ଭୁବନେଶ୍ବର: ପୁଣି ଅଶାନ୍ତ ହୋଇପଡିଛି ରାଜ୍ୟର ପ୍ରତିଷ୍ଠିତ ଉଚ୍ଚ ଶିକ୍ଷାନୁଷ୍ଠାନ ବିଜେବି କଲେଜ । ବଢୁଛି ବିଜେବି କଲେଜରେ ଛାତ୍ର ଅଶାନ୍ତି । ଶୁକ୍ରବାର ବିଜେବି କଲେଜ୍ ମୁଖ୍ୟ ଫାଟକ ଆଗରେ ଛାତ୍ରଙ୍କ ଧାରଣା ଦେଖିବାକୁ ମିଳିଛି । ଥାନା ଅଧିକାରୀଙ୍କ ବିରୋଧରେ ଆନ୍ଦୋଳନରତ ଛାତ୍ର ଆଣିଛନ୍ତି ସଙ୍ଗୀନ ଅଭିଯୋଗ । ଛାତ୍ରଛାତ୍ରୀଙ୍କୁ ସୁରକ୍ଷା ଦେବାରେ ଥାନା ଅଧିକାରୀ ବିଫଳ ହେଉଥିବା ଅଭିଯୋଗ ଆଣି ମୁଖ୍ୟ ଗେଟରେ ତାଲା ପକାଇବା ସହ ସ୍ଲୋଗାନ ଦେଇ ଧାରଣାରେ ବସିଲେ ଛାତ୍ର ।
ଅନେକ ସମୟରେ ବିଜେବି କଲେଜ କ୍ୟାମ୍ପସ ମଧ୍ୟରେ ହିଂସାକାଣ୍ଡ ବଢ଼ି ଚାଲିଛି । ଅଣଛାତ୍ରଙ୍କ ଦୌରତ୍ମ୍ୟ ଥମିବାର ନାଁ ଧରୁନାହିଁ । ହେଲେ ଏହି ଅଣଛାତ୍ରମାନଙ୍କୁ ଗିରଫ କରିବାରେ ବିଫଳ ହେଉଛି ପୋଲିସ । ଏପଟେ ତୁରନ୍ତ ହିଂସାକାଣ୍ଡ ଭିଆଉଥିବା ଅଣଛାତ୍ରଙ୍କୁ ଗିରଫ କରାନଗଲେ ଆନ୍ଦୋଳନ ତୀବ୍ରତର ହେବ ବୋଲି ଚେତାବନୀ ଦେଇଛନ୍ତି ଆନ୍ଦୋଳନରେ ବସିଥିବ ଛାତ୍ର । ହେଲେ ଏନେଇ ପୋଲିସ ନିକଟରୁ କୌଣସି ପତିକ୍ରିୟା ମିଳିପାରିନାହିଁ । ଏପରିକି କଲେଜ କର୍ତ୍ତୃପକ୍ଷଙ୍କ ପକ୍ଷରୁ ମଧ୍ୟ କୌଣସି ପତିକ୍ରିୟା ମିଳିନାହିଁ । ରାଜ୍ୟର ଏହି ପ୍ରତିଷ୍ଠିତ କଲେଜର କ୍ୟାମ୍ପସ୍ ମଧ୍ୟରେ ଅନେକ ସମୟରେ ଗୋଷ୍ଠୀ ସଙ୍ଘର୍ଷ ଘଟୁଥିବା ନଜରକୁ ଆସିଛି । ଅନେକ ସମୟରେ ମଧ୍ୟ ଥାନାକୁ କଥା ଯାଇଛି । ତେବେ କଲେଜ କ୍ୟାମ୍ପସ ମଧ୍ୟରେ ବାରମ୍ବାର ଏଭଳି ଗୋଷ୍ଠୀ ସଙ୍ଘର୍ଷ ଏବଂ ନିଶାଦ୍ରବ୍ୟ କାରବାର ଘଟଣାରେ ପୋଲିସ କାର୍ଯ୍ୟାନୁଷ୍ଠାନ ନେବାରେ ବିଫଳ ହୋଇଥିବା ଅଭିଯୋଗ କରିଛନ୍ତି କଲେଜର ଅଧ୍ୟୟନରତ ଛାତ୍ର ।