ଭୁବନେଶ୍ବର: ହକି ବିଶ୍ବକପ୍ ପାଇଁ ଫୋକସରେ ଏୟାରପୋର୍ଟ । ବିଦେଶୀ ଖେଳାଳି ଓ ମ୍ୟାଚ ଅଫିସିଆଲଙ୍କ ସମେତ ଭିଭିଆଇପି ଏବଂ ପର୍ଯ୍ୟଟକ ୪ ତାରିଖରୁ ଆସିବେ ଓଡ଼ିଶା । ଏନେଇ ଆସନ୍ତା ୩ ତାରିଖରୁ ଏୟାରପୋର୍ଟରେ ରହିବ ୨୪ ଘଣ୍ଟିଆ ସୁରକ୍ଷା ବ୍ୟବସ୍ଥା । ସୁରକ୍ଷା ବ୍ୟବସ୍ଥା ସହ ସୁରୁଖୁରୁରେ ପର୍ଯ୍ୟଟକଙ୍କ ପାଇଁ ଆଗମନ ନେଇ ସୁରକ୍ଷାର ତଦାରଖ କରିଛନ୍ତି ଭୁବନେଶ୍ବର ଡିସିପି । ଏୟାରପୋର୍ଟରୁ ବୋମା ମିଳିବା ଘଟଣାକୁ ଗୁଜବ ବୋଲି ସ୍ପଷ୍ଟ କରିଛନ୍ତି ଏୟାରପୋର୍ଟ ନିର୍ଦ୍ଦେଶକ ।
ଏୟାରପୋର୍ଟରେ ଖେଳାଳିଙ୍କ ପ୍ରବେଶ, ପ୍ରସ୍ଥାନ ଓ ପର୍ଯ୍ୟଟକଙ୍କ ଆଗମନ ଓ ଟାକ୍ସି ଅପରେସନ ସହ ସଭିଙ୍କ ଜରୁରୀ ଯୋଗାଯୋଗ ପାଇଁ ହେଲ୍ପଡେସ୍କର ବ୍ୟବସ୍ଥା କରାଯିବ । ଜଣେ ଏୟାରପୋର୍ଟ ଅଧିକାରୀଙ୍କ ନେତୃତ୍ବରେ ଏୟାରପୋର୍ଟରେ ରହିବେ ୪ ଏସିପିଙ୍କ ସହ ୪ ଇନସ୍ପେକ୍ଟର ଓ ୧୬ ଜଣ ସବ ଇନସ୍ପେକ୍ଟର । ଏହାସହ ୨ ପ୍ଲାଟୁନ ଫୋର୍ସ ଏୟାରପୋର୍ଟରେ ସୁରୁଖୁରୁ ଯିବାଆସିବା ଓ ଖେଳାଳିଙ୍କୁ ଏୟାରପୋର୍ଟରୁ ବାହାରିବା ପର୍ଯ୍ୟନ୍ତ ମୁତୟନ ରହିବା ପାଇଁ ବ୍ୟବସ୍ଥା ହେବ । ଆସନ୍ତା ୩ ତାରିଖରୁ ୨୪ ଘଣ୍ଟିଆ ସୁରକ୍ଷା ଡ୍ୟୁଟିରେ ରହିବେ ପୋଲିସ କର୍ମଚାରୀ । ଏନେଇ ଏୟାରପୋର୍ଟ ଭିତରେ ରହିବାକୁ ଥିବା ଏୟାରପୋର୍ଟ ସିଆଇଏସଏଫ କର୍ମଚାରୀଙ୍କ ଓ ଏୟାରପୋର୍ଟ ଅଥରିଟିଙ୍କ ସହ ଆଲୋଚନା କରିଛନ୍ତି ଭୁବନେଶ୍ୱର ଡିସିପି ।