ଖୋର୍ଦ୍ଧା:ପୋଲିସ ପଞ୍ଝାରେ ବ୍ୟାଟେରୀ ଚୋର ଗ୍ୟାଙ୍ଗ। ବେଗୁନିଆ ଥାନା ଅନ୍ତର୍ଗତ ଟିକାତାଳ ଗ୍ରାମରେ ଥିବା ରିଲାଏନ୍ସ ଟେଲିଫୋନ ଟାଓ୍ବାରର ଲୁହା ଗ୍ରୀଲ ଗେଟ୍ ଭାଙ୍ଗି ବ୍ୟାଟେରୀ ଚୋରି କରିବାକୁ ଉଦ୍ୟମ । ତେବେ ଗତ ୮ ତାରିଖ ରାତ୍ରି ୨ଟା ବେଳେ ୩ଜଣ ଚୋର ଏକ କାରରେ ଆସି ବ୍ୟାଟେରୀ ଚୋରି କରୁଥିବା ବେଳେ ରିଲାଏନ୍ସ ଟାଓ୍ବାରର ପ୍ରାଟ୍ରୋଲିଂ କର୍ମଚାରୀ ଘଟଣା ସ୍ଥଳରେ ପହଞ୍ଚି ଥିଲେ । ଫଳରେ ଏହା ଜାଣିପାରି ଚୋରମାନେ ଘଟଣା ସ୍ଥଳରୁ ଫେରାର୍ ଯାଇଥିଲେ।
କିନ୍ତୁ ସେମାନେ ଆଣିଥିବା ଏକ କାର( ନଂ OD 13 B 7700)କୁ ଘଟଣାସ୍ଥଳରେ ଛାଡି ଚାଲିଯାଇଥିଲେ । ଏହି ଘଟଣାକୁ ନେଇ ରିଲାଏନ୍ସ ଟାୱାର କର୍ମଚାରୀ ରତି ରଞ୍ଜନ ପୁଷ୍ଟି ବେଗୁନିଆ ଥାନାରେ ଅଭିଯୋଗ ପରେ ଏକ ମାମଲା ରୁଜୁ ହୋଇଥିଲା । ତେବେ ଏହି ଚୋରି ରେ ଆନ୍ତଃରାଜ୍ୟ ଚୋର ଦଳଙ୍କ ସମ୍ପୃକ୍ତି ଥିବା ଜାଣିବାକୁ ପାଇଥିଲେ । ପରେ ଖୋର୍ଦ୍ଧା ଏସପି ସିଦ୍ଧାର୍ଥ କାଟାରିଆ ଘଟଣାର ତଦନ୍ତ ତ୍ବରାନ୍ବିତ କରିବାକୁ ବେଗୁନିଆ ଥାନା ଅଧିକାରୀ ଲକ୍ଷ୍ମୀ ପ୍ରଶାଦ ଶତପଥୀଙ୍କୁ ନିର୍ଦ୍ଦେଶ ଦେଇଥିଲେ । ଏସଡିପିଓ ଦିଲ୍ଲୀପ କୁମାର ଦାସଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ବେଗୁନିଆ ପୋଲିସ ତଦନ୍ତ ତ୍ବରାନ୍ବିତ କରିବା ସହ କାର୍ର ନମ୍ବର ଓ ମୋବାଇଲ ଟାଓ୍ବାରର CCTV ଫୁଟେଜକୁ ଭିତ୍ତି କରି ଅପରାଧୀମାନଙ୍କୁ ଭୁବନେଶ୍ୱରର ବଡଗଡ ଅଞ୍ଚଳରୁ ଧରିବାରେ ସକ୍ଷମ ହୋଇଥିଲା ।