କେନ୍ଦୁଝର: ଜିଲ୍ଲାର ହରିଚନ୍ଦନପୁର ବ୍ଲକର ବନବୀର ଗ୍ରାମରେ 15ରୁ ଊର୍ଦ୍ଧ୍ବ ପରିବାର ନିକଟରେ ପହଞ୍ଚିପାରିନି ବିଜୁଳି ଆଲୁଅ । ବିପିଏଲ ଯୋଜନାରେ ସରକାରଙ୍କ ବିଜୁଳି ସେବାରୁ ବଞ୍ଚିତ ହୋଇ ବାରମ୍ବାର ଅଭିଯୋଗ କରିବା ପରେ ଗୁରୁବାର ଜିଲ୍ଲାପାଳଙ୍କ ନିକଟରେ ଲିଖିତ ଭାବେ ଅଭିଯୋଗ କରିଥିବା ଜଣାପଡିଛି ।
ସରକାର ବିପିଏଲ ଯୋଜନା ମାଧ୍ୟମରେ ଅନେକ ଗ୍ରାମରେ ବିଜୁଳି ସେବା ଯୋଗାଇ ଥିଲେ ମଧ୍ୟ ଏହି ପରିବାର ଏବେ ମଧ୍ୟ ବିଜୁଳି ଆଲୁଅରୁ ବଞ୍ଚିତ ହୋଇ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ।
ଏହି ଗ୍ରାମରେ ଏକ ବର୍ଷ ପୂର୍ବେ ଗ୍ରାମରେ ବିପିଏଲ ଯୋଜନାରେ ଗ୍ରାମକୁ ବିଜୁଳି ସଂଯୋଗ କାମ ଆରମ୍ଭ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ଘରକୁ ବିଜୁଳି ସଂଯୋଗ ହୋଇ ପାରିନାହିଁ । ଫଳରେ ସଂଧ୍ୟା ହେବା ମାତ୍ରେ ବନ୍ୟଜନ୍ତୁଙ୍କ ଭୟରେ ଗ୍ରାମବାସୀ ବାହରକୁ ବାହାରି ପାରୁନଥିବା ଅଭିଯୋଗ କରିଛନ୍ତି । ସେପଟେ ଛାତ୍ରଛାତ୍ରୀ ପାଠ ପଢିବାରେ ବହୁ ଅସୁବିଧା ହେଉଛି ।
ବିଜୁଳି ସଂଯୋଗ କାମରେ ଗ୍ରାମବାସୀ କାମ କରିଥିଲେ ମଧ୍ୟ ଆଜି ପର୍ଯ୍ୟନ୍ତ ସେମାନଙ୍କୁ ପାରିଶ୍ରମିକ ମିଳିନଥିବା ମଧ୍ୟ ଅଭିଯୋଗ ହୋଇଛି । ତେବେ ଏ ସଂପର୍କରେ ବାରମ୍ବାର ଅଭିଯୋଗ କଲେ ମଧ୍ୟ କେହି ଶୁଣୁନଥିବା କହିଛନ୍ତି ଗ୍ରାମବାସୀ । ଶେଷରେ ଲିଖିତ ଆକାରରେ ଜିଲ୍ଲାପାଳଙ୍କ ନିକଟରେ ଗୁରୁବାର ଗ୍ରାମବାସୀ ଅଭିଯୋଗ କରିଥିବା ସୂଚନା ମିଳିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
