ଭୁବନେଶ୍ବର: ଲିଙ୍ଗରାଜ ମନ୍ଦିର ଚତୁଃପାର୍ଶ୍ୱର ସ୍ଥିତି ଅନୁଧ୍ୟାନ କଲେ ବିଡିଏ ଉପାଧ୍ୟକ୍ଷ ବଲୱନ୍ତ ସିଂହ । ହକି ବିଶ୍ୱକପ ଆୟୋଜନକୁ ଦୃଷ୍ଟିରେ ରଖି ବିଭିନ୍ନ ଅଧୁରା କାର୍ଯ୍ୟକୁ ଡିସେମ୍ବର ଶେଷ ସୁଦ୍ଧା ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି । ନିର୍ଦ୍ଦେଶ କେତେଦୂର ପାଳନ ହେଉଛି ତାକୁ ପୁଣି ୭ ଦିନ ମଧ୍ୟରେ ଅନୁଧ୍ୟାନ କରାଯିବ ବୋଲି ସେ ବିଭାଗୀୟ ଅଧିକାରୀଙ୍କୁ ତାଗିଦ କରିଛନ୍ତି ବିଡିଏ ଉପାଧ୍ୟକ୍ଷ ।
ବିଡିଏ ଉପାଧ୍ୟକ୍ଷଙ୍କ ଏହି ଗସ୍ତ ବେଳେ ଖୋର୍ଦ୍ଧା ଜିଲ୍ଲାପାଳ କେ ସୁଦର୍ଶନ ଚକ୍ରବର୍ତ୍ତୀ, ଅତିରିକ୍ତ ପୋଲିସ କମିଶନର ଉମାଶଙ୍କର ଦାସ, ASI ଅଧିକାରୀ, ମନ୍ଦିର ପ୍ରଶାସନ, ୱାଟକୋ ବିଭାଗ, ପୂର୍ତ୍ତ ବିଭାଗ ସମେତ ବିଏମସିର ବିଭିନ୍ନ ଅଧିକାରୀଙ୍କ ଉପସ୍ଥିତ ଥିଲେ । ପରିମଳ ଓ ଯାତାୟତ ପାଇଁ ରାସ୍ତାଘାଟରେ ଯେଭଳି କୌଣସି ସମସ୍ୟା ନରୁହେ ଏବଂ ଜବରଦଖଲକୁ ଆଦୌ ପ୍ରଶ୍ରୟ ନଦେବାକୁ ସ୍ପଷ୍ଟ କରିଛନ୍ତି ବିଡିଏ ଉପାଧ୍ୟକ୍ଷ । ବିଶ୍ୱକପ ଅବସରରେ ଦେଶ ବିଦେଶରୁ ବହୁ ପର୍ଯ୍ୟଟକଙ୍କ ସମାଗମ ହେବାକୁ ଥିବାବେଳେ ସେମାନଙ୍କ ସୁରକ୍ଷା ଦିଗରେ ଦୃଷ୍ଟି ଦେବାକୁ କହିଛନ୍ତି ଏହି ବରିଷ୍ଠ ଅଧିକାରୀ ।