ଭୁବନେଶ୍ବର:ପୁଣି ଠକେଇ ରାକେଟର ପର୍ଦ୍ଦାଫାସ କରିଛି କ୍ରାଇମବ୍ରାଞ୍ଚ ଅର୍ଥନୈତିକ ଅପରାଧ ଶାଖା । ଚାକିରି ନାଁରେ ବେକାର ଯୁବକ ଯୁବତୀଙ୍କ ଠାରୁ ଟଙ୍କା ଲୁଟୁଥିବା ଗ୍ୟାଙ୍ଗକୁ ଧରିଛି ଇଓଡବ୍ଲ୍ୟ । ଏହି ଗ୍ୟାଙ୍ଗର ୨ ଜଣଙ୍କୁ ସୋମବାର ଗିରଫ କରିଛି ଇଓଡବ୍ଲ୍ୟୁ । ଏହି ଗ୍ୟାଙ୍ଗ ବିଭିନ୍ନ ସରକାରୀ ଅଫିସରେ ଚାକିରି ଯୋଗାଇ ଦେବାର ପ୍ରତିଶ୍ରୁତି ଦେଇ ପ୍ରାୟ ୨୦୦ରୁ ଅଧିକ ଆଶାୟୀଙ୍କ ଠାରୁ ଲକ୍ଷାଧିକ ଟଙ୍କା ଲୁଟି ନେଇଥିଲେ । ତେବେ ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ ବାଲେଶ୍ୱରର ରାଜକିଶୋର ପଟ୍ଟନାୟକ ଏବଂ ଭୁବନେଶ୍ୱରର ଅରୁଣ ମହାନ୍ତି ।
ଇଓଡବ୍ଲ୍ୟୁ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଏହି ଗ୍ୟାଙ୍ଗ ରାଜଭବନ ସମେତ ବିଭିନ୍ନ ସରକାରୀ କାର୍ଯ୍ୟାଳୟରେ ପିଅନ, କିରାଣି ଚାକିରି ଦେବାକୁ ପ୍ରତିଶ୍ରୁତି ଦେଇ ଲୋକଙ୍କ ଠାରୁ ଟଙ୍କା ଲୁଟୁଥିଲେ । ସେମାନଙ୍କୁ ଗିରଫ କରାଯାଇ ଗତକାଲି(ସୋମବାର) ଭୁବନେଶ୍ୱର ଏସଡିଜେଏମ କୋର୍ଟରେ ହାଜର କରାଯାଇଛି । ତେବେ ଠକେଇର ଶିକାର ହୋଇଥିବା ଭୁବନେଶ୍ୱରର କୁମୁଦିନୀ ସାହୁଙ୍କ ଅଭିଯୋଗକୁ ଭିତ୍ତି କରି ତଦନ୍ତ ହୋଇଥିଲା ।
ତାଙ୍କୁ ନକଲି ସରକାରୀ ଚାକିରି ନିଯୁକ୍ତିପତ୍ର ଧରାଇ ରାଜକିଶୋର ପଟ୍ଟନାୟକ, ଅରୁଣ ମହାନ୍ତି ଓ ଭବାନୀ ଶଙ୍କର ଦାସ ପ୍ରାୟ ୮.୧୫ ଲକ୍ଷ ଟଙ୍କା ଠକି ନେଇଥିବା ଅଭିଯୋଗ କରିଥିଲେ । ମାସିକ ୩୪ ହଜାର ଟଙ୍କା ଦରମାରେ କୁମୁଦିନୀଙ୍କୁ ରାଜ ଭବନରେ କିରାଣି ଚାକିରି ଦେବାକୁ ରାଜକିଶୋର ପ୍ରତିଶ୍ରୁତି ଦେଇ ୬ ଲକ୍ଷ ଟଙ୍କା ମାଗିଥିଲେ । ଚାକିରି ପାଇବା ଲୋଭରେ କୁମୁଦିନୀ ୨ ଲକ୍ଷ ଟଙ୍କା ଅଗ୍ରୀମ ରାଜକିଶୋରଙ୍କୁ ଦେଇଥିଲେ । ହେଲେ ଟଙ୍କା ପାଇବା ପରେ ରାଜକିଶୋର ଆଉ ଧରାଛୁଆ ଦେଉ ନଥିଲେ । ଏହାପରେ ଅରୁଣ ମହାନ୍ତି ଓ ଭବାନୀ ଶଙ୍କର ଦାସଙ୍କ ସଂସ୍ପର୍ଶରେ ଆସିଥିଲେ କୁମୁଦିନୀ । ଅରୁଣ ୭ ଦିନ ଭିତରେ ସରକାରୀ ଚାକିରି ଯୋଗାଡ଼ କରିଦେବାର ପ୍ରତିଶ୍ରୁତି ଦେଇ କୁମୁଦିନୀଙ୍କୁ ୭ ଲକ୍ଷ ଟଙ୍କା ଦେବାକୁ କହିଥିଲେ । ଭରସା କରି କୁମୁଦିନୀ ୭ ଲକ୍ଷ ଟଙ୍କା ଦେଇଥିଲେ । ମାତ୍ର କୌଣସି ପ୍ରକାର ଚାକିରି ପାଇ ନଥିଲେ ।