ଭୁବନେଶ୍ବର: ବିବାଦୀୟ ହୋଇଛନ୍ତି ବିଜେଡି ବିଧାୟକ ତଥା ଶ୍ରମ ମନ୍ତ୍ରୀ ଶ୍ରୀକାନ୍ତ ସାହୁ । ଜୈନକା ମହିଳା ଶ୍ରୀକାନ୍ତଙ୍କ ବିରୋଧରେ ଥାନାର ଦ୍ବାରସ୍ଥ ହେବା ପରେ ବଢ଼ିଛି ଶାସକ ଦଳର ଅଡ଼ୁଆ । ତେବେ ମହିଳା ଜଣଙ୍କ ଖୋଦ ଶ୍ରମ ମନ୍ତ୍ରୀ ଶ୍ରୀକାନ୍ତ ସାହୁଙ୍କ ବିରୋଧରେ ଏଭଳି ସଙ୍ଗୀନ ଅଭିଯୋଗ ଆଣିବା ଘଟଣା ବିରୋଧିଙ୍କୁ ସୁହାଇଛି । ଏହି ଘଟଣାକୁ ନେଇ ରାଜ୍ୟ ସରକାରଙ୍କୁ ଘେରିଛି ବିଜେପି । ମନ୍ତ୍ରୀଙ୍କର ଇସ୍ତଫା ଦାବି କରିବା ସହିତ ପୋଲିସକୁ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ଆହ୍ବାନ କରିଛନ୍ତି ବିରୋଧୀ । ତେବେ ମନ୍ତ୍ରୀ ଶ୍ରୀକାନ୍ତ ଅଭିଯୋଗର ଜବାବ ରଖିନଥିବା ବେଳେ ପ୍ରତିକ୍ରିୟା ରଖିଛନ୍ତି ବିଜେଡିର ବରିଷ୍ଠ ବିଧାୟକ ଭାଗିରଥି ସେଠୀ ।
ଭାଗିରଥି କହିଛନ୍ତି, "ଶ୍ରମ ମନ୍ତ୍ରୀ ଶ୍ରୀକାନ୍ତ ସାହୁଙ୍କ ବିରୋଧରେ ଆସିଥିବା ଶୋଷଣ ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ । ମୋ ଜାଣିବାରେ ମନ୍ତ୍ରୀ ଶ୍ରୀକାନ୍ତ ସାହୁ ଜଣେ ବହୁତ ଭଲ ଲୋକ । ସେ ଏଭଳି କାର୍ଯ୍ୟ କେବେ କରିନଥିବେ । କାରଣ ସେ ସେଭଳି ଚରିତ୍ରର ଲୋକ ନୁହଁନ୍ତି । ଏହା ବିରୋଧୀଙ୍କର ଅପପ୍ରଚାର । ପୂର୍ବରୁ ମଧ୍ୟ ଅନେକ ମନ୍ତ୍ରୀଙ୍କ ନାଁରେ ଅପପ୍ରଚାର କରିଛନ୍ତି ବିରୋଧି । ଅରୁଣ ସାହୁ, ପ୍ରତାପ ଜେନା ଓ ଦିବ୍ୟଶଙ୍କର ମିଶ୍ରଙ୍କ ନାଁରେ ଅଭିଯୋଗ କରିଛନ୍ତି । ଏଭଳି ବହୁତ ଲୋକ ଓ ନେତାଙ୍କ ନାଁରେ ଅପପ୍ରଚାର କରିଛନ୍ତି । ଏହା ମଧ୍ୟ ତା ଭିତରୁ ଗୋଟିଏ । ଏଠାରେ ବିଜେପି ଓ କଂଗ୍ରେସ ଭାଇ ଭାଇ । ସେମାନେ ମିଶି ଏଭଳି ଅପପ୍ରଚାର କରୁଛନ୍ତି । ବିରୋଧୀଙ୍କର ଏହା ମନଗଢା କାହାଣୀ । ତେଣୁ ଏହା ତଦନ୍ତ ସାପେକ୍ଷ ।" ତେବେ ଏଭଳି ଅପପ୍ରଚାର କଲେ କଣ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କୁ(ଶ୍ରୀକାନ୍ତଙ୍କୁ) ମନ୍ତ୍ରୀମଣ୍ଡଳରୁ ବାଦ ଦେଇଦେବେ କି ବୋଲି ପ୍ରଶ୍ନ କରିଛନ୍ତି ଭାଗିରଥି ।