ଭୁବନେଶ୍ବର: ରାଜଧାନୀରେ ଗତ କିଛି ଦିନ ଧରି ସରକାରୀ କ୍ବାର୍ଟରରେ ବିଭିନ୍ନ ବେଆଇନ କାର୍ଯ୍ୟ ହେଉଥିବା ଘଟଣା ଶୁଣିବାକୁ ମିଳିଛି । ଯାହା କମିଶନରେଟ ପୋଲିସ ପାଇଁ ଚିନ୍ତାର କାରଣ ପାଲଟିଛି । ଏନେଇ ଭୁବନେଶ୍ୱରରେ ଏକାଧିକ ସରକାରୀ କ୍ବାର୍ଟରର ଗ୍ରାଉଣ୍ଡ ଜିରୋରୁ ସ୍ଥିତି ପରଖିଥିଲା ଆମ ଟିମ୍ । ଚିତ୍ର ଏବେ ଆପଣଙ୍କ ସାମ୍ନାରେ । ଏ ହେଉଛି ରାଜମହଲ ଛକରେ ଥିବା ସରକାରୀ କ୍ବାର୍ଟର ଦୃଶ୍ୟ । କ୍ବାର୍ଟର ବାହାରେ ବେତ ବ୍ୟବସାୟୀଙ୍କ ପସରା ମେଲିଛି । ଆଉ ଭିତରେ ଚାଲିଛି ବେତ କାରଖାନା । ସରକାରୀ ବାବୁଙ୍କ ବଦଳରେ କ୍ବାର୍ଟର ଭିତରେ ରହୁଛନ୍ତି ବେତ କାରିଗର । ବେତ ସାମଗ୍ରୀ ତିଆରି ପାଇଁ ଆନୁସଙ୍ଗିକ ଜିନିଷ ମଧ୍ୟ ରହିଛି, ଯାହାକୁ ପ୍ରସ୍ତୁତ କରୁଛନ୍ତି କାରିଗର ।
ସରକାରୀ କ୍ବାର୍ଟରରେ ସରକାରୀ କର୍ମଚାରୀ ରହିବା ବଦଳରେ ସେଠାରେ ଚାଲୁଛି ଏପରି ବେସରକାରୀ କାମ । ସେହିପରି ତାର ପାଖକୁ ଲାଗିଲାଗି ଏକାଧିକ କ୍ବାର୍ଟରରେ ମଧ୍ୟ ବେସରକାରୀ କାମରେ ବ୍ୟବହାର ହେଉଛି । କିଛି କ୍ବାର୍ଟରରେ ରେଫ୍ରିଜେଟର ଲଗାଇ ଫଳ ଓ ପନିପରିବା ସାମଗ୍ରୀ ପ୍ୟାକିଂ ହେବା ସହ ସେଠାରେ ଆଉ କିଛି ଖାଦ୍ୟ ପ୍ରସ୍ତୁତକାରୀ ଦୋକାନୀ ମଧ୍ୟ ଖାଦ୍ୟ ପ୍ରସ୍ତୁତ କରିବାର ଦୃଶ୍ୟ ସାମ୍ନାକୁ ଆସିଛି । ଆଉ କିଛି କ୍ବାର୍ଟରରେ ବାଉଁଶରେ ତିଆରି ବିଭିନ୍ନ ସାମଗ୍ରୀ ପ୍ରସ୍ତୁତ କରି ଗୋଦାମ କରି ରଖାଯାଇଛି । ଖାଲି ସେତିକି ନୁହେଁ, ସରକାରୀ କ୍ବାର୍ଟରରେ ବିରିୟାନୀ ବ୍ୟବସାୟ ମଧ୍ୟ ଚାଲୁଛି । ଏନେଇ ସେମାନଙ୍କୁ ପଚାରିଲେ ଏକାଧିକ ଲୋକ କହିଛନ୍ତି, କେହି ରହୁନଥିବାରୁ ସେମାନେ ଆସି ରହିଥିଲେ। ପୂର୍ବରୁ ଅନେକ ଲୋକ ଘରର କବାଟ ତାଡ଼ି ନେଇଯିବା ଭଳି ପରିସ୍ଥିତି ଥିଲା । ହେଲେ ସେମାନଙ୍କ ପାଇଁ ସରକାରୀ କ୍ବାର୍ଟର ସୁରକ୍ଷିତ ଅଛି । ସେଠାରେ ଥିବା ଅନ୍ୟ କିଛି କ୍ବାର୍ଟର ଖାଲି ପଡ଼ିଥିବା ବେଳେ ପରିତ୍ୟକ୍ତ ସ୍ଥାନ ଦେଖି ନିଶାଖୋର ବ୍ୟକ୍ତି ସେଠାରେ ଆଡ୍ଡା ଜମାଉଛନ୍ତି ।