ଖୋର୍ଦ୍ଧା: ରାଜ୍ୟ ମିଳିତ ସାବଲମ୍ବୀ କାରୀଗର ସଙ୍ଘ ତଥା ଖୋର୍ଦ୍ଧା ବ୍ଳକ ପକ୍ଷରୁ ସୋମବାର ବ୍ଳକ କାର୍ଯ୍ୟାଳୟ ପରିସରରେ ବିକ୍ଷୋଭ ପ୍ରଦର୍ଶନ ଜାରି ରହିଛି । ଏହି ଅବସରରେ ସଙ୍ଘ ପକ୍ଷରୁ ବିଡିଓ ରୁମାନା ଜାଫ୍ରିଙ୍କୁ ଏନେଇ ଏକ ଦାବିପତ୍ର ପ୍ରଦାନ କରାଯାଇଛି । ସୂଚନାନୁଯାୟୀ ୨୦୦୬ ମସିହାରେ ରାଜ୍ୟ ସରକାର ଗ୍ରାମ୍ୟ ପାଇପ ଲାଇନ ଜଳଯୋଗାଣ ବ୍ୟବସ୍ଥା ଆରମ୍ଭ କଲେ । ବିନା ପାରିଶ୍ରମିକରେ ଶ୍ରମିକ ମାନଙ୍କୁ ସ୍ବାବଲମ୍ବୀ ଆଖ୍ୟା ଦେଇ ପ୍ରଥମେ ୩୫୦ ଏବଂ ପରେ ୫ଶହ ଟଙ୍କାର ପ୍ରାପ୍ୟ ପ୍ରଦାନ କଲେ । ୨୦୧୩ ମସିହାରେ ଏହାକୁ ୧ ହଜାର ଟଙ୍କାକୁ ବୃଦ୍ଧି ହୋଇଥିବାବେଳେ ଅତିରିକ୍ତ କାର୍ଯ୍ୟ ପାଇଁ ୨ ହଜାର ଦେବା ଲାଗି ଘୋଷଣା କରିଥିଲେ ।
ମାତ୍ର ଗତ ମାର୍ଚ୍ଚ ମାସରେ ଏହି ବିଭାଗ ସ୍ୱୟଂ ସହାୟକ ଗୋଷ୍ଠୀ (SHG) ଓ ଏନଜିଓ(NGO) ମାନଙ୍କ ହାତକୁ ଦିଆଗଲା । ମାତ୍ର ଏହି କାରିଗର ମାନଙ୍କ ପାରିଶ୍ରମିକ ବୃଦ୍ଧିଲାଗି କୌଣସି ନିଷ୍ପତ୍ତି ସରକାର ନେଲେନି । ତେଣୁ ସ୍ବଳ୍ପ ଅର୍ଥରେ ବହୁକଷ୍ଟରେ ସେମାନଙ୍କ ପରିବାର ଚଳୁଥିବାବେଳେ ଅନେକ ଶ୍ରମିକ କାମ ଛାଡିଦେଇଥିବା ନେଇ ସଙ୍ଘର ସଭାପତି ଜିତେନ୍ଦ୍ର ବଳବନ୍ତରାୟ ସୂଚନା ଦେଇଛନ୍ତି । ରାଜ୍ୟରେ ଥିବା ୪୦୧୩୨ ନଳକୂପ ଓ ୯୮୫୬ ପମ୍ପ ହାଉସ ଗୁଡିକର ରକ୍ଷଣାକ୍ଷଣ ଦାୟିତ୍ବରେ ଥିବା କର୍ମଚାରୀ ମାନେ କାମ ବନ୍ଦ କରିଦେଲେ ଗ୍ରାମାଞ୍ଚଳରେ ପିଇବା ପାଣି ଯୋଗାଣ ଅଚଳ ହୋଇଯିବ ବୋଲି ସେ କହିଛନ୍ତି ।