଏକି ଗୁରୁତର ସ୍ବାସ୍ଥ୍ୟ ସମସ୍ୟାରୁ ସୁସ୍ଥ ହେଉଛନ୍ତି । ଆହୁରି ଦୁଃଖଦାୟକ ଏବଂ ଦୁର୍ଭାଗ୍ୟଜନକ ଯେ ବିରୋଧୀ ଦଳର ପୂର୍ବତନ ଉପନେତା ସ୍ବର୍ଗତ ବିଷ୍ଣୁ ଚରଣ ସେଠୀ ଯିଏକି ତାଙ୍କ ପୂର୍ବରୁ ଜଣେ ନେତା ଥିଲେ ସେ ମଧ୍ୟ ସରକାରୀ ଦଳ ଦ୍ବାରା ପରିଚାଳିତ ହେଉଥିଲେ । ବିଧାନସଭାରେ ବିଜେପି ଦଳର ମୁଖ୍ୟ ସଚେତକ ଥିବା ମୋହନ ଚରଣ ମାଝିଙ୍କ ବିରୁଦ୍ଧରେ ସରକାରୀ ଦଳ ଦ୍ବାରା ପରିଚାଳିତ ହେଉଥିବା ଜୟ ଅଭିଯୋଗ ଆଣିଛନ୍ତି, ଯାହାକି ଅତ୍ୟନ୍ତ ଦୁଃଖଦାୟକ ।"

ଅନ୍ୟପଟେ ରାଜ୍ୟ ବିଜେପି ସଭାପତି ସମୀର ମହାନ୍ତି ଯିଏକି ଜୟନାରାୟଣ ମିଶ୍ରଙ୍କ ଦ୍ବାରା ଚପଲ ମାଡର ଶିକାର ହୋଇଥିଲେ । କିନ୍ତୁ ଆଜି ସମୀର ମହାନ୍ତି ନୀରବ କାହିଁକି ବୋଲି ସସ୍ମିତ ପ୍ରଶ୍ନ କରିଛନ୍ତି । ସେ ବିଜେପି ବିଧାୟକ ତଥା ପୂର୍ବତନ ବିଜେପି ନେତା ତଥା ବିରୋଧୀ ଦଳର ଉପନେତା ତଥା ବର୍ତ୍ତମାନର ବିଜେପି ମୁଖ୍ୟ ସଚେତକଙ୍କ ପକ୍ଷରୁ କଥା ହେବା ଏବଂ ଉତ୍ତର ଦେବା ଉଚିତ ବୋଲି କହିଛନ୍ତି ସସ୍ମିତ ।

ସସ୍ମିତ ଆହୁରି କହିଛନ୍ତି, "ଓଡ଼ିଶା ବିଜେପି ସଭାପତି ସମୀର ମହାନ୍ତି ବର୍ତ୍ତମାନ ଏହି ଦୁର୍ଦ୍ଦାନ୍ତ ଅପରାଧୀ ତଥା ହତ୍ୟାକାରୀ ଜୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ । ଯେତେବେଳେ ଦଳୀୟ ନେତା ତାଙ୍କ ନେତାଙ୍କ ବିରୋଧରେ ମିଡିଆ ଆଗରେ କହୁଛନ୍ତି ଏ ବାବଦରେ ସମୀର ମହାନ୍ତି ସ୍ପଷ୍ଟୀକରଣ ରଖନ୍ତୁ । ଜୟ ତାଙ୍କୁ ମାଡ଼ ମରାଇବା ସହିତ ବର୍ତ୍ତମାନ ନିଜ ଦଳର ନେତାଙ୍କ ଉପରେ ମଧ୍ୟ ଆକ୍ରମଣ ଆରମ୍ଭ କରିଛନ୍ତି ।" କାର୍ଯ୍ୟାନୁଷ୍ଠାନ ନେବାକୁ ସସ୍ମିତ ଦାବି କରିଛନ୍ତି ।

ଇଟିଭି ଭାରତ, ଭୁବନେଶ୍ବର