ମହିଳାଙ୍କୁ କଚାଡି ମାରିଲା ଦନ୍ତା

କେନ୍ଦୁଝର ଜିଲ୍ଲା ତେଲକୋଇ ବନାଞ୍ଚଳ ଅନ୍ତର୍ଗତ କୃଷ୍ଣପୁର ରିଜର୍ଭ ଫରେଷ୍ଟରେ ଆଜି ସକାଳୁ ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିବାବେଳେ ଜଣେ ମହିଳାଙ୍କୁ କଚାଡି ମାରିଛି ଦନ୍ତା ।

କେନ୍ଦୁଝର: ରାଜ୍ୟରେ ଥମୁନି ହାତୀ ଆକ୍ରମଣ ଜନିତ ମୃତ୍ୟୁ ସଂଖ୍ୟା । କେନ୍ଦୁଝର ତେଲକୋଇ ବନାଞ୍ଚଳ ଅନ୍ତର୍ଗତ କୃଷ୍ଣପୁର ରିଜର୍ଭ ଫରେଷ୍ଟରେ ଆଜି ସକାଳୁ ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ହୋଇଛି ।

ମୃତ ମହିଳା ଜଣଙ୍କ ବିମଳା ପଞ୍ଚାୟତର ଟାଙ୍ଗିରି ଗ୍ରାମର ସୁଆଙ୍ଗି ଜୁଆଙ୍ଗ ବୋଲି ଜଣାପଡିଛି । ପ୍ରତିଦିନ ପରି ଆଜି ସକାଳେ ସୁଆଙ୍ଗୀ ଆଉ ଜଣେ ମହିଳାଙ୍କ ସହ ନିକଟସ୍ଥ ଜଙ୍ଗଲକୁ କାଠ ପାଇଁ ଯାଇଥିଲେ । ହଠାତ ଜଙ୍ଗଲରେ ଦନ୍ତା ହାବୁଡ଼ରେ ପଡି ଯାଇଥିଲେ। ଫଳରେ ସେ ତାଙ୍କୁ କଚାଡି ମାରିଥିବାବେଳେ ଅନ୍ୟ ମହିଳା ଜଣକ ଖସି ପଳେଇଆସିଥିଲେ ।

ତେବେ ଖବର ପାଇ ଘଟଣାସ୍ଥଳରେ ଜଙ୍ଗଲ ବିଭାଗ ଅଧିକାରୀ ପହଞ୍ଚି ମୃତଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି ।

ଏଠାରେ ସୂଚନା ଥାଉ ଯେ, ଗତକାଲି( ଶୁକ୍ରବାର) ସୁନ୍ଦରଗଡ ଜିଲ୍ଲା ଗୋଟିଟାଙ୍ଗର ଓ କୁତ୍ରାଠାରେ ହାତୀ ଘଉଡାଉଥିବାବେଳେ ଭିଡ ଭିତରୁ ଦୁଇ ଜଣଙ୍କୁ ଘୋଷାଡି ଆଣି ଦନ୍ତା ମାରିଦେଇଥିଲା ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ