ସ୍କୁଲରେ ତାଲା, ପଞ୍ଚାୟତ ଗୃହରେ ପାଠ ପଢ଼ୁଛନ୍ତି ପିଲା

ପ୍ରଧାନ ଶିକ୍ଷୟତ୍ରୀଙ୍କ ବଦଳି ଦାବିରେ ୪ ଦିନ ହେବ ଝୁମ୍ପୁରା ବ୍ଲକ ବଡ଼ନେଉଳି ଉଚ୍ଚ ବିଦ୍ୟାଳୟରେ ତାଲା । ସ୍କୁଲ ସମୁଖରେ ୧୦ ଟାରୁ ୪ ପର୍ଯ୍ୟନ୍ତ ବସି ବସି ଘରକୁ ଯାଉଛନ୍ତି ଶିକ୍ଷକ ଶିକ୍ଷୟିତ୍ରୀ ।

କେନ୍ଦୁଝର: ଝୁମ୍ପୁରା ବ୍ଲକ ବଡ଼ନେଉଳି ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷୟତ୍ରୀଙ୍କ ବଦଳି ଦାବିରେ ୪ ଦିନ ହେବ ସ୍କୁଲ ଫାଟକରେ ଝୁଲୁଛି ତାଲା । ବର୍ଷା ଯୋଗୁଁ ପଞ୍ଚାୟତରେ ଚାଲିଛି ପାଠପଢା ।

ସ୍କୁଲରେ ବ୍ୟାପକ ଅନିୟମିତତା, ଛାତ୍ରଛାତ୍ରୀଙ୍କୁ ନିମ୍ନମାନର ଖାଦ୍ୟ ଦିଆ ଯିବା ସହିତ ସ୍କୁଲର ପ୍ରଧାନ ଶିକ୍ଷୟତ୍ରୀ ହେନାରାଣୀ ସ୍ୱାଇଁ ଅଭିଭାବକମାନଙ୍କୁ ଦୁର୍ବ୍ୟବହାର କରୁଥିବା ପ୍ରତିବାଦ କରିଥିଲେ ଜନସଧାରଣ । ଗତ ଶନିବାର ଦିନ ପ୍ରଧାନ ଶିକ୍ଷୟତ୍ରୀଙ୍କୁ ଅନ୍ୟତ୍ର ବଦଳି ଦାବି କରି ସ୍କୁଲ ମୁଖ୍ୟ ଫାଟକ ସହିତ ପ୍ରଧାନ ଶିକ୍ଷୟତ୍ରୀଙ୍କ କାର୍ଯ୍ୟାଳୟରେ ତାଲା ପକାଇ ଲୋକେ ପ୍ରତିବାଦ କରିଥିଲେ । କୌଣସି ସୁଫଳ ନ ମିଳିବାରୁ ଆଜକୁ ୪ ଦିନ ହେଲା ସ୍କୁଲରେ ତାଲା ପଡିଛି ।

ଅନ୍ୟପକ୍ଷେ ସ୍କୁଲର ଅନ୍ୟ ଶିକ୍ଷକ ଶିକ୍ଷୟତ୍ରୀମାନେ ସ୍କୁଲ ସମୁଖରେ ୧୦ଟାରୁ ୪ ପର୍ଯ୍ୟନ୍ତ ବସି ବସି ଘରକୁ ଯାଉଛନ୍ତି । ସେପଟେ ପିଲାମାନେ ଶିକ୍ଷକ ଶିକ୍ଷୟତ୍ରୀଙ୍କ ବିନା ପଞ୍ଚାୟତ ଗୃହରେ ପାଠପଢ଼ି ଫେରୁଛନ୍ତି । ଏଥି ପ୍ରତି ବିଭାଗୀୟ ଅଧିକାରୀ ଦୃଷ୍ଟି ଦେଇ ଖୁବଶୀଘ୍ର ସମସ୍ୟାର ସମାଧାନ ପାଇଁ ଦାବି ହେଉଛି । ଏନେଇ ଜିଲ୍ଲା ଶିକ୍ଷାଧିକାରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଯୋଗାଯୋଗ ହେଇ ପାରିନାହିଁ ।

କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ